Salmos 128:1-6
Kay salmuqa Jerusalénman aywaqkuna alabananpaqmi kaykan.
128 Kushishqami kaykan TAYTA DIOSTA *mantsakur pay munashqanno kawaqkunaqa.
2 Qampis tsayno karqa kushishqami kawankipaq.Arur gänashqaykipis nistashqaykikunapaq aypanqami.
3 Ali wayuq üvanömi warmikipis atska wawayuq kanqapaq.Tsurikikunanami mësaykicho juntakar olïvu yöra loqluypa loqlur winaykaqno atska kanqapaq.
4 TAYTA DIOSTA mantsakuq runaqa tsaynömi bendicionta chaskinqapaq.
5 *Sión jirkanpita patsa TAYTA DIOS bendicionninta qoykuläshunki.Jerusaléncho taqkuna jawkala kawashqanta rikanaykipaq waran waran yanapaykuläshunki.
6 Wilkaykikunata reqishqaykiyaq kawanaykipaq yanapaykuläshunki.¡Israel nacioncho runakuna ali kawaykulätsun!
Ichic wilacuycuna
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
