Salmos 106:1-48
106 ¡Aleluya!Alilata ruraq kashqanpita TAYTA DIOSTA agradëcikäriy.Kuyapäkuyninqa manami imaypis ushakantsu.*
2 Milagrukunata rurashqanpita wilakurpis ¿piraq shumaq tantiyatsinman?Mayjina alabarpis ¿piraq shumaq alabanman?
3 Kushishqami kawapäkunqa Tayta Dios munashqanno kawaqkuna.Paykunaqa imaypis alilatami rurapäkun.
4 Kuyashqayki Israel mayïkunata yanapar noqatapis yarpaykalämay, TAYTA DIOS.Shamur noqatapis salvaykalämay.
5 Tsaynöpami akrashqayki runakuna ali kawaykaqta rikashaq.Paykuna kushikärishqannömi noqapis kushikushaq.Paykuna alabashushqaykinömi noqapis alabashayki.
6 Unay aylükunanölami noqakunapis jutsata rurapäkushqä.Paykunanölami lutankunata rurapäkushqä.
7 Unay aylükunaqa Egiptucho espantaypaq rurashqaykita rikaykarpis manami cäsushurqaykitsu.Kuyapar yanapashqaykitapis manami yarpapäkurqantsu.Tsaymi Puka Lamarman chayaykur contrayki sharkapäkurqan.*
8 Tsayno karkaykaptinpis kuyapäkuq kashpaykimi paykunata salvarqayki.Tsayno salvarqayki lapanpaq munayniyuq kashqaykita tantiyakärinanpaqmi.*
9 Tsaymi olqüpaptiki Puka Lamar tsakirqan.Nirkurmi tsakilapana pasatsirqayki.
10 Tsaynöpami contrankunapa y chikiqninkunapa makinpita salvarqayki.
11 Yaku tsapaptinmi contrankuna lapan wanur ushakarqan.Manami juklaylapis kawaykar quëdarqantsu.
12 Tsayno salvaptikimi kuyashqayki runakuna promitishqaykita criyipäkurqan.*Kushikuypita cantarmi alabapäkushurqayki.*
13 Tsayno kaptinpis espantaypaq rurashqaykikunata yapaymi qonqapäkurqan.Tantiyatsishqaykitapis manami cäsukärirqantsu.
14 Chunyaq jirkachömi munashqanta ruratsiyta munar tentapäkushurqayki.
15 Tsayno rabyanätsishuptikipis munashqantami kamariparqayki.Wakintami itsanqa pesti qeshyawan ushakätsirqayki.*
16 Campamentuchöpis Moiséspa contranmi sharkapäkurqan.Tsaynölami akrashqayki Aarónpa contranpis sharkapäkurqan.
17 Tsaymi patsa kichakar Datánta ultakurkurqan.Tsaynölami Abiramta y qatiraqninkunatapis patsa tsaparkurqan.
18 Bunyaypa bunyar nina ratarmi wakin qatiraqninkunatapis usharqan.Tsay fiyu runakunata ninami rupar usharqan.*
19 Horeb jirkachönami qorita fundirkur becërruta rurapäkurqan.Nirkurmi qonqurpakuykur tsay ïduluta adorapäkurqan.
20 Lapanpaq munayniyuq kashqaykita musyaykarmi qewata mikuq töru niraqta ruraykur adorapäkurqan.*
21 Tsayno karmi Egiptucho espantaypaq kaqkunata rurar salvaqnin kaptikipis qonqapäkushurqayki.
22 Tsayno qonqapäkushurqayki mantsariypaq kaqkunata Egiptucho ruraykaptikipis.Tsaynöpis qonqapäkushurqayki Puka Lamarcho espantaypaq kaqkunata ruraykaptikipis.
23 Tsayno kaptinmi pasaypa rabyakur paykunata chipyaq ushakätsiyta munarqayki.Tsayno rabyaptikimi paykunapa favornin Moisés ruwakushurqayki.Tsaymi rabyayniki pasaptin paykunata mana ushakätsirqaykitsu.*
24 Maypis täkuypaq nacionman pushaptikipis manami yaykuyta munapäkurqantsu.Tsay nacionta qoykunaykipaq promitishqaykitapis manami criyipäkurqantsu.
25 Nishqaykita mana cäsukurmi toldunkuna rurincho contrayki rimapäkurqan.
26 Tsaymi jurar nirqayki chunyaq jirkalacho wanur ushakänanpaq kashqanta.*
27 Paykunapita miraqkunata jäpa nacionkunaman qarqunaykipaqmi nirqayki.*
28 Tsaynöpis *Baal-peor ïdulutami adorapäkurqan.Mana rasunpa kaq dioskunapaq sacrificiu rurashqankunatami mikupäkurqan.
29 Tsayno lutankunata rurarmi pasaypa rabyanätsishurqayki.Tsaymi pesti qeshyawan wakinta ushakätsirqayki.
30 Tsay junaqmi cüra Finees aywar jutsayuq runata wanutsirqan.Tsayraqmi pesti qeshya chawarqan.
31 Tsayno rurashqanpitami promitirqayki paypita miraqkuna imayyaqpis cüra kananpaq.*
32 Meriba yaku kaqchöpis tsaynölami paykuna rabyanätsishurqayki.Paykuna cuentami Moisésta nirqayki promitishqayki nacionman mana yaykunanpaq.
33 Tsay runakuna rabyanätsiptinmi Moisés mana yarpachakuypa lutanta parlarqan.*
34 Promitishqayki nacionman paykuna yaykur markakunata ushakätsinanpaq niptikipis manami ushakätsirqantsu.
35 Ushakätsinanpa trukanqa tsaycho taq runakunawan talukarmi mana ali costumbrinkunata yachakärirqan.
36 Tsaymi tsay runakunapa ïdulunkunata adorar sirvipäkurqan.Tsayno adorashqanpitami pasaypa desgracia pasarqan.*
37 *Supaykunata adorashpanmi olqu tsurintapis y warmi tsurintapis rupatsipäkurqan.*
38 Jutsaynaq kaykaptinmi tsayno wanutsipäkurqan.Tsayno wanutsipäkurqan cananeo runakuna adorashqan ïdulukunapaq sacrificiuta rupatsirmi.Tsaynöpami nacionnin maldicionashqa rikakurqan.*
39 Mana alikunata tsayno rurashpanmi pasaypa melanaypaq *impüru rikakärirqan.
40 Tsaymi kuyashqayki runakunapita pasaypa rabyakurqayki.Paykunata rikaytapis manami munarqaykitsu.
41 Contran nacionkunapa makinmanmi kachaykurqayki.Chikiqninkunaqa munashqantami ruratsirqan.
42 Makincho kaptinnami contrankunaqa penqayman churar nakatsipäkurqan.
43 Kuyashqayki runakunataqa atska kutimi salvarqayki.Tsayno salvaykaptikimi contrayki sharkapäkurqan.Jutsata rurarmi lutan rurayman churakarqan.
44 Tsayno kaykaptinpis nakashqanta rikar y manakushushqaykita mayarmi kuyaparqayki.
45 Paykunawan *pactu rurashqaykitami yarparqayki.Pasaypa kuyakuq kashpaykimi manana castigarqaykinatsu.
46 Tsaymi contrankuna kuyapänanpaqpis tantiyatsirqayki.*
47 Tayta Diosnilä, salvaykalämay.Karu nacionkunacho mashtakashqa kaykashqäpita shuntaykalämay.Tsaynöpami *santu jutikita joqarir kushishqa alabapäkushaykipaq.Pasaypa kushikurmi qamta alabapäkushayki.
48 ¡Israel runakunata kuyaq Tayta Dios imayyaqpis alabashqa kaykulätsun!Pïmay runakunapis “¡amén!” niykulätsun.¡Aleluya!*
Ichic wilacuycuna
^ 106.7 Éxo. 14.10-12.
^ 106.8 Deut. 7.7-8; Eze. 36.22-23.
^ 106.9-12 Éxo. 14.21-31.
^ 106.12 Éxo. 15.1-21.
^ 106.14-15 Núm. 11.4-34.
^ 106.16-18 Núm. 16.1-35.
^ 106.20 Jer. 2.11; Rom. 1.23.
^ 106.19-23 Éxo. 32.1-14.
^ 106.24-26 Núm. 14.1-10.
^ 106.27 Lev. 26.33.
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ 106.28-31 Núm. 25.1-13.
^ 106.32-33 Núm. 20.2-13.
^ 106.34-36 Jue. 2.1-3; 3.5-6.
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 106.37 2Rey. 17.17.
^ 106.38 Núm. 35.33.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 106.40-46 Jue. 2.14-18.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 106.47-48 1Crón. 16.35-36.
