Salmos 105:1-45
105 ¡TAYTA DIOSTA agradëcikäriy!¡Paypa jutinta joqaripäkuy!Lapan rurashqanta maytsay nacionchöpis wilakäriy.
2 Salmukunata cantar alabapäkuy.Mantsariypaq rurashqankunata wilakäriy.
3 TAYTA DIOSTA *ashiqkuna, lapan shonquykiwan payta alabapäkuy.Japalan *santu Dios kashqanpita kushikäriy.
4 Munayniyuq TAYTA DIOSTA imaypis ashipäkuy.Yanapashunaykipaq payta imaypis manakäriy.
5 Mantsariypaq rurashqan milagrukunata yarpapäkuy.Contrantsikunata imano vincishqanta ama qonqapäkuytsu.
6 Tayta Diosta sirviq Abrahampita miraqkuna, tsaykunata yarpapäkuy.Akrashqan Jacobpita miraqkuna, lapan rurashqankunata ama qonqapäkuytsu.
7 Paymi noqantsipa TAYTA DIOSNINTSI kaykan.Intëru kay patsachömi munashqanta ruran.
8 *Pactu rurashqanta manami imaypis qonqantsu.Waranqa (1,000) *generación pasaptinpis yarparaykanmi.
9 Tsay pactuta Abrahamwanmi rurarqan.*Jurashpanmi Isaactapis promitirqan.*
10 Imaypis cumplinanpaqmi Jacobta y paypita miraq Israel runakunatapis promitirqan.
11 Promitishpanmi kayno nirqan:“*Canaántami qoykushayki qamkunapa herenciayki kananpaq”.*
12 Tsay witsanqa Israel runakuna walkaqlaraqmi karqan.Jäpa nacioncho yupashqalami tarqan.
13 Paykunaqa nacionnin nacionnin y markan markanmi purikärirqan.
14 Tsayno kaptinpis Tayta Dios manami kachaparqantsu pipis nakatsinanta.Tsaymi reykunatapis castigar kayno nirqan:
15 “Akrashqä runakunata ¡ojaläraq pilapis yataykunman!Profëtäkunamanpis ¡ojaläraq pilapis makinta churaykunman!”*
16 Tayta Diosmi paykuna tashqan nacioncho muchuy kananpaq kamakätsirqan.Tsaymi mikunanpaq imapis mana karqantsu.*
17 Itsanqa paykunapa puntantami Egiptuman Joséta kacharqan muchuypita salvananpaq.Tsayman chayarqan ashmay kananpaq wawqinkuna rantikuptinmi.*
18 Egipto runakuna Josépa chakinta cadinawanmi watarätsirqan.Kunkapitami fiërru cadinawan shequrätsirqan.
19 Tsaychömi wichqararqan sueñushqankuna cumplinanyaq.Tsaynöpami rasun kaqta sueñushqanta TAYTA DIOS runakunata tantiyatsirqan.*
20 Tsaypitanami tsay nacionpa mandaqnin reyqa carcilpita jorqutsirqan.*
21 Jorqurkurmi palaciunta y lapan imaykantapis shumaq rikananpaq churarqan.*
22 Tsaynöpis churarqan mandäshiqninkunata y mayor runakunata shumaq yätsinanpaqmi.
23 Tsaypitanami Israel runakuna Egiptuman aywakärirqan.Tsaynöpami Cam particho* tsurinkunawan Jacob tarqan.*
24 Tayta Diospa bendicionninwanmi atskaqman mirapäkurqan.Egipto runakunapitapis mas atskaqmi karqan.
25 Tsaymi Egipto runakunata Tayta Dios yarpayta qorqan Israel runakunapa contran sharkunanpaq.Tsaynöpami Tayta Diosta sirviq runakunata nakatsipäkurqan.*
26 Tsaypitami Tayta Dios kacharqan sirviqnin Moisésta y akrashqan Aarónta.*
27 Paykunami Tayta Diospa munayninwan Cam particho espantaypaq kaqkunata rurapäkurqan.
28 Tsaymi tsay nacioncho yanawyayparaq tsakätsirqan.Tsayno kaptinpis Egipto runakunaqa Moisés nishqanta manami cäsukärirqantsu.*
29 Yawarmanmi mayukunatapis Tayta Dios tikratsirqan.Pescädukunapis lapanmi wanur ushakarqan.*
30 Intëru nacionman ratsakkunami juntarqan.Mandaq reypa palaciunmanpis juntarqanmi.*
31 Tayta Dios mandaptinmi upuqruykunapis* y chuspikunapis intëru Egiptuman juntarqan.*
32 Tamyapa trukanmi runtu tamyata tamyatsimurqan.Räyutami pashtatsimurqan intëru tsay nacionman.
33 Tsay runtu tamyami üva yörakunatapis hïgus yörakunatapis tululantana kachaykurqan.Egiptucho lapan yörakunatami rapraynaqlatana kachaykurqan.*
34 Tayta Dios mandaptinmi tukuy casta chukluskunapis tsayman juntarqan.Yupaytapis mana atipaypaqmi tsaytsika karqan.
35 Tsaykunami lapan qewakunatapis usharqan.Chakracho mikuynintapis chipyaqmi usharqan.*
36 Egipto runakunapa lapan qechpa tsurinkunatapis Tayta Diosmi wanutsirqan.*
37 Atska qoriyuqta y atska qellayniyuqtami kuyashqan runakunata jorqamurqan.Yarqamuptin manami pipis tsapata churaparqantsu.
38 Egipto runakuna pasaypa mantsakashqa karkaykashqanchömi aywakäriptinqa kushikärirqanna.*
39 Israel runakunata lantupänanpaqmi pukutayta Tayta Dios kamariparqan.Tsakaypa atskipänanpaqnami rataykaq ninata kamariparqan.*
40 Aytsata manakuptinnami codornizkunata yuritsirqan.Saksaqpaq mikupäkunanpaqmi jana patsapita mikuytapis kamaripämurqan.*
41 Upupäkunanpaq yakutapis qaqapitami pashtatsimurqan.Tsaymi chunyaq tsaki jirkapa tsaytsika yaku aywarqan.*
42 Tsaynömi sirviqnin Abrahamta promitishqanta cumplir Israel runakunata Tayta Dios yanaparqan.
43 Egiptupitami kuyashqan runakunata jorqamurqan.Jorqamuptinmi pasaypa kushishqa yarqapäkamurqan.
44 Paykuna tänanpaqmi jäpa runakunapa markankunata Tayta Dios rikatsirqan.Jäpa runakunapa imaykantapis paykunatami qoykurqan.*
45 Tsayno qoykurqan estatütunkunata y leyninkunata cäsukärinanpaqmi.¡Aleluya!
Ichic wilacuycuna
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ generación Juk generacionqa kaykan runa yurishqanpita hasta tsurin yurishqanyaqmi. Tsurinkuna yuriptinnami juk generación qalaykun. Wilkankuna yuriptinnami juk generación qalaykun. Wilkankunapa tsurinkuna yuriptinnami juk generación qalaykun. Tsaynölami imayyaqpis kanqa (Éxo. 20.6; Deut. 5.10; 7.9; 1Crón. 16.15; Sal. 105.8; Mat. 1.17).
^ 105.9a Gén. 12.7; 17.8.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 105.10-11 Gén. 28.13.
^ 105.14-15 Gén. 20.3-7.
^ 105.16 Gén. 41.53-57.
^ 105.17 Gén. 37.28; 45.5.
^ 105.18-19 Gén. 39.20—40.23.
^ 105.20 Gén. 41.14.
^ 105.21 Gén. 41.39-41.
^ 105.23 Gén. 46.6; 47.11.
^ 105.23 Cam partiqa Egipto nacionmi karqan.
^ 105.24-25 Éxo. 1.7-14.
^ 105.26 Éxo. 3.1—4.17.
^ 105.28 Éxo. 10.21-23.
^ 105.29 Éxo. 7.17-21.
^ 105.30 Éxo. 8.1-6.
^ 105.31 Wakin runakunaqa täbanukunapis nipäkun.
^ 105.31 Éxo. 8.16-24.
^ 105.32-33 Éxo. 9.22-25.
^ 105.34-35 Éxo. 10.12-15.
^ 105.36 Éxo. 12.29.
^ 105.37-38 Éxo. 12.33-36.
^ 105.39 Éxo. 13.21-22.
^ 105.40 Éxo. 16.2-15.
^ 105.41 Éxo. 17.1-7; Núm. 20.2-13.
^ 105.44 Jos. 11.16-23.
