Romanos 7:1-25
7 Wawqi panikuna, Diospa leyninkunata yachaykarqa musyapäkunkimi kawaykaqkunala leykunata cumplinanpaq kashqanta.
2 Tsaynölami majayuq warmipis runan kawashqanyaqla runanpa munaynincho kaykan. Runan wanuptinqa manami munayninchönatsu kaykan.
3 Runan kawaykaptin juk runawan kakurqa runantami jarukuykan. Runan wanukuptinmi itsanqa tsay leypita librina kar juk runawanpis täkunman.
4 Wawqi panikuna, Jesucristo cruzcho wanushqa kaptinmi noqantsipis Diospa leyninkunapaq wanushqano kaykantsi. Tsaymi tsay leykunapa munaynincho kanantsipa trukanqa Jesucristupa munayninchöna kaykantsi. Paytami wanushqanpita Tayta Dios kawaritsimurqan pay munashqanno kawanantsipaq.
5 Nawpataqa jutsa ruraypa munaynincho kawaptintsimi Tayta Diospa leyninkuna yarpayta qomarqantsi jutsata mas ruranantsipaq. Tsayno jutsata rurarmi wanushqano karqantsi.
6 Kananqa tsay leykunapa munaynincho kashqantsipita yarqukurmi tsay leykunapaq wanushqanöna kaykantsi. Tsayno karqa manami tsay leykunata cumpliypatsu Tayta Diosta sirviykantsi, sinöqa Espíritu Santu yanapamaptintsimi.
Munaynincho jutsa ruray tsararämashqantsi
7 Tsayno kaptinpis ama yarpäshuntsu Diospa leyninkuna mana ali kashqanta. Diospa leyninkunaqa alimi kaykan. Tsay leykunata mana yacharqa manami musyämantsu karqan jutsa ima kashqantapis.
Tsay leykunacho kaynömi niykan: “Runa mayikipa imaykankunatapis ama munapankitsu”.*
Tsayno mana niptinqa manami musyämantsu karqan jukpa imantapis munapashqä jutsa kashqanta.
8 Tsayno kaptinpis tsay leyta jutsa ruray manijaptinmi masraq imatapis munaparqä. Diospa leyninkunata mana musyaptïqa jutsa ruray wanushqa kar manami yarpätsimanmantsu karqan.
9 Nawpataqa tsay leykunata manaraq musyar jawkami kawakurqä. Diospa leyninkunata musyaptïnami itsanqa jutsa ruray munayniyuq rikakuptin wanushqanöna karqä.
10 Tsaymi Tayta Diospa leyninkunata musyarpis ali kawayman chayanäpa trukan wanuyman chayarqä.
11 Tsaynöpami jutsa ruray engañamar Diospa leyninkunata manijarqan wanutsimänanpaq.
12 Tsayno kaptinpis Tayta Diospa leyninkuna y mandamientunkunaqa rasunpa alimi y *sagrädumi kaykan.
13 Wanushqano rikakunäpaq manami Diospa leyninkunatsu jutsayuq kaykan, sinöqa jutsa ruraymi. Jutsa ruraymi Diospa leyninkunata manijar wanuyman apamarqan. Tsaynöpami tantiyä jutsa ruray pasaypa mana ali kashqanta.
14 Musyantsimi Tayta Diospa leyninkuna ali kashqanta. Tsayno kaptinpis noqaqa runala karmi jutsa ruraypa munaynincho kaykä.
15 Tsayno karmi imanir jutsata rurashqätapis mana tantiyätsu. Ali rurayta munarpis mana munashqä kaqtami rurä.*
16 Mana munashqä kaqta rurarmi tantiyä tsay leykuna ali kashqanta.
17 Jutsa rurayta mana munaptïpis shonqücho kaykaq jutsa ruraymi mana alikunata ruratsiman.
18 Noqaqa alikunata rurayta munarpis manami kamäpakütsu. Tsaymi musyä shonqücho mana alikunala kashqanta.
19 Tsayno karmi Tayta Dios munashqanta rurayta munaykarpis mana alikunata rurä.
20 Jutsa rurayta mana munaptïpis shonqücho jutsa ruraymi jutsata ruratsiman.
21 Tsaynölami imaypis pasaman. Alita rurayta munarpis mana alitami rurä.
22 Shonqücho Tayta Diospa leyninkunata cäsukuyta munaptïpis
23 jutsa ruraymi ali yarpaynïwan pelyaykan. Vincimar prësutano tsarirkamarmi jutsa rurayman tunitsiman.
24 Noqaqa Tayta Diospa leyninkunata cäsukuyta munarpis jutsa ruraypa munaynilanchöraqmi kaykä. Tsayno kaykaptinqa pasaypa lakipaypaqmi kaykä. Wanushqano kaykashqäpita ¿pilaraq salvaykamanman? ¡Yusulpalä, Tayta Dios! ¡Señor Jesucristumi salvaman!
25 -
