Proverbios 3:1-35
3 Yachatsishqäkunata ama qonqankitsu, hïju.Mandamientükunata mana qonqaypa yarparanki.
2 Yarpararqa atska watami kushishqa kawankipaq.
3 Imaypis ama qonqankitsu kuyakuq kayta y rasun kaqlata rimayta.Mana qonqanaykipaq kunkaykiman tsaykunata walqakuy.Imaypis yarparänaykipaq shonquykiman qelqay.
4 Tsaynöpami Tayta Diospis y runakunapis ali rikashunkipaq.*
5 Lapan shonquykiwan Tayta Diosman yärakuy.Yachaq kashqaykimanqa ama atiënikuytsu.*
6 Imata ruranaykipaqpis Tayta Dios munashqanno ruranaykipaq yarpachakuy.Tsayno kawaptikiqa paymi yanapashunkipaq.
7 Ama yachaq tukuytsu.Tsaypa trukanqa Tayta Diosta *mantsakushpayki lutankunata ama ruraytsu.
8 Tsayno kawarqa manami qeshyankipaqtsu y cuerpuykipis ashaklami kanqa.
9 TAYTA DIOSTA adorar imaykipis kashqanpita y chakraykicho punta poquqkunapita ofrendata apay.
10 Tsayno aparqa wayikipis kichkishqanyaqmi mikuynikikunata shuntankipaq.Üvata tsaytsikata shuntaptikimi puyñuykikunapita vïnupis liwanqaraq.
11 TAYTA DIOS corrigishuptiki ama jaqayaytsu, hïju.Jaqayänaykipa trukanqa chaskikuy.
12 Kuyashqan tsurinta papänin corrigishqannömi TAYTA DIOSPIS kuyashqan kaqtaqa corrigin.*
13 Kushishqami kawanqa tantiyakuq y ali yarpayniyuq runaqa.
14 Tantiyakuq kashqanqa qellayyuq y qoriyuq kashqanpitapis mas alimi kaykan.
15 Kuyaylapaq rumikunapitapis masmi välin.Tantiyakuymanqa imata munashqaykipis manami tinkuntsu.
16 Tantiyakuyqa alawqa kaq makinwanmi atska wata kawayta kamaripäshunki.Itsuq kaq makinwannami rïcu kanaykipaq y pïmaypitapis ali rikashqa kanaykipaq yanapashunki.
17 Tsaynöpami piwanpis mana rimanakuypa kushishqa kawankipaq.
18 Tantiyakuq karqa atska watami kushishqa kawankipaq.
19 TAYTA DIOS tantiyakuq karmi kay patsatapis jana patsatapis kamarqan.
20 Yachayninwanmi qochakuna y mayukuna kananpaq yakutapis pashtatsimurqan.Tsaynölami tamyamunanpaq pukutaytapis kamarqan.
21 Tantiyakuq kayta imaypis ama qonqaytsu, hïju.Shumaq yarpachakurir imatapis ruranki.
22 Tantiyakuq kashpaykiqa alimi kawankipaq.Runakunapis respitashushpayki ali kashqaykitami nipäkunqapaq.
23 Tantiyakuq karqa mana mantsakuypami ali kawankipaq.Jutsa ruraymanpis manami tuninkipaqtsu.
24 Tsaynöpis mana mantsakuypami ali pununkipaq.*
25 Fiyu runakunata elaqpita desgracia pasaptinpis qamtaqa manami pasashunkipaqtsu.
26 Tsayno kawanaykipaqqa TAYTA DIOSMI imaypis yanapashunkipaq.Paymi ima nakaypitapis tsapäshunkipaq.
27 Yanapayta kamäpakuykarqa pishipakuqta jukla yanapanki.*
28 Kaykaptinqa runa mayikita ama ninkitsu: “Wararaq kutimunki yanapanäpaq”.
29 Yärakuykäshuptikiqa runa mayikipa contran sharkunaykipaq ama yarpaylapis yarpaytsu.
30 Achäquita mana ashipaykäshuptikiqa piwanpis ama rimanakuytsu.
31 Fiyu runakuna rïcuyaptin ama chikipaytsu.Mana alita rurapäkuptinpis qamqa ama ruraytsu.
32 Fiyu runakunataqa TAYTA DIOS rikaytapis manami munantsu.Ali shonqu runakunatami itsanqa kuyan.
33 Lutan ruraq runakunataqa ayluntintami TAYTA DIOS maldicionan.Ali shonqu runakunatami itsanqa ayluntinta bendicionninta kamaripan.
34 Runa mayinta manakaqman churaqkunataqa kikintami TAYTA DIOS manakaqman churan.Humildi kaqkunatami itsanqa kuyapar yanapan.*
35 Tantiyakuq runakunataqa pïmaypis respitanmi.Mana tantiyakuq runakunatami itsanqa pipis mana respitantsu.
Ichic wilacuycuna
^ 3.5 Rom. 12.16.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 3.11-12 Deut. 8.5; 2Sam. 7.14; Job 5.17; Heb. 12.5-6; Apoc. 3.19.
