Miqueas 4:1-13
4 Shamuq watakunachömi TAYTA DIOSPA wayin kaykashqan jirkanqa wakin jirkankunapita mas respitashqa kanqapaq.Tsaymanmi maytsay nacionpitapis runakuna aywapäkunqa Tayta Diosta adorapäkunanpaq.
2 Tsaynölami *Sión jirkanpita TAYTA DIOSPA yachatsikuyninta maytsaymanpis apapäkunqapaq.Jerusalénpita patsami palabranta wilakärinqapaq.Maytsay nacionpitami runakuna Jerusalénman aywaykur kayno nipäkunqapaq:“Lapanintsi witsäshun TAYTA DIOS akrashqan jirkanman.Jacobpita miraq runakuna yärakushqan TAYTA DIOSPA templunman yaykushun.Tsaychömi kikin yachatsimäshun mandamientunkunata imano cumplinantsipaq kashqantapis.Tsaynöpami pay munashqanno lapantsi kawashunpaq”.*
3 Atska nación runakuna chikinakäriptinpis TAYTA DIOSMI arreglanqapaq.Tsay nacionkuna jatun kaptinpis y mayjina karucho kaptinpis paymi juzganqapaq.Juk markawan juk marka guërrata manami ruranqanatsu.Maytsaychöpis runakuna espädanpita rëjantanami ruratsipäkunqa.Lanzanpitanami ösita ruratsipäkunqa.*Guërracho pelyananpaqpis manami kamarikunqanatsu.
4 Tsayno kaptinmi runakuna pitapis mana mantsakuypa kawapäkunqapaq.Üva yörapa y hïgus yörapa sikincho jawkami jamarpanqapaq.*Lapanta mandaq TAYTA DIOSMI tsayno kananpaq kashqanta nin.
5 Wakin marka runakuna diosninkunaman yärakuptinpis noqantsiqa munayniyuq TAYTA DIOSNINTSIMAN imaypis yärakärishun.
Israel runakuna markanman kutipäkunanpaq nishqan
6 TAYTA DIOSMI kayno nin:“Tsay junaqqa chakin pakishqa y oqrakashqa uyshakunata shuntaqnömi castigashqä Israel runakunata shuntamushaq.
7 Chakin pakishqa uyshano kaykaptinpisy juk lädu markaman qarqushqa kaykaptinpisyanapashaq markanman kutir munayniyuq rikakärinanpaq.Nirkurnami *Sión jirkanpita imayyaqpis paykunapa mandaqnin rey kashaqpaq.*
8 “Sión marka, uyshakunata rikachakuna törrino karmi Tayta Dios kuyashqan runakunata ali rikaykanki.Qamqa yapaymi munayniyuq kankipaq.Kuyashqä Jerusalénpitaqa yapaymi reykuna mandanqapaq.
9 Tsayno kananpaq kaykaptinqa ¿imanirtaq wachay nanaywan qaparaq warmino qaparaykanki?¿Manaku mandaqniki rey kan?¿Yachaq runakuna wanushqaku karkaykan?
10 Tsayno kaptinpis qamcho taq runakunata jäkuq jirkakunapa prësu aparmi Babilonia nacionman chayatsipäkunqa.Ay Sión, tsayno kananpaq kaykaptinqa pasaypa lakikur wachay nanaywan qochpaykaq warmi qaparashqanno qaparay.Juk lädu nacionman apashuptikipis contraykikunapa makinpitami TAYTA DIOS salvashunkipaq”.
11 Kananqa atska nación runakunami juntakaykur contrayki sharkapäkushqa.Paykunaqa kaynömi wilanakurkaykan:“¡Sión marka ushakashqa kaykaqta rikar kushipäshun!”
12 Itsanqa tsay runakuna manami tantiyapäkuntsu TAYTA DIOS imata yarpaykashqantapis.Manami musyapäkuntsu trïguta wirunanpaq ëraman shuntaqno paykunata shuntar castigananpaq kashqanta.
13 Tayta Dios kaynömi nin:“Sión, trïguta jarutsir päjata qochmuqpaq ushakätsishqanno tsay nacionkunata ushakätsiy.Noqami yanapashayki fiërru waqrayuq y bronci shilluyuq töruno kar atska nacionkunata ushakätsinaykipaq.Nirkurnami suwashqan riquëzantapis shuntamunkipaq.Tsaytanami kay patsapa duëñun kaptï noqa TAYTA DIOSPAQ apamunkipaq”.
Ichic wilacuycuna
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 4.2 Isa. 56.6-7; Zac. 8.20-22.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
