Mateo 3:1-17
3 Tsay watakunami Judea provinciacho kaykaq chunyaq jirkacho Bautizaq Juan wilakur
2 kayno nirqan: “¡Tayta Dios *mandaykashqan chayamushqanami! ¡Jutsa rurayta kacharir Tayta Dios munashqannöna kawapäkuy!”*
3 Tsayno wilakunanpaq profëta Isaías qelqashqanchömi kayno nin:“Juk runami chunyaq jirkacho qayaraypa wilakur kayno niykan:‘Tayta Dios shamunanpaq nänita altsapäkuy.Wenqu nänikunata derechapäkuy’ ”.*
4 Juanpa röpan karqan *camëllupa aqtsanpita awashqami. Wachkunpis karqan camëllu qarapita rurashqami.* Mikuyninpis chukluskuna y abëjapa mishkinmi karqan.
5 Juan wilakushqanta mayananpaqmi Jerusalénpita, Judeapita y Jordán mayu witsan markakunapita runakuna aywapäkurqan.
6 Tayta Diosta perdonta manakäriptinmi Jordán mayucho tsay runakunata Juan *bautizarqan.
7 Tsayman atska *fariseo y *saduceo runakuna *bautizakuq chayashqanta rikarmi Juan kayno nirqan: “¡Culebra casta runakuna!* ¡Pitaq qamkunata nishushqanki Tayta Diospa castïgunpita qeshpipäkunaykipaq kashqanta!
8 Jutsaykikunata rasunpa kacharishqa karqa Tayta Dios munashqannöna kawapäkuy.
9 Ama yarpapäkuytsu Abrahampa aylun kashqaykipita* Tayta Dios salvashunaykipaq kashqanta. Noqa kaynömi nï: Tayta Dios munarqa kay rumikunatapis Abraham aylu runakunaman tikraratsinmanmi.
10 Mana wayuq yörakunata sapipita muturir ninaman qaykuqnömi jutsa ruraqkunata castigananpaq Tayta Dios kamarikushqana kaykan.*
11 “Jutsa rurayta kacharir Tayta Dios munashqanno kawanaykipaqmi yakuwan bautizä. Qepäta shamuq kaqmi itsanqa Espíritu Santuwan y ninawan bautizapäkushunkipaq. Noqapita mas munayniyuq kaptinmi mana välïtsu lanqinta apapänaläpaqpis.
12 Trïguta wayrananpaq jurquëtan aptashqanami kaykan. Wayrarkurnami trïguta wayinman churanqa. Punshantanami imaypis mana upiq ninaman qaykunqa”.
Jesústa Juan bautizashqan
Marcos 1.9-11; Lucas 3.21-22
13 Juan *bautizananpaqmi Jesúspis Galileapita Jordán mayuman aywarqan.
14 Chayaykuptin bautizayta mana munarmi Juan kayno nirqan: “Manami qamta bautizämantsu, tayta. Tsaypa trukanqa noqata bautizaykalämay”.
15 Tsayno niptinmi Jesús kayno nirqan: “Imano kaptinpis bautizaykalämay. Bautizamänaykitami Tayta Dios munan”.
Tsayno niptinmi bautizarqan.
16 Bautizakurir yakupita yarqaykämuptinmi jana patsa kichakämurqan. Tsaychömi Jesús rikarqan Espíritu Santu palumano urämur jananman rataykaqta.
17 Tsaynöpis jana patsapita Tayta Dios kayno nimurqan: “Payqa kuyay tsurïmi. Paypitami kushishqa kaykä”.*
Ichic wilacuycuna
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 3.2 Mat. 4.17; Mar. 1.15.
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ saduceo runa Saduceo runakunaqa yarpapäkurqan Moisés qelqashqankunala Tayta Diospa yachatsikuynin kashqantami. Paykunaqa manami criyirqantsu runakuna wanushqanpita kawarimunanpaq kashqanta ni alman kashqanta ni angilkuna kashqantapis. Saduceukunaqa mas rïcu runakunami karqan. Fariseo runakunapitaqa mas munayniyuqmi karqan (Luc. 20.27-40).
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ 3.7 Mat. 12.34; 23.33.
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ 3.17 Sal. 2.7; Mat. 17.5; Mar. 1.11; Luc. 9.35.
