Marcos 3:1-35
3 Juk kutichömi *sinagögaman Jesús yapay yaykurqan. Tsaychömi makin wanushqa runapis kaykarqan.
2 Tsaymi Jesústa rikaparkaykarqan jamay junaqcho aliyätsiptinqa tsay achäquila contran sharkapäkunanpaq.
3 Tsawraqa makin wanushqa runata Jesús kayno nirqan: “Runakunapa nawpanman ichiy”.
4 Nirkurnami runakunata tapurqan kayno nir: “Jamay junaqcho ¿ali kaqtaku o mana ali kaqtaku rurashwan? Runa mayintsita ¿salvashwanku o ‘wanukutsunpis’ nishwanku?”
Tsayno niptin manami imatapis nipäkurqantsu.
5 Tsaymi paykunata Jesús rabyashqa rikärirqan. Mana kuyapäkuq kashqanta musyarmi pasaypa lakikushpan makin wanushqa runata kayno nirqan: “¡Makikita joqariy!”
Joqarkuptinmi makin aliyashqana rikakurqan.
6 Tsawraqa *fariseukuna yarqurishpan Herodespa favornin sharkuq runakunawan wilanakurqan Jesústa wanutsipäkunanpaq.
Atska runakuna qocha kuchunman juntakashqan
7 Tsaypitanami discïpulunkunawan Jesús aywarqan qocha kuchunman. Qepantanami tsaytsika runakuna Galileapita y Judeapita aywapäkurqan.
8 Tsaynöpis Jesús rurashqankunata mayaykurmi tsaytsika runakuna aywapäkurqan Jerusalénpita, Idumeapita, Jordán mayu wak tsimpanpita, Tiro markapita y Sidón markapitapis.
9 Tsaymi discïpulunkunata Jesús kayno nirqan: “*Büquita kamarishqala kaykätsiy runakuna juntapämaptin tsayman witsänäpaq”.
10 Atska runakunata aliyätsishqa kaptinmi lapan qeshyaqkuna imaykanöpapis Jesústa yataykuyta munapäkurqan.*
11 Jesústa rikashpanmi *supaykuna löcuyätsishqan runakunapis nawpanman lätakuykur fuertipa kayno nipäkurqan: “¡Qamqa Diospa Tsurinmi kanki!”
12 Tsayno niptinmi paykunata Jesús olqüparqan pï kashqantapis mana wilakärinanpaq.
Chunka ishkay apostolninkunata Jesús akrashqan
Lucas 6.12-16
13 Tsaypita jirkaman Jesús witsarkurmi wakin discïpulunkunata jutinpa jutinpa qayarqan.
14 Tsay qayashqan discïpulunkunami chunka ishkay *apostolninkuna karqan. Paykunata qayarqan paywan purinanpaq, Tayta Diospa wilakuyninta wilakunanpaq,
15 [qeshyaykaqkunata aliyätsinanpaq] y runakunapita *supaykunata qarqupäkunanpaq.
16 Paykunami karqan Simón (paypa jutintami trukatsirqan Pedro kananpaq)
17 y Zebedeupa tsurinkuna Santiago y Juan. Santiaguta y Juantami kuyay jutinta churaparqan Boanerges jutin kananpaq. Boanerges nishqanqa “räyupa tsurinkuna” ninanmi.
18 Wakin kaqkunami karqan Andrés, Felipe, Bartolomé, Mateo, Tomás, Alfeupa tsurin Santiago, Tadeo, *Zelote nishqan Simón
19 y Jesústa rantikuq Judas Iscariote.
Jesúspa contran parlashqan
Mateo 12.22-32; Lucas 11.14-23; 12.10
20 Tsaypita juk wayiman Jesús yaykuptinmi tsaymanpis atska runakuna juntakarqan. Tsaymi tiempun mana karqantsu discïpulunkunawan mikunalanpaqpis.
21 Jesús tsayno kaykashqanta mayaykurmi löcuyashqa kaykashqanta yarpashpan aylunkuna shuntaq aywapäkurqan.
22 Tsay junaqkunami ley yachatsiqkuna Jerusalénpita chayaykur kayno nipäkurqan: “Kay runaqa *supaykunapa mandaqnin Beelzebúpa* munayninwanmi supaykunata qarquykan”.*
23 Tsayno niptinmi tsay runakunata qayaykatsir Jesús tinkutsiypa kayno nirqan: “¿Imanöpataq *Satanás kikinta qarqukunman?
24 Juk nacioncho runakuna kikinpura chikinakurqa ¿manatsuraq wanutsinakur ushakanqa?
25 Tsaynöpis juk wayicho taqkuna chikinakurqa ¿manatsuraq wakpa kaypa aywakur ushakanqa?
26 Satanáspis kikinpa contran sharkurqa ushakanqami.
27 Kalpayuq runata manaraq matwarqa manami pipis wayinman yaykur imankunatapis apakuntsu. Matwaykurmi itsanqa imankunatapis apakun.*
28 “Rasunpami kayno nï: Runakuna jutsa rurashqanta y Diospa contran parlashqantapis Tayta Dios perdonanqami.
29 Espíritu Santupa contran parlashqantami itsanqa imaypis mana perdonanqatsu”.* *
30 Jesús tsayno nirqan supay yanapaykashqanta nipäkuptinmi.
Jesúspa maman y wawqinkuna pï kashqanpis
Mateo 12.46-50; Lucas 8.19-21
31 Tsaypitanami Jesúspa maman y wawqinkuna wayi punkuman chayaykur Jesústa qayatsirqan.
32 Tsaymi Jesúswan jamaraykaqkuna wilarqan kayno nir: “Mamayki y wawqikikunami punkucho shuyarpaykäshunki”.
33 Tsayno niptinmi Jesús kayno nirqan: “Mamä y wawqïkuna ¿pï kashqantapis musyankiku?”
34 Tsayno nirmi paywan jamaraykaqkunata rikärir kayno nirqan: “Kaychömi mamä y wawqïkuna karkaykan.
35 Pipis Tayta Dios munashqanno kawaq kaqmi wawqï, panï y mamä kaykan”.
Ichic wilacuycuna
^ sinagöga Sinagögaqa Israel runakuna juntakänan wayimi karqan. Tsaymanmi juntakäriq Tayta Diosta manakärinanpaq, Moisés qelqashqan leykunata yachakärinanpaq, sesionkunata rurapäkunanpaq y wamrakuna liyiyta yachakärinanpaq (Mar. 1.21; Juan 9.34; Hech. 15.21).
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 3.9-10 Mar. 4.1; Luc. 5.1-3.
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ Zelote runakuna Zelote nishqan runakunaqa wakin Israel runakunami karqan. Paykunami Roma autoridäkunata Israel nacionpita qarquyta munashpan contran sharkapäkurqan. Tsaymi Zelote runakuna Israel nacioncho puripäkuq Roma autoridäkunata wanutsir. Jesucristupa apostolnin Simónpis apóstol manaraq kar Zelote runami karqan (Luc. 6.15).
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 3.22 Beelzebúqa Satanáspa jukaq jutinmi.
^ 3.22 Mat. 9.34; 10.25.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 3.27 Kalpayuq runamanmi Satanásta tinkutsin. Imankunamanmi munaynincho tsararashqan runakunata tinkutsin. Satanásta matwaq runamanmi Jesucristo kikinta tinkutsikun. Tsaynöpami tantiyatsirqan Satanáspita mas munayniyuq kashqanta.
^ 3.29 Espíritu Santuqa jutsantsita kacharir Jesucristuta chaskikunantsipaqmi tantiyatsimantsi (Juan 16.8-11). Tsaymi Espíritu Santupa contran parlarqa pay tantiyatsishqanta mana chaskikur Jesucristutapis mana chaskikuntsu (Hech. 7.51). Jesucristuta chaskikuq kaqmi itsanqa perdonashqa kanqa.
^ 3.29 Luc. 12.10.
