Lamentaciones 5:1-22
Pitsqa kaq poesía
5 TAYTA DIOS, ima pasamashqantapis rikaykarqa kuyapaykalämay.Kayjinanpa desgracia pasaykämaptinqa yanapaykalämay.*
2 Chakräkunatapis juk lädu nación runakunami mururkaykan.Wayïkunachöpis jäpa runakunami tarkaykan.
3 Noqakunaqa taytaynaq waktsa wamrakunanömi karkaykä.Noqakunapa mamäpis ayluynaq viüdanömi rikakärishqa.
4 Kananqa kikïkunapa yakütapis upunäpaq rantïraqmi.Kikïkunapa yantäkunatapis pägaykurraqmi yantakärï.
5 Conträkunapis apta aptami qatikacharkaykäman.Mayjina utikashqa karpis manami jamayta taripäkütsu.
6 Egipto runakunata y Asiria runakunataraqmi mikuyta kamaripämänanpaq ruwakärï.
7 Unay aylükunaqa jutsata rurarpis castïguta manaraq chaskirmi wanupäkushqa.Paykunapa jutsankunapitami noqakuna castïguta chaskirkaykä.
8 Kananqa ashmay runakunapa makinchömi karkaykä.Paykunapa makinpita jorqamänanpaq manami pipis kantsu.
9 Chunyaq partikunapita mikuykunata apamurpis asaltantikunapa makinpita wanuy kawaymi qeshpipäkamü.
10 Pasaypa mikanarmi warishqa hornucho rupatsishqano qaräkunapis yanayashqa kaykan.
11 *Sióncho warmikunata y Judá markakunacho jipashkunatapis tsaripakushqami.
12 Mandamaqnïkunatapis makipita watarkurmi warkapäkushqa.Mayor runakunatapis manami respitapäkushqatsu.
13 Mas kalpayuq runakunatami apapäkushqa mulinu rumita tumatsinanpaq.Mözukunatami yantata aparipashqa apaytapis mana puëdishqanyaq.
14 Mayor runakunapis marka punkucho manami jamarannatsu.Mözukuna y jipashkunapis manami cantannatsu.
15 Kushikuytapis manami taripäkünatsu.Kushikur qatswanäpa trukan wanupakushqano pasaypa lakikuylachömi kawarkaykä.
16 Noqakunapa umäpita corönäkuna ishkiqnömi munayniyuq kashqäkunapis ushakashqa.¡Kananchi kananlaqa!Pasaypa jutsayuq kashqäpitami kayno nakarkaykä.
17 Lakikuylawannami shonqüpis fiyupa nanaykan.Waqaylawannami nawïpis tsakarpunna.
18 Sión jirkan pasaypa chunyaraptinmi munti uywakunalana tsaycho purirkaykan.
19 TAYTA DIOS, ima pasaptinpis qammi itsanqa imayyaqpis mandamaqnï rey kaykanki.Jana patsapita patsami imayyaqpis mandaykämunki.*
20 ¿Imanirtaq pasaypa qonqaykamashqanki?¿Imanirtaq kaytsika unay kachariykamashqanki?*
21 TAYTA DIOS, noqakunata perdonaykalämay.Perdonamaptikiqa qamlamannami yärakärimushaq.Kamakaykatsilay unay kawashqäno yapay kushishqa kawapäkunäpaq.
22 ¿Imanirtaq rikaytapis mana munamankinatsu?¿Fiyupaku noqakunapita rabyashqa kaykanki?
Ichic wilacuycuna
^ 5.1-22 Sal. 44.9-26; 74.1-10; 79.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 5.19 Sal. 145.13; 146.10.
