Lamentaciones 2:1-22

GALAYCACHINAPAJ

^Álef 2 Fiyupa rabyakushpanmi *Siónta Tayta Dios castigashqa.Jana patsachöno kuyaylapaq kaptinpis chipyaqmi ushakätsishqa.Rabyarmi tänan templutapis mana kuyapaypa elqätsishqa. ^Bet ² Tayta Dios pasaypa rabyashpanmi Jacobpita miraq runakunapa wayinkunatapis ushakätsishqa.Lapantami juchutsir ushashqa.Judá nacioncho lapan murallashqa markakunatapis chipyaqmi juchutsishqa.Tsaynöpami mandaqkunata y mandäshiqkunatapis penqayman churashqa. ^Guímel ³ Chikimaqnintsi atacamaptintsipis Tayta Dios fiyupa rabyashpanmi soldäduntsikunata mana yanapashqatsu.Tsaynöpami lapan soldäduntsikunatapis elqätsishqa.Nina rupar chipyaq ushaqnömi Israel runakunata ushakätsishqa. ^Dálet ⁴ Contrantsinömi Tayta Dios flëchakunanta shumaq tsutarkur flëchamashqantsi.Lapan kuyaylapaq kaqkunatapis chikimaqnintsinömi chipyaq ushakätsishqa.Rabyaynin ninano kaptinmi pasaypa ushakätsimashqantsi. ^He ⁵ Chikimaqnintsinömi Israel nacionnintsita Tayta Diosqa ushakätsishqa.Palaciuntsikunatapis lapantami juchutsishqa.Amparakunantsi murallashqa markantsikunatapis lapantami ushakätsishqa.Kuyaylapaq Judácho taq runakunatapis fiyupa lakikuymanmi churashqa. ^Vav ⁶ Tsuklata ushakätsiqnömi templuntapis Tayta Dios ushakätsishqa.Ushakätsiptinmi pipis mana kannatsu Sióncho fiestakunata rurananpaq ni jamay junaqkunacho jamananpaqpis.Fiyupa rabyar castigaptinmi reypis y cürakunapis ushakashqa. ^Zayin ⁷ *Altarninta y templuntapis Tayta Dios manami rikaytapis munannatsu.Marka murällakunatapis contrantsipa makinmanmi kachaykushqa juchutsinanpaq.Tsaymi TAYTA DIOSPA templunman yaykur fiestata ruraqnöraq taluypa talur qaparashqa.* ^Jet ⁸ Kikin TAYTA DIOSMI kamakätsishqa Siónpa murällankunata juchutsipäkunanpaq.Juchutsinanpaq wilanakushqannölami chipyaq ushakätsishqa.Kananqa Jerusalénpa murällankunapis jiruruypami juchutsishqa kaptinmi rumikunalana qoturpaykan. ^Tet ⁹ Markaman yaykuna punkunkunapis manami kannatsu.Trancankunapis pakir ushashqami jitarpaykan.Mandamaqnintsi reytapis y autoridänintsikunatapis juk lädu nacionkunamanmi prësu apakärishqa.TAYTA DIOSPA leyninkunata yachatsiq runakunapis manami kannatsu.Profëtankunatapis TAYTA DIOS manami revelannatsu.* ^Yod ¹⁰ Sióncho mayor runakunapis upälalami pampacho jamarpaykan.Pasaypa lakikurmi lütu röpata jatikurkur umanman alpata winakurkaykan.Jerusaléncho taq jipashkunapis pasaypa lakikushpanmi urkunta pampaman töpatsirraq lätarpaykan. ^Caf ¹¹ Waqaylawanmi nawïpis tsakaykanna.Qasqüpis* fiyupami nanaykan.Marka mayïkuna nakarkaykaqta rikarmi shonqüpis nanayparaq lakikun.Chuchuykaq wamrakuna cällicho yarqaypita wanurkaykaqta rikarmi pasaypa lakikü.* ^Lámed ¹² Tsay wamrakunami mamanta manakärin imalatapis qarananpaq.Imapis mana kaptinmi mamanpa melqaynincho wanurkaykan.Guërracho pelyaq runakunanömi Jerusalén cällikunacho wanurkaykan. ^Mem ¹³ *Sión, pasaypa nakaykaptikiqa ¿imataraq nïman?Kayjinanpa nakaykashqaykita ¿imamanraq tinkutsïman?¿Imaman tinkutsiypa parlaparraq qamta shoqäman?Juchu aywashqannöraqmi desgracia pasashushqanki.Tsayno kaykaqta rikarpis manami pipis yanapashunkitsu. ^Nun ¹⁴ “Tayta Diosmi revelamashqa” nir profëtaykikuna wilashushqaykipis manami rasunpatsu kashqa.Rasunpa profëta karqa jutsa rurashqaykita kacharinaykipaqmi wilashunkiman karqan.Jutsa rurashqaykita kachariptikiqa manami juk nacionman prësu apashunkimantsu karqan.Rasun kaqta wilashunaykipa trukan manakaqkunatami criyitsishushqanki.* ^Sámej ¹⁵ Nänipa pasaqkunapis kushipäshushpaykimi makinta paqchipäshunki.Manakaqman churashushpaykimi shukar umanta awirraq kayno nishunki:“¡Atatalay! ¿Taqaychi wakin markapitapis mas kuyaylapaq karqan?¿Taqay markapitachi maytsaychöpis runakuna kushikärirqan?” ^Pe ¹⁶ Lapan chikishuqnikikunami wasaykita rimapäkun.Kirunta uchurraqmi rabyapäshushpayki kayno nipäkun:“Aliraqshi chipyaq ushakätsishqantsi.Tsayno ushakätsiytami munarqantsi.Kananqa munashqantsinömi rurashqantsi”. ^Ayin ¹⁷ Yarpashqannölami TAYTA DIOS castigamashqantsi.Lapan nishqankunatami cumplishqa.Nawpapita patsa yarpashqannölami Jerusalénta mana kuyapaypa ushakätsishqa.Chikimaqnintsikuna kushipämänantsipaq y makincho tsararämänantsipaqmi kamakätsishqa.* ^Tsade ¹⁸ *Sión, yanapashunaykipaq Tayta Diosta ruwakuy.Tsakaypapis junaqpapis weqiki yakunöraq aywatsun.Mana chawaypa nawikipis pukayashqanyaq waqay. ^Qof ¹⁹ Tsakaykunapapis makikita choqpakurkur TAYTA DIOSTA ruwakuy.Lakikuykashqaykitapis lapan shonquykiwan waqapar wilapay.Yarqaypita wamraykikuna cällikunacho mana wanunanpaq makikita joqarkur ruwakuy. ^Resh ²⁰ TAYTA DIOS, ima pasarkaykämashqantapis tantiyaykulay.¿Alitsuraq kaykan kuyar ashmashqan wawankunata warmikuna mikushqan?¿Alitsuraq kaykan cürakunata y profëtakunata templucho wanutsipäkushqan?* ^Sin/Shin ²¹ Wamrakunapis awkinkunapis cällikunachömi wanushqa jitarpaykan.Mözukunata y jipashkunatapis espädawanmi wanutsishqanki.Pasaypa rabyashpaykimi mana kuyapaypa wanutsishqanki. ^Tav ²² Tukuy niraq nakaykuna kananpaqmi kamakätsishqanki.Fiestaman runakuna maytsaypitapis shamuqnöraqmi nakaykuna chayamushqa.Rabyakur castigaptiki manami juklaylapis kawaykar quëdashqatsu.Wamra kashqanpita ashmashqäkunatapis conträkunami chipyaq wanutsipäkushqa.

Ichic wilacuycuna

^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).

^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).

^ 2.7 Eze. 24.21.

^ 2.7-9 Sal. 74.3-9; Eze. 7.26.

^ 2.11 Lam. 3.48-51.

^ 2.11 Wakin runakunaqa pëchüpis nipäkun.