Job 2:1-13
2 Tsaypitanami Tayta Diospa nawpanman *angilkuna yapay aywapäkurqan. *Satanáspis paykunawanmi TAYTA DIOS kaqman aywarqan.
2 Tsaymi Satanásta TAYTA DIOS kayno tapurqan: “¿Maypitataq shamushqanki?”
Tsaymi kayno nirqan: “Intëru patsata rikapakur purimushqäpitami shamushqä”.
3 Tsawraqa TAYTA DIOS kayno nirqan: “Sirvimaqnï Job noqa munashqäno kawashqanta ¿rikashqankiku? Paynöqa manami pipis kantsu alilata ruraq, munashqäno kawaq, ali sirvimaq y ima jutsatapis mana ruraq. Jutsaynaq kaykaptinpis qam nimashqanki tsurinkunata y imaykankunata ushakätsinäpaq. Ushakätsiptïpis noqalamanmi yärakaykäman”.
4 Tsayno niptinmi Satanás kayno nirqan: “Sänu karqa lapanchöpis Job cäsukushunkimi. Vïdanta salvanan raykuqa qamtapis ñëgashunkimi.
5 Maski kikinta qeshyawan nakatsiptikiqa ñëgashunkipaqmi”.
6 Tsawraqa Satanásta TAYTA DIOS kayno nirqan: “Qampitachari imata ruraptikipis. Itsanqa ama wanutsiytsu”.
7 Tsayno niptinmi TAYTA DIOSPA nawpanpita yarqur Satanás aywakurqan. Nirkurna chaki puntanpita hasta uma pukshunyaq* mantsariypaq qarachuwan Jobta qeshyatsirqan.
8 Tsaymi pasaypa sheqshipäkur uchpa jananman jamaykur manka pakipawan Job aspikurqan.
9 Tsawraqa warmin kayno nirqan: “¿Tsaynölaku Diosman yärakuykanki? ¡Tayta Diosta maldicionarkur wanukuy!”
10 Tsayno niptinmi Job kayno nirqan: “¿Imanirtaq upa warmikuna parlapäkushqanno parlaykanki? Tayta Diospita bendicionta chaskir payman yärakushqantsino ¿manaku desgracia pasamaptintsipis payman yärakushwan?”
Tsayno desgracia pasaptinpis Jobqa manami imatapis lutanta rimarqantsu.
Jobpa amïgunkuna watukuq aywashqan
11 Jobpa kimsa amïgunkunami karqan Elifaz, Bildad y Zofar. Elifaz karqan Temán partipitami. Bildad karqan Súa partipitami. Zofarnami karqan Naamat partipita. Jobta desgraciakuna pasashqanta y pasaypa qeshyaykashqanta mayaykurmi wilanakurkur aywapäkurqan shakyätsinanpaq.
12 Karupita rikaptinqa mana reqiypaqmi Job karqan. Pay kashqanta reqiykurmi pasaypa waqapäkurqan. Röpantapis rachirmi alpata janapa jitapäkurqan umankunaman shikwamunanpaq.
13 Nirkurmi Jobpa nawpancho jamakärirqan qanchis junaq qanchis tsakay. Tsaycho jamarparpis Job pasaypa nanaywan nakaptin ima niytapis manami kamäpakärirqantsu.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 2.7 Wakin runakunaqa uma jirkanyaq nipäkun.
