Job 14:1-22
14 “Runaqa walka watalami kawan.Kawashqanyaqqa fiyupami nakan.
2 Wayta shushur ushakashqannölami ushakan.Lantuy pasashqannölami pasaqla kaykan.*
3 Tsayno kaykaptinqa ¿imanirtaq imata rurashqantapis juzgaykanki?
4 ¿Piraq *impüruta püruyätsinman?Tsaynölami runapis pasaypa jutsaynaq kayta kamäpakuntsu.
5 “Runataqa ayka wata kawananpaqpis qammi destinashqanki.Imay junaqyaq kawananpaqpis qammi nishqanki.Ayka wata kawananpaq nishqaykipita mastaqa manami pipis kawanqatsu.
6 Tsayno kaykaptinqa jawkala kawakunanpaq amana castigaykuynatsu.Mana castigaptikiqa arupakuq runa päguta chaskir kushikushqannömi jawka täkur kushikunqa.
7 “Yöraqa mutuptin yapaymi tsintsimur winan.
8 Sapin awkisyaptin y troncun ismuykaptinpis
9 yaku ushmapaptinqa yapaymi tsintsimun.Rämankunapis loqluypa loqlumi winan.
10 Runami itsanqa wanur ushakan.Wanuptinqa manami imaypis rikantsinatsu.
11 Usya witsan qocha tsakir ushakashqanno y raqrapa aywaq yaku tsakir ushakashqannömi
12 runapis wanur ushakan.Qepishtarpurnaqa imaypis manami kawarimunqatsu ni rikchamunqatsu.
13 “¡Alimi kanman rabyayniki pasashqanyaq wanushkunapa almankuna kaykashqanman kachaykamaptiki!¡Alimi kanman tsaypita kawaritsimänaykipaq diyata jitapämaptiki!
14 Runaqa wanushpan ¿kawarimunqatsuraq?Kawarimunäpaq kaptinqa kay patsacho mayjina nakarpis tsay junaqta shuyarämanmi.
15 Tsawraqa qayamaptiki contestamushaq.Kamamaqnï kaykarqa shumaqmi rikamankipaq.
16 Tsay höraqa manami castigamankipaqnatsu, sinöqa lapan desgraciapitami tsapämankipaq.
17 Ima qanratapis jitarir qonqaykuqnömi jutsa rurashqäkunatapis qonqankipaq.Lutanta rurashqäkunapitapis perdonamankipaqmi.
18 “Tsayno kaptinpis runaqa manami kawarimuntsu.Jirkakunata juchutsishqaykino,qaqakunata partir kuchpatsishqaykino,
19 rumita yakuwan qollushyätsishqaykinoy loqla aywananpaq tamyatsishqaykinömiruna yarpashqankunatapis ushakätsinki.
20 Ushakätsiptikiqa runa manami imaypis kutimunqanatsu.Pamparaykashqanchömi ismutsinki.
21 “Wanukurqa tsurinkunata runakuna aliman churashqantapis manami musyanqatsu.Tsurinkunata ima desgracia pasashqantapis manami mayanqatsu.
22 Tsaypa trukanqa kikin nanapäkushqalantami mayanqa.Tsaynöpis kikilanpaqmi lakikunqa”.
Ichic wilacuycuna
^ 14.1-2 Sal. 39.4-6; 102.11; 109.23; Ecl. 6.12.
