Hechos 11:1-30
11 Mana Israel runakunapis Tayta Diospa wilakuyninta chaskikärishqantami *apostolkuna y Judea provinciacho wawqi panikunapis mayapäkurqan.
2 Tsaymi Jerusalénman Pedro kutiykuptin *señalashqa kaq wakin wawqikuna jamurpar
3 kayno nipäkurqan: “¡Imanirtaq mana Israel runakunapa wayinman yaykur paykunawan mikushqanki!”
4 Tsayno niptinmi Pedruqa ima pasashqantapis wilapar kayno nirqan:
5 “Jope markacho Tayta Diosta manakuykashqächömi revelacioncho rikarqä jana patsapita chuskun puntanpa watashqa jatunkaray jaku niraq uraykämuqta.
6 Tsaycho shumaq tantiyaykunäpaqmi kaykarqan tukuy casta ashmana kaq y mana ashmana kaq uywakuna, lashtaypa puriqkuna y päriqkunapis.
7 Tsayta rikaraykaptïmi jana patsapita kayno nimurqan: ‘Pedro, tsaykunata pishtarkur mikuy’.
8 “Tsayno nimaptinmi kayno nirqä: ‘Manami tsaykunata mikümantsu, Tayta. *Impüru uywakunataqa manami imaypis mikushqätsu’.
9 “Tsawraqa jana patsapita yapay kayno nimurqan: ‘Mikunaykipaq püru kashqanta Tayta Dios niykäshuptikiqa impüru kashqanta ama niytsu’.
10 Tsay revelacionta kimsa kuti rikarkatsimarmi jakuta jana patsapa kutitsikurqan.
11 “Tsay hörami Cesarea markapita kachamushqan kimsa runakuna ashimashpan patsaraykashqä wayiman chayapäkamurqan.
12 Tsawraqa Espíritu Santu nimarqan mana mantsakuypa paykunawan aywanäpaq. Tsayno nimaptinmi kay soqta wawqikunawan aywar qayatsimaq runapa wayinman yaykurqä.
13 Tsaychömi wilamarqan wayincho juk ángel yuriparkur kayno nishqanta: ‘Simón jutiyuq runata pushamunanpaq Jope markaman kachakuy. Paypa jukaq jutinmi kaykan Pedro.
14 Paymi tantiyatsishunki qam y wayikicho taqkuna imanöpa salvakärinaykipaqpis’.
15 “Tsaycho wilapayta qalaykuykaptïmi noqantsiman chayamushqannöla paykunamanpis Espíritu Santu chayashqa.
16 Tsaychömi yarparkurqä Señornintsi kayno nishqanta: ‘Juanqa yakulawanmi bautizarqan. Qamkunami itsanqa Espíritu Santuwan bautizashqa kankipaq’.*
17 Señor Jesucristuman yärakuptintsi Espíritu Santuta qaramashqantsinömi* paykunatapis Tayta Dios qarashqa. Tsayno kaykaptinqa ¡noqa pitaq kä Tayta Diosta michänäpaq!”
18 Tsawraqa Pedruta jamurpänanpa trukanqa kushikärishpanmi kayno nipäkurqan: “¡Mana Israel runakunatapis Tayta Dios tantiyaykätsinmi jutsa ruraykunata kacharir *mana ushakaq kawayta taripäkunanpaq!”
Antioquíacho Jesucristuta runakuna chaskikushqan
19 Estebanta wanuykatsiptin Jerusalénpita qeshpikuqkunami Feniciaman, Chipriman y Antioquíaman* chayaykur Israel mayinkunalata ali wilakuyta wilaparqan. Mana Israel runakunataqa manami pitapis wilaparqantsu.
20 Chipripita y Cirenipita kaq wakin wawqikunami itsanqa Antioquíaman chayaykur mana Israel runakunatapis Señor Jesucristupa ali wilakuyninta wilaparqan.
21 Tsayno wilakunanpaq Tayta Dios yanapaptinmi tsaytsika runakuna Jesucristuta chaskikärirqan.
22 Tsayta mayashpanmi Jerusaléncho kaykaq wawqi panikuna Bernabéta Antioquíaman kacharqan.
23 Tsaycho mana Israel runakunatapis Tayta Dios kuyapashqanta rikarmi Bernabé pasaypa kushikurqan. Tsawraqa paykunata shakyätsirqan shumaq cäsukur Tayta Diosman imaypis yärakärinanpaq.
24 Bernabéqa ali runami karqan. Tsaynöpis Tayta Diosman yärakur Espíritu Santupa munayninchömi imaypis kawaq. Tsaycho yachatsiptinmi tsaytsika runakuna Señor Jesucristuta chaskikärirqan.
25 Tsaypitanami Bernabéqa Tarso markaman aywarqan Saulo ashiq.
26 Tariykurnami Antioquíaman kutipäkushpan wawqi panikunawan Sauluwan Bernabé juk wata juntakarqan. Tsaychömi atska runakunata yachatsipäkurqan. Antioquíachöraqmi Jesúspa discïpulunkunata* cristiänu niyta qalaykurqan.
27 Tsay witsanmi Jerusalénpita Antioquíaman profëtakuna aywapäkurqan.
28 Tsaychömi Espíritu Santu tantiyatsiptin profëta Agabo* wilakurqan maytsaychöpis pasaypa muchuy kananpaq kashqanta. Wilakushqannölami muchuy karqan Romacho Claudio *César mas mandaq kashqan witsan.
29 Muchuy kananpaq wilakuptinmi discïpulukuna wilanakurqan imatapis kashqanpita shuntarkur Judeacho kaq wawqi panikunaman apatsinanpaq.
30 Wilanakushqanno shuntarkurmi Bernabéta y Sauluta kacharqan Judeacho kaq *mayor wawqikunaman apananpaq.
Ichic wilacuycuna
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 11.17 Wakin runakunaqa regalamashqantsinömi nipäkun.
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 11.19 Hech. 8.1-4.
^ 11.26 Discïpulukunapaq parlarqa Jesucristuta chaskikuqkunapaqmi parlaykan.
^ 11.28 Hech. 21.10.
^ César Césarqa manami runapa jutintsu karqan, sinöqa Roma nacioncho mandaq rey ninanmi. Césarqa Romapita patsami atska nacionkunata mandarqan. Jesucristo yurishqan witsan mandaq kaykarqan Augusto Césarmi (Luc. 2.1). Paymi Herodesta churarqan Israel nacioncho rey kananpaq. Augusto Césartami trukarqan Tiberio César. Tiberio César mandaq karqan Bautizaq Juan wilakunan witsanmi (Luc. 3.1). Tiberio Césartanami trukarqan Calígula César. Paytanami trukarqan Claudio César. Claudio César mandaq kaykaptinmi apóstol Pablo wilakur purirqan (Hech. 11.28; 18.1). Claudio Césartanami trukarqan Nerón César. Nerón César mandaq kaykaptinmi apóstol Pablo Romacho wanurqan (Juan 19.12).
^ mayor wawqi Mayor wawqikunaqa iglesiacho yachatsiqkunami kaykan (1Tim. 3.2). Bernabéwan apóstol Pablumi mushuq iglesiakunacho mayor wawqikunata churapäkurqan (Hech. 14.23). Apóstol Pedrumi wilamantsi wawqi panikunata imano rikananpaq kashqantapis (1Ped. 5.1-4). Wawqi panikunata imano rikashqanpitami mayor wawqikuna Tayta Diosta cuentata qonqa (Heb. 13.17). Mayor wawqikuna imano kawananpaq kashqantapis Bibliachömi wilamantsi (1Tim. 3.2-7; Tito 1.5-9). Mayor wawqi kananpaq pitapis manaraq churar imano kawashqantapis shumaq musyashun (1Tim. 5.22).
