Hebreos 5:1-14
5 Mandaq cürataqa Tayta Diosmi akran tsaki mikuy ofrendakunata y sacrificiukunata *altarcho rupatsiptin jutsankunapita runakuna perdonashqa kananpaq.
2 Cüraqa runala kar imachöpis jutsata rurarmi runa mayinkuna mana tantiyakuypa jutsata ruraptin kuyapan.
3 Tsaymi kikinpa jutsankunapita y runa mayinkunapa jutsankunapitapis sacrificiuta rupatsin.*
4 Kikinpa munaynilanpitaqa manami pipis mandaq cüra kananpaq yaykuntsu. Tsaypa trukanqa mandaq cüra kananpaq pipis yaykun Tayta Dios churaptinraqmi. Aarónpis mandaq cüra karqan Tayta Dios churaptinraqmi.*
5 Manami Jesucristupis kikinpa munaynilanpitatsu mandaq cüra karqan, sinöqa Tayta Dios churaptinraqmi. Paytami Tayta Dios kayno nirqan: “Qamqa tsurïmi kanki. Kanan junaqpitaqa taytaykinami kaykä”.* *
6 Tayta Dios palabrancho mastapis kaynömi nirqan: “Qammi imayyaqpis Melquisedecno cüra kanki”.*
7 Jesucristo kay patsacho kawanan witsan waqapayparaq y qayakuyparaqmi Tayta Diosta manakurqan. Tsayno manakurqan wanuypita salvananpaq Tayta Dios munayniyuq kashqanta musyarmi. Tayta Dios nishqanta Jesucristo cumpliq kaptinmi ruwakushqanta mayarqan.
8 Tayta Diospa Tsurin karpis nakarraqmi cäsukuyta yachakurqan.* *
9 Tsayno yachakurmi munayniyuq kaykan payta cäsukuqkunata salvananpaq.
10 Tsaymi Tayta Dios payta churarqan Melquisedecno mandaq cüra kananpaq.
Qepaman mana kutiypa kawananpaq yätsishqan
11 Tsaypita tantiyatsinäpaqqa atskaraqmi kaykan. Tsayno kaptinpis sasataraq tantiyaptikimi mastaqa yachatsishaykiraqtsu.
12 Kananyaqqa maynami yachatsikuqna karkaykankiman. Tsayno kaptinpis yapay qalaykunanpitaraqmi yachakuyta munarkaykanki. Pishi wamra mikuyta manaraq yachakur lëchilataraq upuqnömi karkaykanki.
13 Chuchuykaq wamrakunanömi mana tantiyakärinkiraqtsu Tayta Dios munashqano kawanaykipaq kashqanta.*
14 Qamkunaqa mikuyta mikuqnöna kapäkunkiman. Tsayno karqa ali kaqta y mana ali kaqta tantiyarmi Tayta Dios munashqanno kawapäkunkiman.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 5.5 Kanan junaqpitaqa taytaykinami kaykä nishqanqa manami puntata Tsurin mana kashqantatsu niykan, sinöqa Jesucristo Tayta Diospa Tsurin kashqanta tsay junaqpita musyatsishqantami niykan. Tsayno musyatsirqan wanushqanpita Jesucristuta kawaritsimurmi (Hech. 13.33).
^ 5.6 Sal. 110.4.
^ 5.8 Manami Jesucristo mana cäsukuq kashqantatsu kay textu niykan, sinöqa imano nakarpis Tayta Diosta cäsukunanpaq yachakushqantami niykan.
^ 5.7-8 Mar. 14.32-42; Juan 10.18; Fil. 2.8.
