Filipenses 3:1-21
3 Wawqi panikuna, Tayta Diospa makincho kawaykarqa kushikäriy. Noqa manami ajayätsu tsaylata yaparir yaparir qelqamurpis. Tsayno qelqamushqä qamkunapaq alimi kaykan.
2 Lutan yachatsikuqkunapita cuidakäriy. Tsay alqukunaqa kaynömi nirkaykan: “Tayta Dios salvashunaykipaqqa leyninkunata cumplir cuerpuykikunataraq *señalakäriy”.
3 Cuerpuntsita mana señalakurpis Espíritu Santu yanapamaptintsimi Tayta Diosta sirviqkunaqa shonquntsicho señalashqana kaykantsi.* * Manami leykunata cumplirraqtsu salvakuntsi, sinöqa Jesucristuman yärakurmi.
4 Leykunata cumplir salvakunantsi kaptinqa noqapis leykunata cumplirmi salvaküman karqan. Noqanöqa manami pipis leykunata cumplishqatsu.
5 Leykuna nishqannölami yurishqäpita pusaq junaqniyuq kaykaptï señalamarqan.* Tsaynöpis Benjamín trïbupita kaq Israel runami kä.* Manami mayqan hebreo mayïpis noqanöqa leykunata cumplishqatsu. *Fariseo karmi Tayta Diospa leyninkunata imaypis cumplirqä.*
6 Tayta Dios munashqanno ruraykashqäta yarparmi Jesucristuman yärakuqkunatapis qatikachaq kä.* Tsay leykuna nishqanta lapantami cumplishqä.
7 Tsayno cumplirmi yarparqä alita ruraykashqäta. Kananmi itsanqa noqantsi rayku Jesucristo wanushqanta musyar tantiyakü tsay cumplishqäkuna manakaqlapaq kashqanta.
8 Señornï Jesucristuta *reqishqämanqa manami imapis tinkuntsu. Tsaymi nawpata rurashqäkunaman yärakunäpa trukanqa Jesucristulaman yärakü. Nawpata rurashqäkunaqa manami imapaqpis välimantsu.
9 Manami leyninkunata cumplishqäpitatsu munashqanta ruraqtano Tayta Dios chaskimashqa, sinöqa Jesucristuman yärakushqäpitami.
10 Jesucristuta masmi reqiyta munä. Payta Tayta Dios munayninwan kawaritsimushqanno noqatapis tsay munayninwan yanapamänantami munä. Tsaymi Jesucristo nakashqanno nakarpis y payta wanutsishqanno wanutsimaptinpis pay cäsukushqanno noqapis cäsukushaq.
11 Tsaymi shuyaraykä Jesucristuta Tayta Dios kawaritsimushqanno noqatapis wanuptï kawaritsimänanta.
Tayta Dios munashqanno kawanantsipaq nishqan
12 Manami jutsaynaq ni *santuna kashqätatsu niykä, sinöqa Jesucristo munashqanno kawanäpaqmi waran waran yarpachakuykä. Tsayno kawanäpaqmi Jesucristo salvamashqa.
13 Wawqi panikuna, manaraqmi Tayta Dios munashqannötsu lapanta ruraykä. Tsayno karpis unay kawashqäta yarparänäpa trukanqa waran waranmi yarpachakuykä Tayta Dios munashqanno kawanäpaq.
14 Premiuta chaskinanpaq yalinakur cörriqnömi noqapis Tayta Diospa nawpanman chayanäpaq pay munashqanno kawaykä. Tsayman chayanäpaqmi Jesucristuwan Tayta Dios qayamashqa.
15 Jesucristuman shumaq yärakuqkuna, nishqäkunata tantiyakäriy. Tantiyayta mana kamäpakuptiki Tayta Diosmi qamkunata tantiyatsishunki.
16 Imano kaptinpis Jesucristo munashqanno kawashun [y juk yarpayla kashun.]
17 Wawqi panikuna, imano kawashqätapis rikakäramay.* Noqakuna kawashqäno kawaqkunapitapis yachakäriy.
18 Wakin runakunaqa mana ali kawarmi Jesucristo cruzcho wanushqanta manakaqman churapäkun. Tsayno kashqanta atska kutinami qamkunata nishqä. Kananpis waqarmi wilapaykä.
19 Tsay runakunaqa Jesucristo munashqanno kawananpa trukan kikinkuna munashqannömi kawarkaykan. Lutankunata rurashqanpita penqakunanpa trukanqa sumätsinraqmi. Kay patsacho kawanalanpaqmi yarpachakärin. Paykunaqa infiernuman qaykushqami kanqapaq.
20 Noqantsipa markantsimi itsanqa gloriacho kaykan. Tsaymi salvamaqnintsi Señor Jesucristo gloriapita kutimunanta shuyäkuykantsi.
21 Payqa lapanpaq munayniyuq karmi kay ushakaq cuerpuntsita mushuq cuerpuman tikratsinqa. Tsay mushuq cuerpuntsimi kikinpa cuerpunno mana ushakaq kanqa.*
Ichic wilacuycuna
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ 3.3 Cuerpunta señalar chiwlakunanpa punta qaranta kutsurir jorqushqannömi shonqunta señalar jutsa rurayta kacharin.
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ 3.5c Hech. 23.6; 26.5.
^ 3.6 Hech. 8.3; 9.1-2; 22.4; 26.9-11.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 3.17 1Cor. 4.16; 11.1.
