Ezequiel 3:1-27
3 Tsawraqa Tayta Dios kayno nimarqan: “Runapa tsurin, kay qelqashqa rölluta mikuy. Nirkur Israel runakunata wilakuynïta wilapänaykipaq ayway”.
2 Tsaymi äyarkuptï amupämarqan qelqashqa rölluta.
3 Nirkur kayno nimarqan: “Runapa tsurin, saksashqaykiyaq kay rölluta mikuy”. Mikuptïmi abëjapa mishkinnöraq mishkirqan.*
4 Tsaypitanami kayno nimarqan: “Runapa tsurin, imata nishqätapis Israel runakunata aywaykur wilapay.
5 Manami mana tantiyashqayki idiömata rimaqkunamantsu kachaykä, sinöqa Israel mayikikunamanmi.
6 Manami juk idiömakunata rimaq nacionkunamantsu kachaykä ni mana tantiyashqayki rimaqkunaman aywanaykipaqtsu niykä. Juk nación runakunaman kachaptïqa nishqaykikunata cäsukushunkimanmi.
7 Israel runakunami itsanqa parlapashqaykita tantiyaykarpis mana cäsukushunkitsu. Pasaypa rumi shonqu karmi tantiyatsiptïpis mana chaskikamantsu.
8 “Tsaymi qamta churashayki paykuna mana cäsukuptinpis wilapänaykipaq.
9 Diamanti rumi fuerti kashqanno fuerti kanaykipaqmi yanapashayki. Fiyupa rabyaptinpis mana cäsukuq runakunata ama mantsakuytsu”.
10 Tsaypitanami kayno nimarqan: “Runapa tsurin, nishqäkunata shumaq tantiyakur shonquykiman churakuy.
11 Nirkur Babiloniaman apapäkamushqan marka mayikikunata wilakuynïta wilapay. Cäsukunan o mana cäsukunan kaptinpis noqa TAYTA DIOS nishqäta paykunata wilapay”.
12 Tsaypita TAYTA DIOSPA Espïritun joqarkamaptinmi mayarqä qepächo fuertipa kayno nimuqta: “¡Munayniyuq Tayta Dios tashqancho alabashqa kaykulätsun!”
13 Runa niraqkunapa älankuna sapsapyashqan y ruëdankuna jaqrarashqanpis patsa siksikyar bunrurushqannöraqmi mantsakuypaq mayakarqan.
14 Tsaypitanami TAYTA DIOSPA Espïritun joqarkamar apakamarqan. Munayninwan apaykämaptinpis fiyupa rabyashqami aywaykarqä.
15 Nirkurmi Tel-abibcho kaykaq Quebar mayu kuchuncho taykaq Israel mayïkunaman chayatsimarqan. Pasaypa upatakashqa karmi qanchis junaq tsaycho paykunawan jamararqä.
Markapa rikachakuqninno kananpaq Ezequielta churashqan
Ezequiel 33.1-9
16 Qanchis junaq pasarkuptinmi TAYTA DIOS kayno nimarqan:
17 “Runapa tsurin, Israel mayikikunapa rikachakuqninno kanaykipaqmi qamta churashqä.* Ima nishqätapis jukla paykunata wilanki.
18 Jutsa ruraq runa wanunanpaq kashqanta niptï tsay runa jutsanpitami wanunqa. Payta mana yätsir ni jutsa rurayta kacharinanpaq mana wilaparqa wanushqanpita qammi jutsayuq kankipaq.
19 Jutsa rurayta kacharinanpaq niykaptikipis jutsa rurayta mana kacharir wanuptinqa manami jutsayuqnatsu kankipaq.
20 “Tsaynöpis jutsata mana ruraq runa jutsa rurayman churakaptin jutsankunata kacharinanpaq tantiyatsishqäta mana cäsukurqa jutsata rurashqanpitami wanunqa. Alikunata rurashqankunapis manakaqlapaqmi kanqa. Itsanqa jutsa rurayta kacharinanpaq mana wilaparqa wanushqanpita qammi jutsayuq kankipaq.
21 Jutsata mana rurananpaq tsay runata wilapaptiki jutsa rurayta kacharirqa manami wanunqanatsu. Qampis mananami jutsayuqnatsu kankipaq”.
Wayincho Ezequiel wataränanpaq nishqan
22 Tsaypitanami TAYTA DIOS yataykamar kayno nimarqan: “Imata ruranaykipaq kaqtapis ninäpaq jäkuq jirkapa jukla ayway”.
23 Nimaptinmi jäkuq jirkapa jukla aywar Quebar mayu kuchuncho rikashqänöla TAYTA DIOSPA chipchipyayninta yapay rikarqä. Tsayta rikarmi pasaypa mantsakur pampaman jukla lätakuykurqä.
24 Tayta Diospa Espïritun noqaman yaykamurnami ichirkatsimar kayno nimarqan: “Wayikicho wichqakarkamur mana yarquypa täkuy.
25 Tsaychömi waskawan liyashuptiki mana yarqunkinatsu ni Israel mayikikunawanpis purinkinatsu.
26 Parlayta mana kamäpakunaykipaqmi qalluykita jaqruykiman* laqakätsishaq. Tsaymi kay mana cäsukuq runakunata yätsiyta kamäpakunkipaqnatsu.
27 “Parlapashqä höranami shimiki pashtanqa. Tsaymi paykunata wilanki noqa TAYTA DIOS imata niykashqätapis. Cäsukamayta munaq kaqqa cäsukamätsun. Cäsukamayta mana munaq kaqqa ama cäsukamätsuntsu. Kay runakunaqa pasaypa mana cäsukuqmi karkaykan.
Ichic wilacuycuna
^ 3.1-3 Jer. 15.16; Apoc. 10.9-11.
^ 3.17 Isa. 21.6, 11; Jer. 6.17; Ose. 9.8.
^ 3.26 Wakin runakunaqa palagarnikiman nipäkun.
