Ezequiel 25:1-17
25 Tsaypitanami TAYTA DIOS kayno nimarqan:
2 “Runapa tsurin, Amón nación runakuna* kaykashqan kaqpa rikärir paykunata ima pasananpaq kaqtapis wilapar
3 kayno ninki: ‘¡TAYTA DIOS nishushqaykita mayapäkuy! Paymi kayno nishunki: Templüta ushakätsiptin “benëchu” nirmi qamkuna kushikärishqanki. Tsaynöpis kushikärishqanki Israel nacionta asular Judá runakunata juk lädupa apakäriptin.
4 “ ‘Tsayno kapäkushqaykipitami kacharishayki inti jeqamunan kaq läducho taq runakuna shamur vincishunaykipaq. Paykunami toldunkunata ichitsishpan lapan murushqaykita mikupäkunqa y uywaykikunapa lëchintapis upukurkunqa.
5 Rabá markaykitami *camëllukunata mitsikunanman tikratsishaq. Wakin markaykikunatanami uyshakunata mitsikunan jirkaman tikratsishaq. Tsayraqmi TAYTA DIOS kashqäta tantiyakärinkipaq’.
6 “TAYTA DIOSMI kayno nin: ‘Amonita runakuna, makikikunatapis paqchirraq y saltakacharraqmi Israel runakunata ushakätsiptin kushipashqanki.
7 Tsaymi qamkunata jäpa nación runakunapa makinman entregaykuptï lapan imaykitapis apakärinqa. Chipyaq asulaptïmi nacionnikipis mana kanqanatsu. Tsayraqmi TAYTA DIOS kashqäta tantiyakärinkipaq’ ”.
Moab nacionpaq wilakushqan
8 “TAYTA DIOSMI kayno nin: ‘Seir nishqan Moab nación runakunami* Judá runakunata manakaqman churar wakin nacionkunanöla kashqanta nirkaykan.
9 Tsayno kashqanpitami Moab nación kuchuncho kaykaq Bet-jesimot markata, Baal-meón markata y Quiriataim kuyaylapaq markatapis jäpa runakuna atacar vincipäkunqa.
10 Inti jeqamunan kaq läducho taq runakuna Moab nacionta vincirkurmi amonita runakunatanöla makincho tsararanqa. Tsaynöpami moabita runakunapaqqa imaypis mana parlanqanatsu.
11 Moabita runakunata castigaptïraqmi TAYTA DIOS kashqäta musyapäkunqa’.
Edom nacionpaq wilakushqan
12 “TAYTA DIOSMI kayno nin: ‘Edomita runakunaqa* Judá runakunata mana kuyapaypa venganzata ashishpanmi pasaypa jutsata rurapäkushqa.
13 Tsayno kaptinmi noqa TAYTA DIOS kayno nï: Temán partipita Dedán partiyaqmi edomita runakunata uywantinta espädawan wanutsir ushanqa.
14 Tsayno asulananpaqmi kuyashqä Israel runakunata nishaq. Tsayraqmi pasaypa rabyar ushakätsikuq kashqäta edomita runakuna tantiyakärinqa’. TAYTA DIOSMI tsayno nin.
Filistea nacionpaq wilakushqan
15 “TAYTA DIOSMI kayno nin: ‘Filisteo runakuna unaypita patsa* nanapararmi Judá runakunata asulashqa’.
16 “Tsaymi TAYTA DIOS kayno nin: ‘Cereteo nishqan filisteo runakunata y lamar kuchuncho kaykaq markankunata chipyaqmi elqätsishaq.
17 Fiyupa rabyar mana kuyapaypa castigaptïraqmi TAYTA DIOS kashqäta musyapäkunqa’ ”.
Ichic wilacuycuna
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ 25.8-11 Isa. 15.1—16.14; 25.10-12; Jer. 48; Amós 2.1-3; Sof. 2.8-11.
