Ezequiel 1:1-28

GALAYCACHINAPAJ

1 Kimsa chunka (30) watayuq kaykarmi Quebar mayu kuchuncho Babiloniaman apashqan Israel mayïkunawan taykarqä. Wata qalaykushqanpita chusku killa pitsqa kaq junaqchömi jana patsa kichakaptin* imaypis mana rikashqäta TAYTA DIOS rikatsimarqan. ² (Tsay pasarqan Israel runakunata y rey Joaquínta Babiloniaman prësu apashqanpita pitsqa wataman aywaykaptinmi.* Chusku killa pitsqa kaq junaqchömi ³ Buzipa tsurin cüra Ezequielta TAYTA DIOS parlaparqan. Tsayqa karqan caldeo runakuna tashqan Babilonia* nacioncho Quebar mayu kuchunchömi.) ⁴ Tsaychömi rikarqä norti lädupita shukukuy wayra aywaykämuqta y pukutay yanawyaraykaqta. Tsay pukutaymi elquynöraq chipchipyaykarqan. Pukutay chawpinchömi nina atsikyaykarqan. Nina chawpinchönami broncinöraq fiyupa chipchipyaykarqan. ⁵ Tsay chipchipyaykaq chawpinchönami chusku runa niraqta rikarqä. ⁶ Itsanqa cada ünunmi chusku qaqlayuq y chusku älayuq karqan. ⁷ Chankankunaqa derëchulami karqan. Shillunkunanami becërrupa shillunno karqan. Lushukyätsishqa broncinöraqmi chakinkuna y shillunkuna chipchipyarqan. ⁸ Chuskun älankuna rurinchömi runapa makinno makinkuna karqan. Cada ünunmi chusku qaqlayuq y chusku älayuq karqan. ⁹ Älankunaqa jukninpa älanwanmi tinkurarqan. Mayqan lädupapis mana tikraylapami aywarqan. ¹⁰ Nawpa kaq qaqlankunami runapa qaqlanno karqan. Alawqa kaq qaqlankunami karqan leonpa qaqlanno. Itsuq kaq qaqlankunami karqan törupa qaqlanno. Qepanpa kaq qaqlankunanami karqan ankapa qaqlanno.* ¹¹ Tsaynömi qaqlankuna karqan. Cada ünunmi ishkay kaq älankunata altupa joqariptin wakin kaqpa älankunawan tinkurarqan. Mas ishkay kaq älankunanami cuerpunkunata tsaparaykarqan. ¹² Diospa Espïritun pushaptinmi qepapa mana tikrapakuypa aywarkaykarqan. ¹³ Runa niraq chusku älayuqkunaqa karqan shansha rawraykaqno* y oqsha atskiwan wak lädupa kay lädupa purirkaykaqnömi. Nina rupaykaqqa fiyupami chipchipyarqan. Elquypis ninapitami yarqamurqan. ¹⁴ Runa niraqkunata rikaykashqäkunaqa elquyno wak lädupa kay lädupami puripäkuq. ¹⁵ Runa niraqkunata rikaraykashqächömi rikarqä paykunapa chakincho chusku ruëdakuna pampacho kaykaqta. ¹⁶ Tsay chuskun ruëdakunaqa tsay niraqlami karqan. Crisólito ruminömi chipchipyarqan. Cada ruëda chawpinchömi juk ruëda cruzaypa churaraykarqan. ¹⁷ Tsay runa niraqkuna mayqan lädupa aywarpis manami tikrarqantsu. ¹⁸ Ruëdakunapa ärunmi mantsakuypaq jatunkaray karqan. Äru intërunpami atska nawikuna kaykarqan.* ¹⁹ Runa niraqkuna aywaptin ruëdakunapis aywaqmi. Pampapita altupa joqarikaptinqa ruëdakunapis joqarikaqmi. ²⁰ Diospa Espïritun pushashqan kaqpa runa niraqkuna aywashqan kaqpami ruëdakunapis aywaq. Tsayno karqan runa niraqkunacho y ruëdakunachöpis Diospa Espïritun kaptinmi. ²¹ Runa niraqkuna aywaptinqa ruëdakunapis aywaqmi. Mana aywaptinqa ruëdakunapis mananami aywaqtsu. Tsaynölami pampapita joqarikaptin tsay ruëdakunapis joqarikaq. Tsayno karqan runa niraqkunacho kaykaq Diospa Espïritun ruëdakunachöpis kaptinmi.* ²² Runa niraqkunapa uman jananpanami fiyupa atsikyaykaq espëjunöraq mashtaraykarqan.* ²³ Tsay mashtaraykaq rurinchömi runa niraqkuna älankuna mashtashqa kaykarqan. Tsayno kaptinmi wakin kaqpa älankunapa puntanman töparaykarqan. Ishkay kaq älankunanami cuerpunkunata tsaparaykarqan. ²⁴ Paykuna aywaptin älankuna sapsapyashqan fuertipami mayakarqan. Tsay karqan cargashqa mayu bunyaypa bunyar aywaqno, lapanpaq munayniyuq Tayta Diospa vozninno, tsaytsika runakuna rimamushqanno y atska soldädukuna qaparashqannömi. Aywarkaykashqancho ichikuykuptinqa älankunapis shuntakaqmi. ²⁵ Älankuna shuntashqa ichirpaykaptinmi jana patsapita fuertipa rimamuqta mayarqä. ²⁶ Runa niraqkunapa janan ciëluchönami rikarqä zafiro rumipitano rurashqa trönuta. Tsay trönuchömi juk runa niraq jamaraykarqan.* ²⁷ Tseqlanpita janaman walyashqa broncino chipchipyaykaqtami rikarqä. Tseqlanpita uramannami rikarqä nina rataykaqtano.* Intëru nawpanpanami fiyupa atsikyarqan. ²⁸ Tsay atsikyaqqa kaykarqan qori chirapacho turmanyuy shanshaypa shanshashqannömi. TAYTA DIOSPA chipchipyayninta rikaykurmi pampaman lätakuykurqä. Tsaychömi parlamuqta mayarqä.