Efesios 4:1-32
4 Tsayno kaykaptinqa Jesucristupa wilakuyninta wilakushqäpita prësu kashpä qamkunata ruwakü Tayta Dios munashqanno imaypis kawapäkunaykipaqmi. Tsayno kawapäkunaykipaqmi Tayta Dios qayashushqanki.
2 Mana yachaq tukuypa kawapäkuy, pïmaypaqpis ali shonqu kapäkuy y kuyanakur imapitapis pacienciakäriy.*
3 Espíritu Santu yanapashushqaykinöla yärakuq mayikikunawan juk shonqula jawka kawapäkuy.
4 Jesucristuman yärakuq kaqqa lapantsimi juk cuerpula kaykantsi.Juklaylami Espíritu Santupis.Juk salvacionlata chaskinantsipaqmi Tayta Dios qayamashqantsi.
5 Juklaylami Señornintsipis.Juklaylamanmi yärakuykantsi.Juklaylami *bautismu.
6 Juklaylami Tayta Diospis.Paymi lapantsipa Taytantsi,lapantsitami makincho tsararaykämantsi,lapantsitami yanapaykämantsiy lapantsiwanmi kaykan.
7 Juk cuerpula kaptintsipis juknintsi juknintsitami Jesucristo kuyakuq kar churamashqantsi payta sirvinantsipaq.
8 Tsaymi Tayta Diospa palabranchöpis kayno niykan:“Contrankunata vincirkurmi janaman witsarqan.Tsaypitanami runakunata yanapamurqan*”.*
9 Witsashqanta niptinmi tantiyantsi Jesucristo puntata kay patsaman shamushqanta.
10 Kay patsaman shamushqa karpis jana patsamanmi kutikushqa. Lapanpaq munayniyuq karmi lapantapis makincho tsararaykan.
11 Paymi wakinta churashqa *apóstol kananpaq, wakinta profëta kananpaq, wakinta ali wilakuyninta wilakunanpaq y wakintana pastor kar yachatsikuq kananpaq.
12 Paykunata Jesucristo churashqa yärakuq mayinkunata shakyätsir yachatsinanpaqmi. Tsayno yachatsiptinmi kamarikushqa karkaykanqa Tayta Dios munashqanta rurar Jesucristupa cuerpun iglesiata* lapanchöpis yanapananpaq.
13 Tsayno kaptinqa lapantsi juk shonqunöla kar y Tayta Diospa Tsurinman yärakur Jesucristo kawashqanno noqantsipis kawashun.
14 Tsayno kawarqa manami pishi wamranönatsu kashun pipis manakaqkunata yachatsir criyitsimänantsipaq. Tsaynöpis manami punshata wayra wakman kayman apashqannönatsu kashun.
15 Tsaypa trukanqa juknintsi juknintsipis kuyanakur rasun kaqlata imaypis parlashun. Tsaynöpami Jesucristo kawashqanno noqantsipis kawapäkushun.
Jesucristo umantsi kaptin
16 y noqantsi cuerpun kaptintsimi juknintsi juknintsi yanapanakunantsipaq churamantsi. Tsaymi moquntsikuna tsararänakushqanno yanapanakur* kuyanakunantsipaq tantiyakushun.
Mushuq kawayta chaskikushqantsi
17 Tsayno kaptinmi Señor Jesucristupa apostolnin kar qamkunata yätsï Tayta Diosta mana chaskikuq runakunano mana kawapäkunaykipaq. Paykunaqa toqshun tsakishqa karmi
18 lutankunata yarpachakurkaykan. Juiciuynaq karmi y shonqun chukruyashqa kaptinmi Tayta Dios munashqannöqa kawapäkuntsu.
19 Tsaymi mana penqakuypa shonqun munashqalanta rurarkaykan. Jukwan jukwan kakurmi tukuy niraq melanaypaq jutsata rurarkaykan.*
20 Qamkunaqa manami tsayno kawanaykipaqtsu Jesucristupa wilakuyninta yachakärishqanki.
21 Jesucristupa ali wilakuyninta rasunpa chaskikushqa kaykarqa y pay munashqanno kawanaykipaq yachakuykarqa
22 nawpata kawashqaykino amana kawapäkuynatsu, sinöqa makwa röpata jitariqno unay kawashqaykita jitarqäriy.* Nawpataqa alita rurashqaykita yarparmi lutan ruraykunaman umaykikuna churakashqa karqayki.
23 Kananqa Espíritu Santu tantiyatsishushqaykinöla kawapäkuy.
24 Tayta Dios kashqanno qamkunapis kanaykipaqmi mushuq kamashqa runana karkaykanki. Tsayno kaykarqa Tayta Dios munashqanno jutsaynaq kawanaykipaq mushuq kawaychöna kawapäkuy.*
25 Ama lulapänakuytsu.* Lapaykipis juk aylunöla kaykarqa* rasun kaqlata rimapäkuy.
26 Rabyakurpis jutsata ama rurapäkuytsu.* Qoyaytaqa ama rabyashqala kakäriytsu.
27 Rabyashqala karqa shonquykitami diabluta kichapaykanki.
28 Nawpata suwakushqa karqa amana suwakäriynatsu. Suwakunaykipa trukanqa arukäriy. Tsaynöpami imalaykipis kanqa waktsakunata yanapanaykipaq.
29 Ama imatapis lutankunata rimapäkuytsu. Tsaypa trukanqa runa mayikita shakyätsinaykipaq ali kaqkunalata rimapäkuy.
30 Lutankunata rurar Espíritu Santuta ama lakikatsiytsu. Paymi shonquykita sëllashushqanki* Jesucristo kutimunan junaq salvashqa kanaykipaq.
31 Pitapis ama nanaparaytsu, rabyapaytsu ni qayapaytsu. Pipa wasantapis ama rimapäkuytsu ni manakaqkunata parlapäkuytsu.
32 Tsayno kawapäkunaykipa trukanqa jukniki juknikipis kuyapänakur kawapäkuy. Jesucristo wanushqanpita Tayta Dios perdonashushqaykinöla perdonanakäriy.*
Ichic wilacuycuna
^ 4.2 Col. 3.12-13.
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ 4.8b Sal. 68.18.
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ 4.12 Jesucristupa cuerpunpaq parlarqa payman yärakuqkunapaqmi parlaykan (1Cor. 12.13; Efe. 1.23; 4.16; 5.23, 30; Col. 1.18).
^ 4.17-19 Rom. 1.21-25.
^ 4.30 2Cor. 1.22; Efe. 1.13.
