Apocalipsis 6:1-17
6 Tsaychömi rikarqä röllucho punta kaq laqaraykaq cërata Carnish jorquqta. Jorquriptinmi nawpancho kaq chusku kawaykaqkunapita juknin qayakamur kayno nimurqan: “¡Shamuy!”
2 Tsayno nimuptin rikärishqächömi yoraq cawalluta rikarqä. Muntaraqmi flëchan aptashqa kaykarqan.* Paymi corönata chaskirkur Tayta Diospa contran sharkuqkunata majaypa majar ushakätsinanpaq aywarqan.
3 Röllucho ishkay kaq laqaraykaq cërata Carnish jorquriptinmi nawpancho kaq chusku kawaykaqkunapita juknin qayakamur kayno nimurqan: “¡Shamuy!”
4 Tsayno nimuptinmi puka cawallu* yarqamurqan. Muntaraqmi jatun espädata chaskirkur aywarqan runakuna chikinakur kikinpura wanutsinakunanpaq.
5 Röllucho kimsa kaq laqaraykaq cërata Carnish jorquriptinmi nawpancho kaq chusku kawaykaqkunapita juknin qayakamur kayno nimurqan: “¡Shamuy!”
Tsayno nimuptin rikärishqächömi yana cawallu shamuqta rikarqä. Muntaraqmi balanzan aptashqa kaykarqan.*
6 Tsaymi tsay chusku kawaykaqkunapa chawpinpita kayno nimuqta mayarqä: “¡Muchuymi kanqa! Tsaymi juk junaq arur gänashqan aypanqa juk kïlu trïguta o kimsa kïlu cebädata rantinalanpaq. Muchuy kaptinpis aceitita y vïnutaqa ama ushakätsiytsu”.
7 Röllucho chusku kaq laqaraykaq cërata Carnish jorquriptinmi nawpancho kaq chusku kawaykaqkunapita jukninna qayakamur kayno nimurqan: “¡Shamuy!”
8 Tsayno nimuptin rikärishqächömi bäyu cawalluta rikarqä. Muntaraqpa jutinmi karqan Wanuy.
Paypa qepantanami *Hades shamurqan. Ishkanmi yarqupäkamurqan runakunata espädawan, muchuywan, qeshyawan y munti uywakunawan wanutsinanpaq. Tsaymi munayniyuq karqan pulanpa pulannin runakunata wanutsipäkunanpaq.*
9 Röllucho pitsqa kaq laqaraykaq cërata Carnish jorquriptinmi almakunata *altar chakincho kaykaqta rikarqä. Tsay almakuna karqan Diospa wilakuyninta cäsukushqanpita y Jesucristuman yärakushqanpita wanutsishqa runakunapa almankunami.
10 Paykunami qayakur kayno nipäkurqan: “Nishqaykikunata cumpliq *santu Tayta Dios, ¿imaytaq wanutsimaq runakunata juzganki?”
11 Tsayno niptinmi Tayta Dios kayno nirqan: “Shuyaykuyraq. Qamkuna wanushqaykinölami wakin yärakamaqkunapis wanupäkunqapaq”. Tsayno nirmi tsay almakunata yoraq röpata jatiparqan.
12 Röllucho soqta kaq laqaraykaq cërata Carnish jorquriptinmi patsa fiyupa siksikyarqan.* Tsay hörami rikarqä inti yanayar lütu tëla niraq rikakämuqta* y killapis yawar niraq rikakämuqta.
13 Fiyupa wayraptin hïgus shikwamuqnöraqmi qoylarkunapis jana patsapita shikwamurqan.
14 Jana patsapis rölluno luylukarkur luylukarkurmi elqakäkurqan.* Jirkakuna y lamarcho kaykaq islakunapis juk lädumanmi witikärirqan.*
15 Kay patsacho reykuna, rïcukuna, mandaq soldädukuna, ashmaykuna y wakin runakunapis qaqakunaman y machaykunamanmi pakakärirqan.*
16 Tsaychömi jirka puntakunata y qaqakunatapis kayno nipäkurqan: “¡Janäkunaman juchumuy!* ¡Trönucho jamaraykaqpis y Carnishpis fiyupa rabyashqami karkaykan! ¡Paykunapita pakaykalämay!
17 ¡Lapan runakunata castigananpaq kaq tiempu chayamushqanami! ¡Tayta Diospa castïgunta manami pipis awantanqatsu!”*
Ichic wilacuycuna
^ Hades Hadesqa jutsalancho wanuq runakunapa alman nakarkaykashqan sitiumi kaykan. Jesucristo kutimurmi wanuqkunata kawarirkatsimur (Juan 5.28-29; Hech. 24.15) Hadescho kaqkunata juzgar nina qochaman qaykunqapaq (Mat. 11.23; Luc. 16.23; Apoc. 20.14).
^ 6.8 Eze. 14.21.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 6.12a Apoc. 11.13; 16.18.
^ 6.14 Apoc. 16.20.
^ 6.15 Isa. 2.19, 21.
^ 6.16 Ose. 10.8; Luc. 23.30.
