Apocalipsis 4:1-11
4 Tsaypitanami rikarqä jana patsacho punku kicharaykämuqta. Tsay hörami nawpata mayashqänöla cornëta* waqamuqnöraq kayno nimaqta mayarqä: “Kayman witsämuy. Kananmi rikatsishayki ima pasananpaq kaqtapis”.
2 Jinan hörami Espíritu Santu rikatsimarqan jana patsacho kaykaq trönuta. Tsay trönuchömi juk jamaraykarqan.
3 Jamaraykaqqa jaspe rumino y cornalina ruminöraqmi chipchipyaykarqan. Jamakunan trönu jananpami esmeralda ruminöraq chipchipyaykaq turmanyuy tsutaraykarqan.*
4 Tsay trönutami tumapararqan ishkay chunka chusku (24) trönukuna. Tsay trönukunamanmi yoraq röpashqa y qori corönan jatishqa mayor runakuna jamakärirqan.
5 Chawpincho kaykaq trönupitami atsikyaqpa atsikyar elquy yarqamurqan. Räyupis bunruruypa bunrururmi mayakämurqan.* Trönupa nawpanchömi qanchis candelabrukuna rataykarqan.* Tsaykuna karqan Tayta Diospa qanchis espïritunkunami.*
6 Trönu nawpanpanami kuyaylapaq cristal vidriu niraq lamar rikakarqan.
Tsay trönu nawpankunapa tumaypami chusku kawaykaqkuna* kaykarqan. Paykunapami intëru cuerpuncho nawinkuna karqan.
7 Punta kaqmi karqan león niraq. Ishkay kaqnami karqan töru niraq. Kimsa kaqnami karqan runa niraq. Chusku kaqnami karqan päriykaq anka niraq.*
8 Tsay chuskun kawaykaqkuna karqan soqta älayuqmi. Tsaynöpis intëru cuerpunchömi nawinkuna karqan.*
Tsay kawaykaqkunami tsakaypa y junaqpapis kayno nipäkurqan:“¡*Santu, santu, santu!¡Lapanpaq munayniyuq Tayta Dios santumi kaykan!*¡Payqa unaypita kawaq, kananpis kaykaq y shamunanpaq kaqmi kaykan!”
9 Trönuncho jamaraykaq imayyaqpis kawaq Tayta Diosta tsayno adorashpan agradëcikur alabapäkuptinmi
10 tsay ishkay chunka chusku (24) mayor runakunapis imayyaqpis kawaq Tayta Diospa nawpanman lätakuykur adorapäkurqan. Corönankunata jorqurkurmi Tayta Diospa trönunpa nawpanman churaykushpan kayno nipäkurqan:
11 “Tayta Diosnilä, qamlami lapanpaq munayniyuq kaykanki.Qammi lapan imaykatapis kamashqanki.Kawayta qoshqaykipitami lapanpis kawarkaykan.Tsaymi lapanpis respitashushpayki alabapäkushunki”.
Ichic wilacuycuna
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 4.2-3 Eze. 1.26-28; 10.1.
^ 4.5a Éxo. 19.16; Apoc. 8.5; 11.19; 16.18.
^ 4.6 Eze. 1.13, 22.
^ 4.6-7 Eze. 1.5-10; 10.14.
^ 4.8a Eze. 1.18; 10.12.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 4.8b Isa. 6.2-3.
