Apocalipsis 2:1-29
2 “Éfeso markacho kaykaq *iglesiapa *angilninpaq kay nishqäta qelqay: Noqami alawqa kaq makïcho qanchis qoylarkunata tsararaykä. Qoripita rurashqa qanchis candelabrukunapa chawpinchömi purï.*
2 “Noqa rikaykämi imaypis yärakamar lapan rurashqaykikunata. Lutan yachatsikuqkunata manami chaskipashqankitsu. *Apóstol tukuqkunatapis lutanta yacharkaykätsiqtami taripashqanki.
3 Yärakamashqaykipita nakatsishuptikipis mana ajayaypami munashqäno kawarkaykanki.
4 “Itsanqa manami gustamantsu nawpata kuyakuq kashqaykino mana kuyakuq kashqayki.
5 Puntata kuyakuq kashqaykino kananpis kuyakuq kapäkuy. Tsayno mana kaptikiqa [elaqpita] shamurmi nawpächo kaykaq candelabruykita jorqurishaq.
6 “Tsayno karpis nicolaíta runakunapa costumbrinkunata* mana chaskipashpayki alitami rurarkaykanki. Paykuna yachatsishqankunata manami mayaytapis munätsu.
7 “Espíritu Santumi iglesiakunata tsayno niykan. Rinriyuq kaqkunaqa nishqäkunata wiyakäritsun. Imano nakarpis mana ajayaypa yärakamaqkunataqa Tayta Diospa nawpanchömi imayyaqpis kawatsikuq yörapa wayuyninta qarashaq”.*
Esmirna markacho kaykaq yärakuqkunapaq cartata apatsishqan
8 “Esmirna markacho kaykaq *iglesiapa *angilninpaq kay nishqäta qelqay: Noqami qalaykunan y ushanan kaykä. Wanushqäpitapis kawarimushqämi.
9 “Noqa rikaykämi [lapan rurashqaykikunata,] nakarkaykashqaykita y waktsa karkaykashqaykitapis. Waktsa karpis rasunpa rïcunömi karkaykanki. Tsaynöpis mayaykämi wasaykita rimarkaykashqanta. Wasayki rimaq runakunaqa ‘Tayta Dios kuyashqan Israel runami kapäkü’ niykarpis *Satanás munashqantami rurarkaykan.
10 “Qamkunaqa pasaypami nakapäkunkipaq. Tsayno kaptinpis ama mantsakäriytsu. Diablumi qepaman kutikärinaykita munar wakinnikita carcilman wichqatsishunki. Tsaychömi chunka junaq nakapäkunkipaq. Tsayno kaptinpis wanunaykiyaq mana ajayaypa noqaman yärakamay. Tsayno kaptiki corönatami qoykushayki. Tsay corönaqa *mana ushakaq kawaymi kanqa.
11 “Espíritu Santumi iglesiakunata tsayno niykan. Rinriyuq kaqkunaqa nishqäkunata wiyakäritsun. Imano nakarpis mana ajayaypa yärakamaqkunaqa manami nina qochaman qaykushqatsu kanqa”.*
Pérgamo markacho kaykaq yärakuqkunapaq cartata apatsishqan
12 “Pérgamo markacho kaykaq *iglesiapa *angilninpaq kay nishqäta qelqay: Noqami ishkan waqtanpa afilashqa espädä aptashqa kaykä.
13 “Noqa rikaykämi [lapan rurashqaykikunata y] markaykicho *Satanáspa trönun kashqanta. Tsayno kaptinpis mana ajayaypami noqaman yärakaykämanki. Wilakuynïta wilakuq Antipasta tsay markacho wanutsishqa kaptinpis mana ajayaypami yärakärimashqanki.
14 “Itsanqa wakin rurarkaykashqaykikuna manami gustamantsu. Qamkunachömi Balaam yachatsishqanno wakinkuna lutanta yacharkaykätsin. Pay shimita qoptinmi Balac jutiyuq runa Israel runakunata* fiestankunaman qayatsirqan ïdulukunapa jutincho pishtashqan aytsata mikupäkunanpaq. Tsaynöpis runakunata yätsirqan *fornicación jutsata rurapäkunanpaqmi.*
15 “Tsaynölami qamkunacho wakinkuna nicolaíta runakunapa yachatsikuyninta chaskipäkushqa. [Tsay yachatsikuyqa manami alitsu kaykan.]
16 Tsayno kaykaptinqa tsay yachatsikuykunata amana chaskipaynatsu. Tsaynöla chaskipaptikiqa qamkuna kaqman elaqpita shamur shimïpita yarqamuq espädawanmi ushakätsishaykipaq.
17 “Espíritu Santumi iglesiakunata tsayno niykan. Rinriyuq kaqkunaqa nishqäkunata wiyakäritsun. Imano nakarpis mana ajayaypa yärakamaqkunataqa jana patsacho churaraykaq *maná mikuytami* qarashaq. Tsaynöpis taksha yoraq rumitami qoykushaq. Tsay rumichömi mushuq jutin* qelqaraykanqa. Tsay jutitaqa rumita chaskikuqkunalami musyapäkunqa”.
Tiatira markacho kaykaq yärakuqkunapaq cartata apatsishqan
18 “Tiatira markacho kaykaq *iglesiapa *angilninpaq kay nishqäta qelqay: Noqami Tayta Diospa Tsurin kaykä. Nawïpis ninanöraqmi atsikyaykan. Chakïpis broncinöraqmi chipchipyaykan.
19 “Noqa rikaykämi lapan rurashqaykikunata y pïmaywanpis kuyanakärishqaykita. Tsaynöpis musyaykä noqaman yärakärimashqaykita, yanapakuq kapäkushqaykita y munashqäno imaypis kawapäkushqaykitami. Unay sirvimashqaykipita masmi kananqa sirvirkaykämanki.
20 “Itsanqa manami alitsu kaykan Jezabel* lutanta yachatsiptin mana michäpäkushqayki. Tsay warmiqa profetïsa tukurmi noqaman yärakamaqkunata criyitsir yachaykätsin *fornicación jutsata rurapäkunanpaq y ïdulukunapa jutincho pishtashqan aytsata mikupäkunanpaq.
21 Jutsa ruraykunata kacharinanpaq niykaptïpis tsay warmi manami kacharintsu.
22 “Tsaymi payta castigashaq qeshyalata mitsikunanpaq. Tsay warmi yachatsishqanta chaskikuqkunatapis jutsa rurayta mana kachariptinqa fiyupami castigashaq.
23 Paykunapa wamrankunatapis wanutsishaqmi. Tsaynöpami noqaman yärakamaqkuna tantiyakärinqa runakuna imata yarpashqantapis musyashqäta.* Rurashqanman tupumi noqaqa pïmaytapis juzgashaqpaq.*
24 “Wakinnikikunaqa tsay warmi lutanta yachatsishqankunata manami chaskipashqankitsu. ‘Mas alinnin kaq yachatsikuyta yachakushun’ niptinpis tsay yachatsishqankunaqa *Satanáspitami kaykan. Tsaymi kayno nï:
25 Noqa yachatsishqäkunata shamunäyaq mana qonqaypa cäsukäriy.
26 Imano nakarpis mana ajayaypa yärakamaqkunataqa nacionkunata munaynincho tsararänanpaqmi churashaq.
27 Mandanäpaq Taytä churamashqannömi paykunatapis mandaq kananpaq churashaq. Tsayno munayniyuq karmi nacionkunata fiërru väranwan mandanqa. Mitu mankata shaluriqnömi paykunata asulanqa.*
28 Tsay mandaqkunata waraq lucërutami* qoykushaq.*
29 “Espíritu Santumi iglesiakunata tsayno niykan. Rinriyuq kaqkunaqa nishqäkunata wiyakäritsun.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 2.1 Apoc. 1.20.
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ 2.6 Apoc. 2.14-15.
^ 2.7 Gén. 2.9; Apoc. 22.2.
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 2.11 Apoc. 20.14; 21.8.
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 2.14a Núm. 22.5, 7; 31.16; Deut. 23.4.
^ 2.14b Núm. 25.1-3.
^ fornicación jutsa Fornicación jutsaqa kaykan majalanwan kakunanpa trukan jukwan kakushqan, mana ashinakuylapa kakushqan, uywakunawan kakushqan, olqupura kakushqan, warmipura kakushqan, wayrapakuq warmiwan kakushqan, aylunwan kakushqan y jukwan jukwan lutala kakushqanpis (Lev. 18.6-23; 1Cor. 5.1; 6.12-20; Efe. 5.5).
^ maná Manáqa karqan culandrupa murunno y jachapa weqin niraq qarwashlami. Tsay mikuytami Israel runakunata Tayta Dios kamariparqan chunyaq tsaki jirkacho. Tsaytami ankaypapis machkaypapis y tantata ruraykurpis mikupäkurqan. Israel runakunaqa chusku chunka (40) watami tsay mikuyta mikupäkurqan (Éxo. 16; Núm. 11.4-9; Juan 6.31).
^ 2.17a Éxo. 16.14-15, 33-34; Juan 6.48-50.
^ 2.17b Isa. 62.2; 65.15.
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 2.20 1Rey. 16.31; 2Rey. 9.22, 30.
^ fornicación jutsa Fornicación jutsaqa kaykan majalanwan kakunanpa trukan jukwan kakushqan, mana ashinakuylapa kakushqan, uywakunawan kakushqan, olqupura kakushqan, warmipura kakushqan, wayrapakuq warmiwan kakushqan, aylunwan kakushqan y jukwan jukwan lutala kakushqanpis (Lev. 18.6-23; 1Cor. 5.1; 6.12-20; Efe. 5.5).
^ 2.22-23a Sal. 7.9; Jer. 17.10.
^ 2.22-23b Sal. 62.11-12; Prov. 24.12; Eze. 18.30; 33.20; Mat. 16.27.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 2.27 Sal. 2.8-9.
^ 2.28 Núm. 24.17; 2Ped. 1.19.
^ 2.28 Waraq lucërutami qoykushaq ninanqa noqawanmi imayyaqpis kawanqa ninanmi.
