Apocalipsis 16:1-21
16 Tsaypitanami mayarqä jana patsacho kaykaq templupita qanchis *angilkunaman qayakur kayno niykaqta: “Tsararashqayki cöpakunapita Tayta Diospa castïgunta patsaman jichamuy”.
2 Tsayno niptinmi punta kaq ángel tsararashqan cöpacho kaykaq castïguta patsaman jichamurqan. Tsaymi *anticristupa señalninwan señalashqa kaqkunata y ïdulunta adoraqkunata qeri pasaypa usharqan. Tsay qeriwanmi fiyupa nakapäkurqan.*
3 Ishkay kaq angilnami tsararashqan cöpacho kaykaq castïguta lamarman jichamurqan. Tsaymi yawarman lamar tikraptin tsaycho kaqkunaqa lapan wanurqan.
4 Kimsa kaq angilnami tsararashqan cöpacho kaykaq castïguta lapan mayukunaman y pukyukunamanpis jichamurqan. Tsaymi mayupis pukyupis yawarman tikrarqan.*
5 Tsaypitanami mayarqä yakupaq munayniyuq kaq ángel kayno nimuqta:“Runakunata tsayno castigar alitami ruraykanki, [Tayta Dios].Unaypita patsami imayyaqpis kaykanki.Qamqa *santumi kaykanki.
6 Qamman yärakuqkunatapis y profëtaykikunatapis wanutsirmi yawarninta jichapäkurqan.Tsaymi kikinkuna yawarta upunanpaq yakuta yawarman tikratsishqanki”.
7 Tsaynöpis mayarqä jana patsacho kaykaq *altarpita kayno nimuqta: “Lapanpaq munayniyuq Tayta Dios, alimi juzgaykanki”.
8 Chusku kaq angilnami tsararashqan cöpacho kaykaq castïguta intiman jicharqan. Tsaymi inti fiyupa shanaptin runakuna pasaypa nakarqan.
9 Tsayno nakarpis Tayta Diosta manami adorapäkurqantsu ni jutsa ruraykunata kacharipäkurqantsu. Tsaypa trukanqa castigashqanpitami Tayta Diospa contran imaykatapis parlapäkurqan.
10 Pitsqa kaq angilnami tsararashqan cöpacho kaykaq castïguta anticristupa trönunman jichamurqan. Tsaymi anticristo mandashqan lapan markakuna tsakakäkurqan.* Runakunanami nanaywan qalluntapis kanirqan.
11 Qeri qeshyawan pasaypa nakarmi Tayta Diospa contran imaykatapis rimapäkurqan. Tsayno nakarpis y qeri ushaptinpis jutsa ruraykunata manami kacharirqantsu.
12 Soqta kaq angilnami tsararashqan cöpacho kaykaq castïguta Éufrates jatun mayuman jichamurqan. Tsaymi mayu tsakikäkurqan* inti jeqamunan kaqpita shamuq reykuna soldädunkunawan pasamunanpaq.
13 Tsaypitanami rikarqä säpu niraq kimsa *supaykunata. Tsay supaykunami yarqupäkamurqan dragonpa shiminpita, anticristupa shiminpita y lula profëtapa shiminpita.
14 Tsay kimsa supaykunaqa milagrukunatapis rurarqanmi. Maytsaypapis aywarmi reykunata y soldädunkunata shuntarqan lapanpaq munayniyuq Tayta Dios juzganan junaq pelyananpaq.
15 “Mana musyashqayki hörami suwano elaqpita shamushaq.* Kushishqami kanqa röpan jatishqala rikaq rikaqla shuyarämaqkunaqa. Kutimur kamarikünita tariptï qarapächunöla karmi pasaypa penqakärinkipaq”.
16 Tsaypitami tsay kimsa supaykuna lapan reykunata soldädunkunatawan juk patsaman shuntarqan. Hebreo idiömacho tsay patsapa jutin kaykan Armagedónmi.*
17 Qanchis kaq angilnami tsararashqan cöpacho kaykaq castïguta wayraman jichamurqan. Tsaymi [jana patsacho kaykaq] templupita y Diospa trönunpita kayno qayakamuqta mayarqä: “¡Kananqa lapanpis cumplishqanami kaykan!”
18 Tsayno nimuptinmi chipchipyar elquy rikakämurqan y räyu bunrurumushqanpis mayakämurqan. Patsapis fiyupami siksikyarqan.* Runakunata Tayta Dios kamashqanpita patsa manami imaypis tsayno siksikyarqantsu.
19 Jatunkaray Babilonia markacho taq runakuna jutsata rurashqanpitami cöpa junta winaraykaq rabyayninta Tayta Dios uputsir fiyupa castigarqan.* Tsayno castigaptinmi tsay marka kimsaman rakikarqan. Wakin markakunanami pasaypa juchur ushakarqan.
20 Lapan islakunapis y jirkakunapis elqakäkurqanmi.*
21 Jana patsapitami chusku arröbano jatusaq runtu tamya* shikwamurqan. Tsay runtu shikwamuptin nakarmi runakuna imaykatapis Tayta Diospa contran rimapäkurqan.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ anticristo Anticristuqa Jesucristupa contran runami kaykan. Tsay runami Señor Jesucristo kutimunanpaqna kaptin yurimunqa. Nirkurmi runakunata lulapar kayno ninqa: “Noqami Cristo kaykä”. Milagrukunatapis rurarmi Jesucristuman yärakuqkunata engañanqa. Jesucristo kutimurnami azufriwan talushqa nina rupaykaq qochaman anticristuta qaykunqa (Mat. 24.4-5; Mar. 13.5-6; Luc. 21.8; 2Tes. 2.8-10; Apoc. 13.2; 13.13-14; 16.13; 19.20).
^ 16.2 Éxo. 9.10; Deut. 28.35.
^ 16.4 Éxo. 7.17-21; Sal. 78.44.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 16.10 Éxo. 10.21.
^ 16.12 Isa. 11.15.
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 16.15 Mat. 24.43-44; Luc. 12.39-40; Apoc. 3.3.
^ 16.18 Apoc. 8.5; 11.13, 19.
^ 16.19 Isa. 51.17; Jer. 25.15; Apoc. 14.10.
^ 16.20 Apoc. 6.14.
^ 16.21 Éxo. 9.23; Apoc. 11.19.
