Números 34:1-29
34 Moiséstami TAYTA DIOS kayno nirqan:
2 “Israel runakunata kayno niy: ‘*Canaánman chayaptikiqa qamkunapaqmi tsay parti kanqa. Lindërunkuna kaynömi kanqa:
3 “ ‘Sur kaq läduman tinkuranqa Zin nishqan chunyaq jirkapita Edom nacionyaq. Inti jeqamunan kaq lädupitami lindërun qalaykunqa *Kachi Lamarpa ura lädun kuchunyaq.
4 Tsaypita sur kaq lädupa lindëru aywaranqa Acrabim cuestayaq. Zin partipa pasar chayanqa Cades-barnea nishqanyaq. Tsaypitana Hasar-adarpa pasar chayanqa Asmón partiyaq.
5 Asmónpa pasar chayanqa Egipto raqrayaq. Tsaypitana lindëru chayanqa Mediterráneo Lamaryaq.
6 “ ‘Inti jeqanan kaq lädupaqa lindëru kanqa Mediterráneo Lamar kuchunpa.
7 “ ‘Norti kaq lädupanami lindëru kanqa Mediterráneo Lamarpita Hor puntayaq.
8 Hor puntapitanami lindëru chayanqa Hamat partiman yaykunayaq y tsaypitana chayanqa Zedad partiyaq.
9 Zedad partipitana chayanqa Zifrón partiyaq. Nirkurnami norti kaq lindëru ushanqa Hazar-enán particho.
10 “ ‘Inti jeqamunan kaq lädupanami lindëru kanqa Hazar-enánpita qalaykur Sefam partiyaq.
11 Sefampa pasarnami chayanqa Ribla partiyaq. Riblaqa Aínpita inti jeqamunan kaq läduchömi kaykan. Tsaypitanami lindëru pasanqa Cineret qocha inti jeqamunan kaq lädupa.
12 Nirkur lindëru pasanqa Jordán mayupa Kachi Lamarman chayananyaq.
“ ‘Tsaynömi Israel runakuna tänanpaq kaykaq nacionpa lindërunkuna kanqa’ ”.
Chakrata aypunakushqan
13 Tsaypitami Israel mayinkunata Moisés kayno nirqan: “Tsay naciontami isqun trïbu runakuna y pulan Manasés trïbu runakuna chaskinanpaq TAYTA DIOS nimashqantsi. Tsaymi tsay nacioncho chakrakunata suertita jitaypa aypunakärinki.*
14 “Rubén trïbu runakuna, Gad trïbu runakuna y pulan Manasés trïbu runakuna chakrankunata maynami chaskishqa.*
15 Tsay chakrakunaqa kaykan Jericó y Jordán mayu tsimpan inti jeqamunan kaq lädupami”.
16 Moisésta TAYTA DIOS kayno nirqan:
17 “Chakrakunataqa cüra Eleazarwan Nunpa tsurin Josuémi aypupäkunqa.
18 Tsaynöpis cada trïbupa mandaqninta churanki aypüshinanpaq.
19 Tsay aypüshiqkunaqa kaykunami kanqa:Judá trïbupita Jefonipa tsurin Caleb,
20 Simeón trïbupita Amiudpa tsurin Semuel,
21 Benjamín trïbupita Quislónpa tsurin Elidad,
22 Dan trïbupita Joglipa tsurin mandaq Buqui,
23 Josépa tsurin Manasés trïbupita Efodpa tsurin mandaq Haniel,
24 Efraín trïbupita Siftánpa tsurin mandaq Kemuel,
25 Zabulón trïbupita Parnacpa tsurin mandaq Elizafán,
26 Isacar trïbupita Azánpa tsurin mandaq Paltiel,
27 Aser trïbupita Selomipa tsurin mandaq Ahiud,
28 Neftalí trïbupita Amiudpa tsurin mandaq Pedael”.
29 Tsay mandaqkunatami TAYTA DIOS churarqan *Canaáncho Israel runakunata posisionta aypupäkunanpaq.
Ichic wilacuycuna
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ Kachi Lamar Kachi Lamarqa (Gén. 14.3; Núm. 34.3) chusku pachak ishkay kimsa (423) metru bajo el nivel del marmi kaykan. Anchunmi chunka pusaq kilömetru kaykan y largunnami pusaq chunka (80) kilömetru. Kachi Lamarmanqa Jordán mayumi yaykuykan. Maypapis yaku mana yarquptinmi tsay lamarqa pasaypa pochquq kaykan. Tsaymi ima jachapis ni ima pescädupis tsaycho kantsu. Kachi Lamarpa jukaq jutinmi kaykan Arabá Lamar (Deut. 3.17; Jos. 3.16) y jukaq jutinnami kaykan inti jeqamunan kaq lädu qocha (Eze. 47.18; Zac. 14.8). Kananqa runakuna reqipäkun Mar Muerto jutiwanmi.
^ 34.13 Núm. 26.52-56.
^ 34.14 Jos. 14.1-5.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
