Malaquías 1:1-14
1 Kaychömi qelqaraykan Israel runakunata profëta Malaquías TAYTA DIOSPA wilakuyninta wilashqan.
Israel runakunata Tayta Dios kuyashqan
2 TAYTA DIOSMI kayno nin: “Noqaqa qamkunata imaypis kuyämi.
“Tsayno kaykaptinpis qamkunaqa kaynömi nirkaykämanki: ‘¿Imanöpataq musyapäkushaq kuyamashqaykita?’
“Tsaymi tantiyaykätsï kayno nir: ‘¿Manaku Jacobwan Esaúqa tsay wawqila karqan? Tsayno kaptinpis unay ayluyki Jacobtami kuyarqä
3 y Esaútanami chikirqä.* Tsaymi Esaú aylukuna tashqanta chunyaq jirkaman tikratsishqä. Kananqa *chacalkuna täkunalanmi rikakushqa’ ”.* *
4 Tsaymi edomita* runakuna kayno nipäkunqa: “Markantsikunata ushakätsiptinpis yapaymi kay nacionta sharkatsishun”.
Tsayno nipäkuptinpis lapanta mandaq TAYTA DIOS kaynömi nin: “Markankunata yapay sharkatsiptinpis yapaymi ushakätsishaq. Tsaymi nacionninpa jutinta churapanqa Jutsasapa Runakuna Tashqan Nación jutin kananpaq. Tsaynöpis nipäkunqa paykunapita imaypis rabyashqa kaykashqäta.
5 Tsayno ushakätsishqäta rikarmi kayno nipäkunkipaq: ‘TAYTA DIOS alabashqa kaykulätsun. Munayniyuq kashqanqa maytsay nacionkunachöpis musyakanqami’ ”.
Cürakunata Tayta Dios olqüpashqan
6 Cürakunapaqmi lapanta mandaq TAYTA DIOS kayno nin: “Tsurinkuna papäninta respitanmi. Ashmay runakunapis patronninta cäsukunmi. Noqami qamkunapa papäniki y patronniki kaykä. Papäniki kaykaptïqa ¿imanirtaq mana respitamankitsu? Patronniki kaykaptïqa ¿imanirtaq mana *mantsakamankitsu? Qamkunaqa manakaqmanmi churaykämanki.
“Nirkurpis kaynömi nirkaykanki: ‘¿Imata rurartaq qamta manakaqman churapäkushqä?’
7 “Manakaqman churarkaykämanki mana sänu uywakunata* sacrificiukunapaq *altarnïman apamushpaykimi.
“Tsayno nir tantiyatsiptïpis yapaymi kayno nirkaykanki: ‘¿Imata rurartaq qamta manakaqman churapäkushqä?’
“Qamkunaqa manakaqman churarkaykämanki mana alinnin uywakunata sacrificiupaq altarnïman apamurmi.
8 Qapra uywakunata sacrificiupaq apamushpayki ¿ali kashqantaku yarpapäkunki? Tsaynöpis weqruta o qeshyaykaqta apamushpayki ¿alitatsuraq rurarkaykanki?* Tsaykunata mä gobernadornikita qaranaykipaq apapäkuy. Paypis manami chaskishunkipaqtsu. Noqa lapanta mandaq TAYTA DIOSMI tsayno nï.
9 “Tsayno manakaqman churarkamarpis manakamankiraq yanapanäpaq. Mana alinnin uywakunata sacrificiukunapaq apamuptikiqa ¿kushishqatsuraq chaskishayki? Noqa lapanta mandaq TAYTA DIOSMI tsayno nï.
10 “¡Ima aliraq kanman pipis mana yaykunanpaq templu punkunta wichqaptin! Tsaynöpaqa manami pipis altarnïman mana alinnin uywakunata apamunqanatsu. Tsayno apapäkamushqayki manami gustamantsu. Apapäkamuptikipis manami chaskishaykitsu.*
11 “Inti jeqamunan lädupita hasta inti jeqanan läduyaqmi maytsay nacionkunacho jutïta joqarir shumaq sirvipäkaman. Maytsaychömi inciensuwan qoshtatsipäkun y tsaki mikuyta altarkunaman apapäkun. Tsayno rurarmi maytsaychöpis respitapäkaman. Noqa lapanta mandaq TAYTA DIOSMI tsayno nï.
12 “Altarnïta mana respitarqa kikïtapis manami respitaykämankitsu. Mana munashqäta altarnïman apapäkamushpaykimi manakaqman churarkaykämanki.
13 Tsaynöpis nirkaykanki sirvipäkamashqayki aläpa sasa kashqanta. Sirvimarpis janan shonqulami sirvipäkamanki. Altarnïmanqa sacrificiupaq aparkaykämunki suwakuy uywata, weqru uywata y qeshyaykaq uywata. Tsay uywakunata ¿chaskinäpaq kashqantatsuraq yarparkaykanki?
14 “Noqaqa lapanpaq munayniyuq reymi kaykä. Maytsay nacionkunachömi mantsakaman. Qamkunaqa uywaykikunapita alinnin kaqta apamunaykipaq promitirkurpis qeshyaykaq uywata altarnïman apamushqaykipitami maldicionashqa kankipaq. Noqa lapanta mandaq TAYTA DIOSMI tsayno nï”.
Ichic wilacuycuna
^ 1.3a Gén. 25.23-26; Rom. 9.13.
^ chacal Chacalqa atuq niraq jirka uywami kaykan. Chacalqa atuqpita mas jatulanmi. Atuqkunaqa castankunawanmi puripäkun. Chacalkunami itsanqa majanwan majanwan puripäkun (Isa. 13.22; Jer. 9.11; Lam. 4.3).
^ 1.3 Esaú aylu runakunaqa Israel runakunapa contranmi karqan. Tsaymi paykunata ushakätsir Tayta Dios tantiyatsirqan Israel runakunata kuyashqanta.
^ 1.4 Edomita runakunaqa Esaú aylu runakunami karqan.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 1.7 Lev. 22.17-25; Deut. 15.21.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 1.8 Lev. 22.18-25; Deut. 15.21.
^ 1.10 Isa. 1.13; Amós 5.21-24.
