Levítico 8:1-36
8 Mastapis Moisésta TAYTA DIOS kayno nirqan:
2 “Aarónta y tsurinkunata pushamur lapan runakunata shuntanki Tinkunantsi Toldu patiuman. Tsaynöpis apamunki cüra jatikunan röpakunata, sagrädu aceitita, purificatsina sacrificiupaq turituta, ishkay carnikunata y canastawan levadüraynaq tantatapis”.
3 -
4 TAYTA DIOS nishqannöla Moisés rurarmi Tinkuna Toldu patiuman lapan runakunata shuntarqan.
5 Shuntarkurmi runakunata kayno nirqan: “Kayno ruranantsipaqmi TAYTA DIOS nimashqa”.
6 Tsayno nirmi Aarónta y tsurinkunata qayaykur Moisés armatsirqan.
7 Nirkurnami tünicata jatiparkur wachkuwan tseqlanpa Aarónta wachkaparqan. Tsay jananmanmi sotänata y *efodta jatiparqan. Nirkurnami efodpa wachkunwan tseqlanta wachkaparqan.
8 Tsay jananman pechërata wataparkurmi *Urimta y Tumimta winaparqan.
9 Tsaynölami umanman görrata jatiparkur qoripita *sagrädu vinchata jananman churaparqan. TAYTA DIOS nishqannölami tsaykunata Moisés rurarqan.*
10 Tsaypitanami *Sagrädu Tolduman y lapan manëjunkunaman sagrädu aceitita Moisés winaparqan. Tsayno ruraptinmi lapanpis sagräduna karqan.
11 Tsay aceitilawanmi *altartapis qanchis kuti tsaqtsuparqan. Nirkurmi sagrädu kananpaq altarta, manëjunkunata y lavatoriutapis jamakunantinta tsay aceitiwan tsaqtsuparqan.*
12 Nirkurmi mandaq cüra kananpaq Aarónpa umanman sagrädu aceitita winaparqan.
13 Tsaypitanami Aarónpa tsurinkunata qayaykur tünicata jatiparqan. Nirkurnami cada ünunpa umanmanpis görrata jatiparqan. TAYTA DIOS nishqannömi lapantapis rurarqan.
14 Tsaypitanami purificatsina sacrificiupaq turituta Moisés apatsimurqan. Tsay turitupa umanman Aarón y tsurinkuna makinta churaptinmi
15 Moisés pishtarqan. Altar purificashqa kananpaqmi yawarman dëdunta töparkatsir altarpa waqrankunata lushiparqan. Putsuq yawartanami altarpa chakinman talirqan. Tsaynöpami altar sagräduna karqan janancho sacrificiuta rupatsiptin jutsankunapita runakuna perdonashqa kananpaq.
16 Nirkurmi pishtashqan uywapa pacha wiranta, natincho kaykaq wiranta y ishkan rurunta wirantinta altarcho Moisés rupatsirqan.
17 Turitupa qaranta, aytsanta y ashashnintami itsanqa campamentupita juk läduman apaykur rupatsirqan. TAYTA DIOS nishqannölami lapantapis Moisés rurarqan.
18 Rupatsina sacrificiupaq carnitapis Moisés nishqano apapaptinmi Aarón y tsurinkuna makinta churarqan carnipa umanman.
19 Tsaypita pishtarkurna carnipa yawarninwan altarpa chuskun lädunkunata Moisés tsaqtsuparqan.
20 Cuartutsarkurnami aytsanta, umanta y wiranta rupatsirqan.
21 Tsaypitami TAYTA DIOS nishqannöla carnipa pachanta y atakshunkunata maylarkur altarcho Moisés rupatsirqan. Tsay rupatsishqanpa ali asyayninta* mayarmi TAYTA DIOS kushikurqan.
22 Tsaypitanami jukaq carnitapis Moisés apatsimurqan. Tsay carniqa cüra kayman yaykur ofrendapaq churashqanmi karqan. Carnipa umanmanmi Aarón y tsurinkuna makinta churapäkurqan.
23 Moisésnami carnita pishtarkur yawarninwan Aarónpa alawqa kaq rinrinpa ura lädu puntanta lushiparqan. Tsaynölami lushiparqan alawqa kaq makinpa y chakinpa maman dëduntapis.
24 Tsaynölami Aarónpa tsurinkunatapis qayaykur alawqa kaq rinrinta yawarwan lushiparqan. Tsaynölami lushiparqan alawqa kaq makinpa y chakinpa maman dëduntapis. Nirkurnami tsay yawarwan altarpa chuskun lädunkunatapis tsaqtsuparqan.
25 Nirkurnami carnipa chupa wiranta, pacha wiranta, natincho kaykaq wiranta, ishkan rurunta wirantinta y alawqa kaq chankantapis Moisés jorqurqan.
26 Tsaykuna jananmanmi churarqan levadüraynaq juk tantata, aceitiwan masarashqa juk tantata y juk lapsha tantatapis. TAYTA DIOSPA nawpanman churashqan canastapitami tsay tantakunata jorqurqan.
27 Nirkurmi lapan tsaykunata Aarónta y tsurinkunata aptaparqan TAYTA DIOSPA nawpancho joqarkur wakman kayman kuyutsinanpaq.
28 Paykunapita chaskirkurnami Moisésqa altarcho rupatsina sacrificiu rupaykätsishqan jananman churarqan. Tsay ofrendaqa cüra kayta qalaykunanpaq churashqan ofrendami karqan. Rupatsishqanpa ali asyayninta mayarmi TAYTA DIOS kushikurqan.
29 Tsaypitanami carnipa pëchunta TAYTA DIOSPA nawpancho ishkan makinwan joqarkur wakman kayman Moisés kuyutsirqan. Tsay pëchuqa TAYTA DIOS nishqannölami Moiséspaq karqan.
30 Nirkurnami sagrädu aceitiwan y altar janancho kaykaq yawarwan Aarónta y tsurinkunata Moisés tsaqtsuparqan. Tsaynölami tsaqtsuparqan cüra kar jatiränan röpankunatapis. Aarónta, tsurinkunata y röpankunata tsayno tsaqtsuparqan sagrädu kananpaqmi.
31 Tsayno rurarkurnami Aarónta y tsurinkunata Moisés kayno nirqan: “Quëdaq kaq aytsata Tinkuna Toldu patiucho yanurkur canastacho kaykaq sagrädu tantatawan jinalancho mikupäkuy. Tsaycho mikunaykipaqmi TAYTA DIOS nimashqa.
32 Putsuq kaq aytsata y tantata lapanta rupatsinki.
33 Cüra kayman yaykur qanchis junaqyaq consagrakunki. Tsay junaqkuna Tinkuna Toldu patiupita maypapis ama yarqunkitsu.
34 TAYTA DIOS nishqannölami lapanta kanan rurashqantsi jutsa rurashqaykipita purificashqa kapäkunaykipaq.
35 Tsaymi Tinkuna Toldu patiulacho qanchis junaqyaq paqasta junaqta qamkuna kakunki. TAYTA DIOS nishqanta cäsukurqa manami wanupäkunkipaqtsu. Tsayno ruranaykipaqmi TAYTA DIOS nimashqa”.
36 Moisésta TAYTA DIOS nishqannölami Aarón y tsurinkuna lapanta rurapäkurqan.
Ichic wilacuycuna
^ efod Efodqa cüra jatikunan mandilmi karqan. Tsaytaqa Israelcho mas mandaq cürami röpan jananman jatikuq (Éxo. 28.6-14). Tsay efodchömi laqararqan chunka ishkay rumikuna. Cada rumichömi kaykarqan Israel trïbupa juk jutin. Wakin runakunapis mas jukniraq efodta jatikuqmi. Tsay runakuna karqan Samuel (1Sam. 2.18), David (2Sam. 6.14), Nobpita kaq cürakuna (1Sam. 22.18) y Micaía (Jue. 17.5).
^ Urim y Tumim Urim y Tumimqa rumikunami karqan. Tsay rumikunaqa mandaq cürapa pechëran rurinchömi winararqan. Tsay rumikunawanmi mandaq cüra suertita rikaq Tayta Dios imata munashqantapis musyananpaq (Éxo. 28.30; Esd. 2.63; Neh. 7.65).
^ sagrädu Liyinki santupita tantiyatsikuyta.
^ 8.6-9 Éxo. 28.4-43; 39.1-31.
^ Sagrädu Toldu Liyinki Tinkuna Toldupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 8.10-11 Éxo. 40.9-11.
^ 8.21 Wakin runakunaqa mushkuyninta nipäkun.
