Levítico 18:1-30
18 Mastapis Moisésta TAYTA DIOS kayno nirqan:
2 “Israel runakunata kayno niy: ‘Noqaqa TAYTA DIOSNIKIMI kaykä.
3 Egiptucho tar rikashqayki costumbrikunataqa ama rurapäkunkitsu. Pushaykashqä *Canaánman chayarpis tsaycho taq runakunapa costumbrinkunata ama rurapäkunkitsu. Paykuna kawashqannöqa ama kawapäkunkitsu.
4 Noqa nishqäkunata cäsukäriy. Leynïkunata cumplipäkuy. Nishqänöla kawapäkuy. Noqaqa TAYTA DIOSNIKIMI kaykä.
5 Leynïkunata y nishqäkunatapis cumplipäkuy. Leynïkunata cumpliq kaq runaqa lapantami cumplinman.* Noqaqa TAYTA DIOSMI kaykä.
6 “ ‘Mayqanikipis ayluykiwan ama kakunkitsu. Noqaqa TAYTA DIOSMI kaykä.
7 “ ‘Mamaykiwan ama kakunkitsu. Mamaykiwan kakurqa taytaykita manami respitaykankitsu. Tsaytaqa ama rurapäkuytsu.
8 “ ‘Mädistaykiwan ama kakunkitsu. Tsayta rurarqa taytaykita manami respitaykankitsu.*
9 “ ‘Panikiwan ama kakunkitsu. Taytalaykipita o mamalaykipita paniki karpis ni juk läducho yurishqa karpis yawarnikimi kaykan.*
10 “ ‘Wilkaykiwanpis ama kakunkitsu. Olqu tsurikipita karpis o warmi tsurikipita karpis wilkaykiqa yawarnikimi kaykan.
11 “ ‘Papänikipa tsuripakuyninwanpis ama kakunkitsu. Payqa paniki kar yawarnikimi kaykan.
12 “ ‘Papänikipa paninwanpis ama kakunkitsu. Payqa tiyayki kar yawarnikimi kaykan.
13 “ ‘Mamaykipa nananwanpis ama kakunkitsu. Payqa tiyayki kar yawarnikimi kaykan.
14 “ ‘Papänikipa wawqinpa warminwanpis ama kakunkitsu. Payqa tiyaykimi kaykan.*
15 “ ‘Tsurikipa warminwanpis ama kakunkitsu. Payqa lumtsuynikimi kaykan.*
16 “ ‘Wawqikipa warminwanpis ama kakunkitsu. Payqa cuñädaykimi kaykan.*
17 “ ‘Mamay wawawanqa ama tankitsu. Entenädaykipa wawanwanpis y entenäduykipa tsurinwanpis ama kakunkitsu. Paykunaqa warmikipa yawarninmi kaykan. Tsayqa pasaypa penqaypaqmi kaykan.*
18 “ ‘Warmikipa nananwan ama kakunkitsu. Warmiki kawaykaptin nananwan taptikiqa warmikiwan chikinakunqami.
19 “ ‘Killa qeshyanwan kaykaq warmiwanqa ama kakunkitsu.*
20 “ ‘Jukpa warminwanqa ama kakunkitsu. Tsayno kakurqa pasaypa jutsayuqmi kaykanki.*
21 “ ‘Moloc diospaq tsurikitapis ama rupatsinkitsu.* Tsayno rurarqa manami respitaykämankitsu. Noqaqa TAYTA DIOSMI kaykä.
22 “ ‘Olqupura ama kakunkitsu. Tsayqa penqakuypaq jutsami kaykan.*
23 “ ‘Ima uywawanpis ama kakunkitsu. Warmipis uywakunawan ama kakunqatsu. Tsayqa pasaypa penqaypaq jutsami kaykan.*
24 “ ‘Mayqaykipis tsaykunata rurarqa *impürumi rikakunkipaq. Yaykunaykipaq kaq markakunacho taq runakunatapis tsayno impüru kashqanpitami qamkunapa nawpaykipita qarqushaq.
25 Tsayno jutsata rurar impüru kaptinmi nacionninpis impüru kaykan. Tsaymi tsay runakunata castigar markankunapita qarqushaq.
26 Nishqäkunata y leynïkunata cumplishpayki tsay penqakuypaq jutsakunataqa ama rurapäkunkitsu. Tsaynöla qamkunacho taq jäpa runakunapis cumplitsun.
27 “ ‘Canaánman manaraq chayaptikimi tsaycho taq runakuna penqaypaq jutsakunata rurarkaykan. Tsaymi nacionninpis impüru kaykan.
28 Qamkunapis nacionnikita impüruyätsiptikiqa tsay runakunata qarqushqänömi qamkunatapis qarqushaykipaq.
29 Pipis tsay penqakuypaq jutsakunata ruraq kaqqa Israel runakunapita qarqushqami kanqa.
30 Tsayno kaykaptinqa nishqäkunata cäsukäriy. Tänaykipaq kaq nacionman chayashpayki tsaycho taq runakuna jutsa rurashqankunata ama rurapäkuytsu. Tsayno rurarqa impürumi rikakärinkipaq. Noqaqa TAYTA DIOSNIKIMI kaykä’ ”.
Ichic wilacuycuna
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 18.8 Lev. 20.11; Deut. 22.30; 27.20.
^ 18.9 Lev. 20.17; Deut. 27.22.
^ 18.12-14 Lev. 20.19-20.
^ 18.15 Lev. 20.12.
^ 18.16 Lev. 20.21.
^ 18.17 Lev. 20.14; Deut. 27.23.
^ 18.19 Lev. 20.18.
^ 18.20 Lev. 20.10.
^ 18.21 Lev. 20.1-5.
^ 18.22 Lev. 20.13.
^ 18.23 Éxo. 22.19; Lev. 20.15-16; Deut. 27.21.
