Levítico 16:1-34
16 TAYTA DIOSPA nawpanman lutala yaykur Aarónpa ishkan tsurinkuna wanushqanpitami* Moisésta TAYTA DIOS kayno nirqan:
2 “Wawqiki Aarónta wilay cortïnata pasar Lugar Santïsimuman lutala mana yaykunanpaq.* Tsaycho kaykaq *babulpa tsapanan jananmanmi pukutaycho yurimushaq. Tsaymi lutala tsayman yaykurqa wanunqa.
3 Juk turituta purificatsina sacrificiupaq y juk carnita rupatsina sacrificiupaq altarcho ruparkatsirraqmi* Lugar Santïsimuman Aarón yaykunqa.
4 Tsaynöpis jatikunqa lïnupita awashqa *sagrädu tünicanta y lïnupita awashqa calzoncïlluntapis. Tsaynöla lïnu wachkuwan wachkakurkur umanmanpis jatikunqa lïnu görranta. Tsay röpakuna sagrädu kaptin manaraq jatikur armakunqa.
5 Israel runakuna apamushqanpita Aarón apamunqa purificatsina sacrificiupaq ishkay chïvukunata y rupatsina sacrificiupaq juk carnita.
6 “Tsaypitanami purificatsina sacrificiupaq Tinkuna Toldu patiuman turituta Aarón apamunqa. Tsay turitu kanqa Aarón y paypita miraq cürakuna purificashqa kananpaqmi.
7 Tsaypitami ishkan chïvukunata Tinkuna Toldu patiuman apaykamur TAYTA DIOSPA nawpanman churanqa.
8 Tsaychömi suertita jitanqa mayqan chïvu TAYTA DIOSPAQ kananpaq y mayqan chïvu Azazelpaq* kananpaqpis.
9 TAYTA DIOSPAQ kaq chïvutaqa purificatsina sacrificiupaq altarcho Aarón rupatsinqa.
10 Azazelpaq kaq chïvutana kawaykaqta TAYTA DIOSPA nawpanman apamunqa. Nirkurmi chunyaq jirkaman apaykur Azazel kaykashqan kaqman qarqunqa. Qarquptinmi Israel runakuna jutsa rurashqanpita perdonashqa kar purificashqa kanqapaq.
11 “Tsaypitanami Tinkuna Tolduman apamushqan turituta altarcho Aarón rupatsinqa kikin y paypita miraq cürakuna purificashqa kananpaq.
12 Nirkurnami TAYTA DIOSPA nawpancho kaykaq *altarpita shanshaykaq carbonta inciensu qoshtatsikunanwan juntata Tinkuna Toldu rurinman apanqa. Tsaynöpis apanqa ishkay aptay ñutqu aqashqa ali asyaq* inciensuta. Tinkuna Toldu rurincho kaykaq cortïnata pasarmi Lugar Santïsimuman tsaykunata apanqa.
13 Tsaychömi TAYTA DIOSPA nawpancho shansha apashqanman inciensuta winanqa. Tsaymi inciensupa qoshtaynin tsapakurkunqa *Pactu Babulpa tsapananta. Tsayno tsapakurkuptin Aarón manami wanunqatsu.
14 Nirkurmi turitupa yawarninman dëdunta jatirkur babulpa tsapananta punku lädupita tsaqtsupanqa. Tsaypitana babultapis dëdunwan qanchis kuti tsaqtsupanqa.
15 “Lugar Santïsimupita yarqurkurna Israel runakuna jutsankunapita purificashqa kananpaq chïvuta pishtanqa. Tsay yawartapis turitupa yawarninwan rurashqannöla cortïna rurinman apaykur tsapananta y babulpa nawpanta tsaqtsupanqa.*
16 Tsaynöparaqmi Israel runakuna *impüru kashqanpita, mana cäsukushqanpita y jutsa rurashqanpita Lugar Santïsimuta y lapan Tinkuna Toldutapis purificanqa.
17 “Lugar Santïsimucho Aarón kaykaptinqa manami pipis Tinkuna Tolduman yaykunmantsu. Tsaychömi Aarónqa yawarta tsaqtsupanqa kikinpis, aylunkunapis y lapan Israel runakunapis purificashqa kananpaq.
18 Tsaypita yarqurnami TAYTA DIOSPA nawpancho kaykaq altarta purificanqa. Tsaychömi turitupa yawarninwan y chïvupa yawarninwan altarpa waqrankunata lushipanqa.
19 Nirkurnami altarpa jananman qanchis kuti dëdunwan yawarta tsaqtsupanqa. Tsaynöpami Israel runakuna jutsata rurar impüruyätsishqanpita altarta purificanqa sagrädu kananpaq.
20 “Lugar Santïsimuta, Tinkuna Tolduta y altarta purificayta usharkurna kawaykaq chïvuta apamunanpaq Aarón ninqa.
21 Chïvupa umanman makinta churaykur TAYTA DIOSTA wilanqa Israel runakuna mana alikunata rurashqanta, contran sharkushqanta y jutsakunata rurashqanta. Tsayno wilaparmi Israel runakunapa lapan jutsankunata chïvuman jitapanqa apakunanpaq. Nirkurmi juk runa chunyaq jirkaman apaykur chïvuta kacharinqa aywakunanpaq.
22 Tsaynöpami tsay chïvu Israel runakunapa lapan jutsankunata apakunqa pipis mana tashqanman.
23 “Tsaypitanami Tinkuna Toldu rurinman Aarón aywar Lugar Santïsimuman yaykunanpaq jatikushqan lïnu röpata jorqurir churaykunqa.*
24 Armakurir röpanta jatikurkurna yarqunqa kikinpa jutsanpita y Israel runakunapa jutsanpita sacrificiuta rupatsinanpaq. Tsayno rupatsiptinmi kikinpa y Israel runakunapa jutsankuna perdonashqa kanqapaq.
25 Nirkur purificatsina sacrificiupaq pishtashqan uywapa wiranta altarcho rupatsinqa.
26 “Chunyaq jirkaman Azazelpaq chïvuta apaq runapis röpanta taqshakurir y armakurirraqmi campamentuman kutimunqa.
27 “Purificatsina sacrificiupaq pishtashqan turitupa y chïvupa qaratsanta, aytsanta y ashashnintana campamentupita juk läduman apaykur rupatsinqa. Tsay uywakunapa yawarnintami Lugar Santïsimuta purificananpaq apashqana karqan.*
28 Tsaykunata rupatsiq runaqa röpanta taqshakurir y armakurir campamentuman kutimunqa.
29 “Cada wata lapan tsaykunata rurapäkunki qanchis kaq killa chunka junaqcho. Tsay junaq ayunar ima aruytapis kachaykunki. Qamkunacho taq jäpa runakunapis tsayno ruranqa. Kay nishqäkunaqa imayyaqpis leymi qamkunapaq kanqa.
30 Tsay junaqqa lapaykitami purificashushpayki TAYTA DIOS perdonashunkipaq. Tsaymi TAYTA DIOSPA nawpancho lapan jutsaykipita maylashqa kankipaq.
31 Tsay junaqqa qamkunapaq jamay junaqmi kanqa. Tsaymi ayunar ima aruytapis ama rurapäkunkitsu. Tsay nishqäkunaqa imayyaqpis leymi qamkunapaq kanqa.
32 “Mayqanpis mandaq cüra kananpaq churashqan cürami tsaykunata ruranqa lapanpis purificashqa kananpaq. Paymi lïnupita rurashqa sagrädu röpata jatikurkur
33 Lugar Santïsimuta, Tinkuna Tolduta y altarta purificanqa. Tsaynöpami cürakunapis y lapan Israel runakunapis purificashqa kar perdonashqa kanqapaq.
34 Cada watacho juk kutimi tsay nishqäkunata Israel runakuna rurapäkunqa jutsankunapita perdonashqa kananpaq. Tsay nishqäkunaqa imayyaqpis leymi qamkunapaq kanqa”.*
Moisésta TAYTA DIOS nishqannölami lapanta rurapäkurqan.
Ichic wilacuycuna
^ 16.1 Lev. 10.1-3.
^ babulpa tsapanan Babulpa tsapananpa jutinmi hebreucho karqan kapporet. Kapporet ninanqa tsapanan ninanmi y jutsata perdonashqan ninanmi. Wakin castellänu traduccionkunaqa propiciatoriu nirmi tsay palabrata traducin. Babulpa tsapanan jananpitami Moisésta Tayta Dios parlaparqan (Éxo. 25.22). Tsaynöpis babulpa tsapanan jananman pukutaycho Tayta Dios yurimurqan (Lev. 16.2). Israel runakuna purificashqa kananpaq kaq junaqchömi mandaq cüra babul kashqanman yaykur turitupa yawarninman dëdunta jatirkur babulpa tsapananta tsaqtsuparqan (Lev. 16.14).
^ sagrädu Liyinki santupita tantiyatsikuyta.
^ 16.8 Azazelpaqqa chunyaq jirkacho taq diablupa jutin kashqantami unay Israel runakuna nipäkuq.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 16.12 Wakin runakunaqa mushkuq nipäkun.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 16.23 Eze. 44.19.
^ 16.27 Heb. 13.11.
^ 16.29-34 Lev. 23.26-32; Núm. 29.7-11.
