Levítico 15:1-33
15 Moisésta y Aaróntami TAYTA DIOS kayno nirqan:
2 “Israel runakunata kayno niy: ‘Pï runatapis purgación* tsariptin *impürumi kanqa.
3 Tsayno impüru kanqa purgación aywaptinpis o penqaynin tsapakashqa kaptinpis. Mayqanno kaptinpis impürumi kanqa.
4 Tsay runa maycho punushqa kaptinpis y maycho jamashqan kaqpis impürumi kanqa.
5 “ ‘Tsay runa punushqanta pipis yatarqa röpanta taqshakurir armakunqa. Armakurpis patsa tsakashqanyaqmi impüru kanqa.
6 Tsaynöpis tsay runa jamashqanman pipis jamaykurqa röpanta taqshakurir armakunqa. Armakurpis patsa tsakashqanyaqmi impüru kanqa.
7 Purgacionwan kaykaq runata pipis yatarqa röpanta taqshakurir armakunqa. Armakurpis patsa tsakashqanyaqmi impüru kanqa.
8 Purgacionwan kaykaq runa sänu runata toqapaptin toqapashqan runa röpanta taqshakurir armakunqa. Armakurpis patsa tsakashqanyaqmi impüru kanqa.
9 Purgacionwan kaykaq runa muntakushqan sillapis impürumi kanqa.
10 Purgacionwan kaykaq runa ima qeshtamanpis jamashqanta pipis yataykurqa impürumi kanqa patsa tsakashqanyaq. Impüru runa yatashqan kaqta imatapis aparqa röpanta taqshakurir armakunqa. Armakurpis patsa tsakashqanyaqmi impüru kanqa.
11 Purgacionwan kaykaq runa makinta mana maylakuylapa juk runata yataykuptinqa yatashqan runa röpanta taqshakurir armakunqa. Armakurpis patsa tsakashqanyaqmi impüru kanqa.
12 Purgacionwan kaykaq runa mitu mankata yataykuptinqa tsay mankata pakinki. Imatapis qerupita rurashqa kaqkunata yataptinqa maylanki.
13 “ ‘Purgacionwan kaykaq runa aliyashqanpita qanchis junaqtaraqmi püru kanqa. Tsaypitaraqmi pukyucho röpanta taqshakurir armakunqa. Tsayno rurarkurraqmi purificashqa kanqa.
14 Pusaq kaq junaqchöna Tinkuna Toldu patiuman apamunqa ishkay kulkushta karpis o ishkay pushapa palumata karpis. Tsaykunatami TAYTA DIOSPA nawpancho cürata entreganqa.
15 Cürana jukaqta pishtanqa purificatsina sacrificiupaq y jukaqtana pishtarkur rupatsinqa rupatsina sacrificiupaq. Tsaynömi TAYTA DIOSPA nawpancho ruranqa purgacionwan qeshyaq runa purificashqa kananpaq.
16 “ ‘Runapa lëchin kikilan yarquptinqa armakunqa. Armakurpis patsa tsakashqanyaqmi impüru kanqa.
17 Tsaynöla lëchin töpashqan röpatapis taqshanqa y qarapita rurashqankunatapis maylanqa. Tsayno rurarpis patsa tsakashqanyaqmi impüru kanqa.
18 Warmiwan kakurqa ishkan armakunqa. Armakurpis patsa tsakashqanyaqmi impüru kanqa.
19 “ ‘Killa qeshyanwan kaykaq warmiqa qanchis junaqyaqmi impüru kanqa. Pipis killa qeshyanwan kaykaq warmita yatarqa impürumi kanqa patsa tsakashqanyaq.
20 Killa qeshyanwan kaykar qeshtakushqanqa imapis impürumi kanqa. Tsay warmi ima jananman jamaykuptinqa tsay jamaykushqan impürumi kanqa.
21 Killa qeshyanwan kaykaq warmi punushqan cämata pipis yatarqa röpanta taqshakurir armakunqa. Armakurpis patsa tsakashqanyaqmi impüru kanqa.
22 Killa qeshyanwan kaykaq warmi imamanpis jamashqanta pipis yatarqa röpanta taqshakurir armakunqa. Armakurpis patsa tsakashqanyaqmi impüru kanqa.
23 Qeshtakushqanta yatarpis o jamashqan kaqta yatarpis patsa tsakashqanyaqmi impüru kanqa.
24 Killa qeshyanwan kaykaq warmiwan pï runapis kakurqa qanchis junaqyaqmi impüru kanqa. Runa punushqan cämapis impürunami kanqa.
25 “ ‘Pï warmipis killa qeshyanwan qeshyashqanpita mas atska junaqna aywaptinqa yawarnin chawänanyaqmi impüru kanqa.
26 Tsay warmi punushqanpis y jamashqanpis impürumi kanqa.
27 Warmi töpashqankunata pipis yatarqa impürumi kanqa. Tsaypita purificashqa kananpaq röpanta taqshakurir armakunqa. Armakurpis patsa tsakashqanyaqmi impüru kanqa.
28 “ ‘Killa qeshyanwan kashqanpita püru kananpaqqa yawarnin chawashqanpita qanchis junaqyaq shuyanqa.
29 Pusaq kaq junaqchöqa apamunqa ishkay kulkushta karpis o ishkay pushapa palumata karpis. Tsaytaqa Tinkuna Toldu patiuman apaykur cürata entreganqa.
30 Cüranami jukaqta pishtanqa purificatsina sacrificiupaq y jukaqtana pishtanqa rupatsina sacrificiupaq. TAYTA DIOSPA nawpancho cüra tsayno ruraptinmi killa qeshyawan qeshyashqanpita tsay warmi purificashqana kanqa.
31 “ ‘Tsaynöpami Israel runakunata tantiyatsinki impüru mana kananpaq. Impüru karqa paykunacho kaykaq *Sagrädu Toldutapis impüruyätsinqami. Sagrädu Toldupis impüru rikakuptinqa wanupäkunqami’ ”.
32 Tsaynömi leykuna kaykan pï runapis purgacionwan impüru kaptin o lëchin yarqushqanpita impüru kaptin.
33 Tsaynölami leykuna kaykan killa qeshyanwan warmi kaykaqpaq, killa qeshyanwan kaykaq warmiwan kakuq runapaq y purgacionwan kaykaq runapaqpis. Tsay leykuna kaykan warmipaqpis y olqupaqpis.
Ichic wilacuycuna
^ 15.2 Runata purgación tsarishqanta nintsi chiwlakunan antsar yoraq yaku yarquptinmi.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ Sagrädu Toldu Liyinki Tinkuna Toldupita tantiyatsikuyta.
