Jeremías 11:1-23
11 TAYTA DIOSMI Jeremíasta kayno nirqan:
2 “Judácho y Jerusaléncho taq runakunata parlapar paykunawan *pactuta rurashqäta yarpätsinki. Yarpätsir kayno ninki:
3 ‘Israel runakunata kuyaq TAYTA DIOS kaynömi nin: Pactu rurashqäta mana cumpliq runakunaqa maldicionshqami karkaykan.
4 Unay ayluykikunatami Egiptucho fiërru hornuchöno nakarkaykaqta jorqamurqä. Paykunatami kayno nirqä: “Cäsukamashpayki nishqäno kawarqa kuyashqä runakunami kankipaq. Noqanami qamkunapa Diosniki kashaq”.
5 “ ‘Abrahamta, Isaacta y Jacobta promitishqäta cumplirmi alinnin kaq nacionman paykunata pusharqä. Tsaychöqa lëchipis abëjapa mishkinpis yakunöraqmi atska kaykan. Promitishqänölami kay nacioncho kananyaqpis tarkaykanki’ ”.
Tsayno nimaptinmi kayno nirqä: “¡Tsayno imaypis kaykulätsun, TAYTA DIOS!”
6 Tsawraqa TAYTA DIOS kayno nimarqan: “Judácho kaq markakunacho y Jerusalén cällikunachöpis wilakur kayno ninki: ‘Unay ayluykikunawan pactu rurashqäta cäsukäriy.
7 Unay ayluykikunata Egiptupita jorqamushqäpita patsa yaparir yaparirmi cäsukamänanpaq tantiyatsirqä.
8 Tantiyaykätsiptïpis paykunaqa manami cäsukamashqatsu ni pactu rurashqätapis cumplishqatsu. Tsaypa trukanqa shonqun yarpashqannömi lutanta rurapäkushqa. Tsaymi pactuta rurar nishqäno paykunata castigashaq’ ”.
9 Yapaymi TAYTA DIOS kayno nimarqan: “Judá runakunawan Jerusaléncho taq runakunaqa wilanakushqa
10 unay aylunkunanöla nishqäkunata mana cäsukur jutsata rurapäkunanpaqmi. Tsaymi juk lädu runakuna adorashqan dioskunata adorarkaykan. Tsaynöpami Judá runakunapis y Israel runakunapis unay aylunkunawan pactu rurashqäta mana cumplipäkuntsu.
11 “Tsaymi paykunata fiyupa castigaptï makïpita mayqanpis mana qeshpinqatsu. Salvanäpaq manakamaptinpis manami salvashaqtsu. Noqa TAYTA DIOSMI tsayno nï.
12 Tsawraqa Judá runakuna y Jerusalén runakunaqa adorashqan dioskunata manakur inciensuwan qoshtatsipäkunqa. Tsayno manakuptinpis tsay diosninkuna manami salvanqatsu.
13 “Judá runakuna, markaykikuna tsaytsika kashqannömi diosnikikunapis tsaytsika kaykan. Jerusalén runakuna, cällikikuna atska kashqannömi *Baalta qoshtatsinaykipaq atska *altarkunata perqapäkushqanki.
14 “Jeremías, tsay runakunata kuyapänäpaq ama manakamaynatsu. Nakashqan höra paykuna manakamaptinpis manami cäsushaqtsu.
15 “Kuyashqä runakuna, ïdulukunata adoraykarqa ¿imatataq templücho ashirkaykanki? Sacrificiuta altarnïcho rupatsipäkushpayki ¿mana castiganäpaq kashqantaku yarparkaykanki? Tsaykunata rurapäkushqaykipita ama kushikäriytsu.
16 Nawpataqa qamkunata nirqä atska wayuyniyuq copösu olïvuno kashqaykitami. Kananqa räyu rupar ushashqa olïvunömi karkaykanki.
17 “Noqami olïvuta plantaqno qamkunata kay nacionman churarqä. Tsayno kaptinpis qamkunaqa Israelchöpis Judáchöpis Baalta adorashpaykimi rabyanätsimashqanki. Tsayno adorashqaykipitami lapanta mandaq TAYTA DIOSNIKI kar castigashayki”.
Jeremíasta wanutsinanpaq contrankuna wilanakushqan
18 Tsaypitanami TAYTA DIOS musyatsimarqan runakuna conträ sharkur wilanakuykashqanta.
19 Pishtananpaq apaptin uysha mana tantiyashqannömi noqapis tantiyarqätsu conträ sharkuykashqanta. Conträ sharkurmi kayno nipäkurqan: “Ali wayuykaq yörata muturiqno payta wanutsishun. Kay patsacho amana kawatsunnatsu. Paytaqa pipis amana yarpätsunnatsu”.
20 Lapanta mandaq TAYTA DIOS, qammi ali juez kaykanki.Qamqa musyankimi runakuna imata yarpaykashqantapis.Noqaqa qampa makikimanmi lapanta kachaykamü.Tsay runakunata imano castigashqaykitapis rikaytami munä, Tayta.*
21 Tsay Anatot runakunami kayno nipäkamarqan: “Wanuyta mana munashpaykiqa TAYTA DIOSPA jutincho amana wilakuynatsu”.
22 Tsayno niptinmi lapanta mandaq TAYTA DIOS kayno nin: “Tsayno nishqanpitami Anatot runakunataqa castigashaq. Mözu kaqkunaqa guërrachömi wanupäkunqa. Tsurinkunanami warmipis olqupis yarqanaypita wanupäkunqa.
23 Anatot runakunata juzganä junaq chayamunqapaqnami. Paykunata castigaptï manami juklaylapis quëdanqatsu”.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 11.20 Jer. 20.12.
