Isaías 60:1-22
60 TAYTA DIOSMI kayno nin:“¡Sharkuy, Jerusalén!*Salvacionniki chayamushqana kaykaptinqa ¡atsikyay!Munaynïmi qamcho atsikyaykan.
2 Kay patsata tsakaymi tsapakurkushqa.Yanawyaykaqmi nacionkunata nitikurpushqa.Qammanmi itsanqa inti chayamuqno chayamushaq.Munaynïwan yanapashqätami pïmaypis rikanqa.
3 Atskino kaptikimi lapan nación runakuna qamman shamunqa.Patsa waraqno atsikyaptikimi reykunapis shapäkamunqa.*
4 “Jerusalén, ichirkur maytsaypapis rikachakuy.Tsaytsika runakunami juntakaykur qamman aywarkaykämun.Olqu wamraykikunapis karupitami aywarkaykämun.Warmi wamraykikunatapis marqashqami aparkaykämun.
5 Paykuna chayamuptin pasaypami kushikunkipaq.Shonquykipis kushikuypita atsikyarkunqami.
“Lamar washa läduncho taqkunapis chanin cuestaq regälukunatami qampaq apapäkamunqa.Nacionninkunapa riquëzankunatami qampaq apapäkamunqa.
6 Madiánpita y Efapita *camëllunkunawan shamurmi punta punta juntapäshunki.Qorita y inciensuta apakurkurmi Sabápitapis shapäkamunqa.Noqata alabamarmi chayapäkamunqa.
7 Cedarcho kaq uyshakunatapis qampaqmi qatipäkamunqa.*Altarnïcho rupatsinaykipaq Nebaiotcho kaq carnikunata qatipäkamunqa.Tsay rupatsishqaykikuna munashqänömi kanqa.Maytsaypita imaykatapis apamuptinmi templüpis kushikuypaq kanqa.
8 “*Büquikuna pukutaynöraq aywaykämuqta y palumakuna pununanman kutiqno runakuna aywaykämuqta rikay.
9 Tsay büquikuna karu nacionkunapitami aywaykämun.Tsay nacionkunacho taq runakunapis noqamanmi yärakaman.Tarsispita jatunkaray büquikunami paykunapa puntanta aywaykämun.Karupitami wamraykikunata aparkaykämun.Qorinkunata y qellayninkunata apakurkurmi aywaykämun.Tsayno aywaykämun qamcho fiyupa kushikuypaq kaqkunata rurashqäpita adoramänanpaqmi.Noqaqa Israel runakunapa *santu TAYTA DIOSNINMI kä.
10 “Fiyupa rabyakushpä castigarkurpis kananqa kuyapäshaykimi.Jäpa runakuna shamurmi marka perqaykikunatapis altsapäkunqa.Mandaqnin reykunapis nishqaykitami rurapäkunqa.*
11 Maytsay nacionkunapita riquëzankunata apamunanpaqmi paqasta junaqta punkuykikuna kicharanqa.*Reykunatapis qam kaqmanmi pushamunqa.
12 Mayqan nación runakunapis nishqaykita mana ruraq kaqqa chipyaq asulashqami kanqa.
13 “Líbanupitapis alinnin cipreskunata, pïnukunata y abëtu qerukunatami templüta altsananpaq apapäkamunqa.Tsaynöpami templü kuyaylapaq kanqa.
14 Respitashushpaykimi nakatsishuqnikikunapa wamrankuna makikita mutsanqa.Manakaqman churashuqniki runakunapis lapanmi nawpaykiman qonqurpakamunqa.*Paykunami nipäkunqa TAYTA DIOSPA markan kashqaykita.Tsaynöpis nipäkunqa Israel runakunapa santu TAYTA DIOSNIN tashqan *Sión kashqaykita.
15 “Nawpata kacharishqa y chikishqa karmi chunyaq marka rikakushqanki.Tsayno kashqa kaptikipis kuyaylapaq y kushishqa imayyaqpis kanaykipaqmi yanapashayki.
16 Lapan nistashqaykikunatami maytsay nacionkunapita apapämushunkipaq.Reykunapis lapan munashqaykitami kamaripäshunkipaq.Tsaynöpami tantiyakunkipaq noqa TAYTA DIOSNIKI salvakuq kashqäta.Tsaynöpis musyankipaq Jacob yärakushqan munayniyuq Dios kar qamta imapitapis tsapaykashqäta.
17 “Bendicionta qoshpämi kamaripäshayki broncipa trukan qorita,fiërrupa trukan qellayta,yörapa trukan broncitay rumipa trukan fiërruta.Qamcho taqkuna jawkalami kawanqa.Ali kaqlatami imaypis ruranqa.
18 Wanutsinakuypis qam kaqcho mananami kanqanatsu.Nacionnikicho ushakätsinakunanpa trukanqa jawkanami kawapäkunqa.Marka yaykuna punkuykikunapa pasaq runakunapis kushishqami alabapäkamanqa.
19 “Manami munankinatsu junaqpa intita ni tsakaypa killatapis.Noqa TAYTA DIOSMI imayyaqpis atskiki y salvashuqniki kashaq.*
20 Tsaymi inti mana jeqaqno y killa mana tsakaqno imaypis qampaq kashaq.Noqa TAYTA DIOSMI imayyaqpis atskiki kashaq.Qamta tsayno ali rikaptïmi imaypis mana lakikunkinatsu.
21 “Qamcho taqkunaqa lapanpis ali runakunalanami kanqa.Qamchömi imayyaqpis paykuna tanqapaq.Munayniyuq kashqäta pïmaypis musyananpaqmi plantashqä plantapita tsintsimuqno kapäkunqa.
22 Yupashqala kaqkuna waranqanpami miranqa.Walkala kaqkunami munayniyuq nación rikakunqa.Noqa TAYTA DIOS karmi kamakätsishaq manapis aykälatana tsayno kananpaq”.
Ichic wilacuycuna
^ 60.1 Kay capïtulucho Jerusalén markata tinkutsirqan wawayuq warmiman. Wawankunaqa Israel runakunami karqan.
^ 60.3 Apoc. 21.24.
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 60.10 Isa. 54.7-8; Lam. 3.31-33.
^ 60.11 Apoc. 21.25-26.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 60.19 Apoc. 21.23; 22.5.
