Isaías 57:1-21
57 Tayta Diosta sirviq ali runakuna wanuptin manami pipis lakikuntsu.Mana nakananpaq Tayta Dios shuntashqanta manami pipis tantiyantsu.
2 Dios munashqanno kawaqkunaqa wanukur manami nakanqanatsu.
Ïdulukunata adoraqkunapa contran parlashqan
3 Tayta Diosmi kayno nin:“¡Jutsasapakuna, shumaq wiyakäriy!¡Qamkunaqa brüja castami karkaykanki!¡Majanta jarukuqnömi ïdulukunata adorar Tayta Diosta manakaqman churarkaykanki!
4 ¿Imanirtaq cäsukamaqkunata asiparkaykanki?¿Imanirtaq manakaqman churar yachaparkaykanki?¿Imanirtaq qalluykita aqtuparkaykanki?¡Qamkunaqa lula runakuna y jutsasapa runakunami karkaykanki!
5 “Qamkunaqa roble yörakuna sikincho y copösu yörakuna sikinchömi ïduluykikunata adorar warmikunawan punukurkaykanki.Tsaynöpis raqrakuna y qaqakuna kashqanchömi sacrificiuta rupatsir wamraykikunata ruparkaykätsinki.*
6 Qamkunapa diosnikikunaqa mayu kuchuncho qollush rumikunalami kaykan.Tsaykuna yanapashunaykipaq kashqanta yarparmi vïnutapis jichaparkaykanki.Tsaki mikuy ofrendakunatapis apaparkaykanki.Tsayno rurapäkushqaykipita manami upälakümantsu.
7 “Altunnin jirkakunachömi adulteriu jutsata ruraqno juk dioskunata adorarkaykanki.Tsay jirkakunamanmi witsarkaykanki sacrificiukunata rupatsinaykipaq.
8 Wayi punkuyki waqtankunamanmi ïdulukunata churarkaykanki.Noqata mana cäsumashpaykimi adulteriu jutsata ruraqno tsay ïdulukunawan *pactuta rurar adorarkaykanki.Qarapächu warmita rikapaqnömi tsay ïdulukunata rikapar adorarkaykanki.
9 “Aceitita apakurkurmi diosniki Molocman warakayla aywarkaykanki.Perfümitapis atskatami aparkaykanki.Mana reqishqayki ïdulukunata adorayta munarmi apamunanpaq runakunatapis kacharkaykanki.Mayjina karu kaptinpis chayaykätsinkimi.
10 Itsanqa ïdulukunata adoranaykipaq maytsaypa aywarpis manakaqlapaq adorashqaykita manami cuentata qokunkitsu.Utikarpis mana ajayaypami jinala adorarkaykanki.
11 “¿Ïduluykikunata *mantsakurku noqaman mana yärakamankinatsu?¿Ïduluykikunata respitarku qonqaykamashqanki?¿Unaypita mana parlapashqäta yarparku mantsakamankinatsu?
12 Kananqa imano kawashqaykitapis pïmaytami musyatsishaq.Lapan rurapäkushqaykipis manakaqlapaqmi kanqa.
13 Salvashunaykipaq qayakuptikipis ïduluykikuna manami salvashunkipaqtsu.Tsaykunata lapantami wayra apakunqa.Juk pükaylami wayra saqtarinqa.Noqaman yärakamuqkunami itsanqa promitishqä nacioncho tanqapaq.Paykunaqa sagrädu jirkannïchömi adoramanqapaq”.
Israel runakunata salvashqan
14 Tayta Diosmi kayno nin:“Nänita shumaq pitsashqaykino jutsa rurashqaykikunata kachariy.Kuyashqä runakuna noqaman kutimunanpaq nänita shumaq altsapäkuy”.
15 Jana patsacho taq y imayyaqpis kawaq santu Tayta Diosmi kayno nin:“Noqaqa jana *sagrädu patsachömi tä.Tsaynöpis jutsata rurashqanpita lakikuqkunawanmi kaykä.Paykunata yanaparmi shakyätsishaq.
16 Tsaymi kuyashqä runakunata mana castigaykäshaqnatsu.Manami imayyaqpis rabyashqalaqa kaykäshaqtsu.Tsayno rabyashqala imaypis kaptïqa lapan kamashqä runakuna ushakanmanmi.
17 “Kuyashqä runakuna jutsata rurashqanpita rabyakurmi juk tiempu castigarqä.Pasaypa castigarkurmi paykunata kachariykurqä.Jutsa ruraylacho yachakashqa karmi kikinkuna munashqanno kawapäkushqa.
18 Tsayno kawaykaptinpis cäsukuq kananpaqmi yanapashaq.Yanapaptïmi lakishqa kawaqkunapis kushikärinqa.
19 Kushishqa alabamänanpaqmi yanapashaq.Karucho kaykaqkunamanpis y cercacho kaykaqkunamanpis wilakatsishaq ali kawayta tarinanpaqmi.*Kuyashqä runakunata noqami yanapashaq.
20 “Fiyu runakunami itsanqa lamar pulchaqyaqno kaykan.Lamar yaku mana chawaypa pulchaqyar mituwan y qanrawan puchkataqnömi karkaykan.
21 Fiyu runakunaqa manami imaypis ali kawapäkunqatsu”.*Tayta Diosmi tsayno nin.
Ichic wilacuycuna
^ 57.5 Lev. 18.21; Jer. 7.31; 19.5.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ sagrädu Liyinki santupita tantiyatsikuyta.
^ 57.21 Isa. 48.22.
