Isaías 56:1-12
56 TAYTA DIOSMI kayno nin:“Walkalanami pishiykan shuntanäpaq.Salvashpämi musyatsishayki munayniyuq kashqäta.Tsayno kaykaptinqa ali kaqlata rurapäkuy.Munashqänöna imaypis kawapäkuy.
2 Nishqäta cäsukuq runaqa jamay junaqta respitanmi.*Ima jutsatapis manami rurantsu.Tsay runaqa imaypis kushishqami kawanqa”.
3 TAYTA DIOS munashqanno kawaq runaqa jäpa karpisama yarpätsuntsu kuyashqan runakunapita Tayta Dios qarqunanpaq kashqanta.*Eunucu karpis ama lakikutsuntsu tsurin mana kaptin mana wayuq yörano kashqanpita.
4 TAYTA DIOSMI kayno nin:“Eunucu runapis jamay junaqkunata respitaptin, munashqäno kawaptin y *pactu rurashqäta cumpliptinqa
5 wayïcho imaypis tänanpaqmi chaskishaq.Paypa jutinta churapashqäqa tsuriyuq kashqanpitapis mas alimi kanqa.Paypa jutinta imaypis manami qonqapäkunqatsu.
6 “Jäpa runakunapis sirvimar kuyamaptin, jamay junaqkunata respitaptin y pactu rurashqäta cumpliptinqa
7 akrashqä *sagrädu jirkanmanmi pushashaq wayïcho kushishqa adoramänanpaq.Noqapaq sacrificiukunata tsaycho rupatsiptinqa chaskishaqmi.Wayïqa kanqa maytsay nación runakuna manakamänanpaqmi”.*
8 Mashtakashqa Israel runakunata shuntaq TAYTA DIOS kaynömi nin:“Israel runakunata shuntamushqänölami wakin runakunatapis shuntamushaq”.
Mana ali mandaqkunapa contran nishqan
9 ¡Jirka uywakuna y munti uywakuna, shapäkamuy!¡Shamur runakunata mikupäkuy!
10 Autoridäkuna ni yachatsikuqkunapis manami tantiyatsipäkuntsu runakuna jutsa rurayta kacharinanpaq.Paykunaqa qaprano kashpan manami imatapis musyapäkuntsu.Lapanpis mana kanikuq alqunömi karkaykan.Qela kashpanmi waran waran punuykälar jitarpäkun.
11 Yarqanashqa alqunömi imaypis karkaykan.Imatapis mana tantiyaq mitsikuqnömi karkaykan.*Lapanpis lutanta rurarmi kawapäkun.Imata rurarpis pägupaq kashqalami rurapäkun.
12 Paykuna kaynömi nipäkun:“¡Shinkashqantsiyaq vïnuta upyashun!¡Kanan upyashqantsino warapis fiestata rurar cansashqantsiyaq* upyashun!”
Ichic wilacuycuna
^ eunucu Eunucu runakunaqa capashqa runakunami karkaykan. Tsay witsanmi runakunata akraykur reykuna capatsiq warmikunata mana munapänanpaq. Nirkurnami tsay capashqa runakunata churaq reypa warminkunata cuidananpaq karpis o mandäshinanpaq karpis (Est. 2.3, 14; Hech. 8.27).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ sagrädu Liyinki santupita tantiyatsikuyta.
^ 56.7 Mat. 21.13; Mar. 11.17; Luc. 19.46.
^ 56.12 Wakin runakunaqa pasashqantsiyaq nipäkun.
