Isaías 50:1-11
50 TAYTA DIOSMI kayno nin:“Capaz yarparkaykanki warminta runa kacharishqanno qamkunata kacharishqäta.Rasunpa tsayno kaptinqa ¿maytaq rakikashqantsi papel?Tsaynöpis capaz yarparparkaykanki pipapis jaqan kashpä ashmay kanaykipaq rantikushqäta.Rasunpa tsayno kaykaptinqa ¿maytaq jaqa kashqä papel?Tsaypa trukanqa jutsata rurashqaykipitami rantikushqä.Tsaynöpis qamkuna mana cäsukuq kashqaykipitami mamaykita* qarqushqä.
2 “¿Imanirtaq yanapanäpaq shamur pitapis yärakamaqta mana tarishqätsu?¿Imanirtaq qayakuptï contestamashqankitsu?¿Manaku criyipäkunki yanapanäpaq munayniyuq kashqäta?¿Manaku criyipäkunki salvanäpaq poderniyuq kashqäta?Munayniyuq kashpämi juk shimila lamartapis mayukunatapis tsakitsï.Tsaymi pescädukunapis yaku mana kaptin wanur ushakan.
3 Munayniyuq kashpämi ciëlutapis lütu röpata jatipaqno yanaman tikratsï”.
Tayta Diosta sirviq runa nakarpis payman yärakushqan
4 TAYTA DIOSMI yachatsimashqa lakishqa kaykaqkunata shakyätsir kushikatsinäpaq.Pay nimashqanta tantiyakunäpaqmi cada tuta rikchatsiman.
5 Cäsukuq kanäpaqmi TAYTA DIOS yanapaman.Tsaymi pay nimashqanta imaypis cäsukü.
6 Runakuna astamänanpaqpis waqtätami kamapashqä.Shapräta lukir ushaptinpis manami rimakushqätsu.Ashlir toqapämaptinpis manami qaqläta tsapakushqätsu.*
7 TAYTA DIOS yanapamaptinmi awantashqä.Mana penqakuypami Tayta Diosman yärakuykä.Tsaymi qaqano mana kuyukuypa kaykä.Tayta Diosman yärakushqäpita manami imaypis penqakushaqtsu.
8 Nawpächömi Tayta Dios kaykan.Pay musyanmi jutsaynaq kashqäta.¿Piraq noqata ichipämanman?Conträ sharkuqkuna juntakaykur mä pipis careamätsun.
9 TAYTA DIOS yanapaykämaptinqa ¿piraq imatapis jitapämanman?Puyu ushaptin röpa ushakashqannömi lapan conträkunapis ushakanqa.*
10 Mayqanikipis TAYTA DIOSTA *mantsakuq karqa shumaq tantiyakäriy.Sirviqnin wilakushqanta cäsukuq karqa shumaq yarpachakäriy.Pasaypa lakikur tsakäpakushqano karqa TAYTA DIOSMAN yärakäriy.Ima ruraytapis mana kamäpakurqa yanapashunaykipaq payta ruwakäriy.
11 Tayta Diosmi kayno nin:“Kikikikunaman yärakuqkuna, shumaq tantiyakäriy.Noqaman yärakamänaykipa trukan qamkunaqa yachaq kashqaykiman atiënikurmi kawarkaykanki.Tsayno kashqaykipita castigaptïmi fiyupa nakar ushakankipaq”.
Ichic wilacuycuna
^ 50.1 Kay textucho Jerusalén markata tinkutsirqan juk warmimanmi. Tsaymi mamaykita qarqushqä ninanqa Jerusalén markata ushakätsishqä ninan.
^ 50.6 Mat. 26.67; Mar. 14.65.
^ 50.8-9 Rom. 8.33-34.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
