Isaías 31:1-9
31 ¡Wawalaw, Egiptuman ruwakuq aywaqkuna!Qamkunaqa Egipto runakunapa cawallunkunaman,atska carrëtankunamany cawallu muntaq soldädunkunamanmi yärakurkaykanki.Israel runakunapa *santu Diosninmanqa manami yärakärinkitsu.TAYTA DIOSTAQA manami tapukuylapis tapukärinkitsu.*
2 Egipto runakuna yachaq kashqanman yärakäriptikipis Tayta Diosqa mas yachaqmi kaykan.Payqa runakunata imanöpa castigaytapis yachanmi.Nishqantaqa imaypis cumplinmi.Fiyu runakunata y cumpinchinkunatapis castiganqami.
3 Egipto runakunaqa manami diostsu kaykan, sinöqa runalami.Cawallunkunapis manami munayniyuq *angiltsu kaykan, sinöqa uywalami.Tsaymi TAYTA DIOS castigaptin Egipto runakuna y paykunata minkakuqkunapis mana awantanqatsu.Paykunaqa lapanmi ushakanqa.*
4 TAYTA DIOS kaynömi nimarqan: “Uyshata león wanutsiptin lapan mitsikuqkuna juntakaykur qaparpaptinpis león manami mantsakuntsu. Noqapis tsay leonnömi kashaq. Kuyashqä runakunata *Sión jirkancho salvaptï pipis mana mantsakätsimanqatsu.
5 Wawanta pishqu tsapaqnömi noqapis Jerusalénta tsapashaq. Imapis mana pasananpaqmi shumaq rikashaq. Ima mana alipitapis salvashaqmi”.
6 Israel runakuna, Tayta Diosta aläpanami rabyanätsishqanki.Tsayno kashqaykipita tantiyakur munaynincho yapay kawapäkuy.
7 Payta rabyanätsirmi qoripita y qellaypita ïdulukunata rurapäkushqanki.Diospa makincho kawarnami itsanqa tsaykunata jitarinkipaq.
8 Asiria runakunataqa Tayta Dios manami runakunapa espädanwantsu wanutsinqa, sinöqa kikinpa espädanwanmi.*Espädapita mözukuna qeshpiptinpis taripaykurmi ashmayninpaq apakärinqa.
9 Fiyupa mantsakurmi mandaqnin reypis qeshpikunqapaq.Capitanninkunapis bandërankunata kachariykurmi mantsakashqa aywakärinqapaq.Tsayno kananpaq kashqantami TAYTA DIOS nin.Contrankunata ushakätsinanpaqmi Sión jirkancho ninata rataykätsin.Jerusalénchömi hornuntapis wariykätsin.*
Ichic wilacuycuna
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 31.1 Prov. 21.31; Isa. 30.16; Ose. 1.7.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 31.1-3 Isa. 30.1-5.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 31.8 Kikinpa espädanwanmi wanutsinqa nishqanqa kikin Tayta Diosmi kamakätsinqa wanutsishqa kananpaq ninanmi.
^ 31.9 Kay textucho Tayta Diospa rabyayninta ninaman y hornumanmi tinkutsin.
