Isaías 21:1-17
21 Kaychömi qelqaraykan lamar nawpancho kaykaq chunyaq jirka imano kananpaq Tayta Dios revelashqan.*Neguevpita shamuq shukukuy wayranömi* maytsaytapis ushaq soldädukuna aywarkaykämun.Fiyupa mantsakuypaq chunyaq jirka lädupitami aywarkaykämun.
2 Aläpa mantsakuypaqta revelamarmi Tayta Dios rikatsimashqa runakuna runa mayinta lulaparkaykaqta.Tsaynöpis rikatsimashqa wanutsikuq runakuna runa mayinta wanuykätsiqta.¡Elam runakuna, atacanaykipaq shapäkamuy!¡Media runakuna, wanutsinaykipaq yaykapäkamuy!¡Babilonia runakuna pitapis amana nakatsitsunnatsu!
3 Babilonia nacionta Tayta Dios ushakätsinanpaq kashqanta musyaptïmi shonqüpis tuksishqanöraq nanaykun.Wachay nanaywan lakikuq warmitanöraqmi lakikuypis tsariman.Revelacioncho mayashqä y rikashqä fiyupami mantsakatsiman.
4 Tsaymi upatakashqano kar ima ruraytapis mana kamäpakütsu.Mantsakuylawanmi siksikyaykäpis.Patsa tsakänanta munarpis tsakarpuptinqa fiyupami mantsakü.
5 Babiloniacho mësa kamarishqanami kaykan.Mësa janancho mantilpis mashtaraykanmi.Tsaychömi mikurkaykan y upurkaykan.¡Capitankuna, sharkapäkuy!¡Pelyar tsapakunaykipaq escüduykikunata kamarikäriy!
6 Tayta Diosmi kayno nimashqa: “Imata rikashqantapis wilakamunanpaq juk rikachakuqta churamuy.
7 Guërra carrëtan qarachashqa parninpa parninpa cawallukuna aywaykämuqta rikar o bürrun muntashqa o *camëllun muntashqa runakuna aywarkaykämuqta rikar jukla wilakamunqa”.
8 Tsaypitanami rikachakuq churashqä runa qayakamur kayno nimarqan: “Tayta, churamashqalaykichömi paqasta junaqtapis mana kuyukuypa kaykä.
9 Kananmi itsanqa rikaykä ishkay cawallukuna guërra carrëtan qarachashqa aywarkaykämuqta”.
Paykuna chayaykurmi kayno nirqan: “¡Ushakashqanami, ushakashqanami Babilonia marka!* ¡Adorashqan dioskunapa ïdulunkunapis pampacho shalushqanami jitarpaykan!”
10 Marka mayikuna, ëracho trïgu wirushqano y wayrar jitashqanömi pasaypa nakarkaykanki. Qamkunata wilaykä kuyamaqnintsi y lapanta mandaq TAYTA DIOS nimashqankunatami.
Edom imano kananpaqpis nishqan
11 Kaychömi qelqaraykan edomita runakuna imano kananpaq Tayta Dios revelashqan.Seirpita patsami juk runa qayakamur kayno nimashqa:“Tayta rikachakuq, ¿imay hörataq patsa waranqa?*¿Ayka hörataq pishiykan patsa waränanpaq?”
12 Tsaymi rikachakushqächo* kayno nirqä:“Patsa wararkurpis yapaymi tsakakäkunqa.Masta musyayta munarqa yapay tapukuq kutimunki”.
Arabia runakuna imano kananpaqpis nishqan
13 Kaychömi qelqaraykan Arabia runakuna imano kananpaq Tayta Dios revelashqan.Negociuta apar Arabiacho kaykaq shatakunacho patsakuq Dedán runakuna,
14 qeshpiq runakunata yakuta taripatsiy.Temacho taq runakuna, mikuyta qarapäkuy.
15 Arabia runakunaqa espädawan mana wanutsishqa kananpaqmi qeshpikurkaykan.Flëchawan mana wanutsishqa kananpaqmi ayqirkaykan.Guërracho wanutsinanta mantsakurmi aywakurkaykan.
16 Tayta Diosmi kayno nimashqa: “Kananpita juk watatami Cedar runakuna munayniyuq kashqan ushakanqa. Juk wata arunanpaq conträtu ruraq runa cada junaqta yuparashqannömi tsay wata yupashqala kanqa.
17 Flëchawan flëchaq geniuyuq Cedar runakunaqa walkalanami kawaykar quëdanqa”.
Israel runakunata kuyaq TAYTA DIOSMI tsayno nishqa.
Ichic wilacuycuna
^ Neguev Neguevqa Israel nacionpa sur kaq lädunchömi kaykan. Neguevcho kaykan Beerseba, Siclag, Gerar y Arad markakunami. Neguevcho shumaq mana tamyaptinmi aläpaqa mana murukärintsu. Tsaymi tsay partichöqa uyshata y cabrata ashmakular täkärin (Gén. 24.62; Núm. 13.17; Jos. 11.16).
^ 21.1 Wakin runakunaqa löcu wayranömi nipäkun.
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ 21.9 Apoc. 14.8; 18.2.
^ 21.11 Imay hörataq patsa waranqa ninanqa imaytaq nakay ushakanqa ninanmi.
