Génesis 8:1-22
8 Tayta Diosqa manami qonqarqantsu Noéta y *arcacho kaykaq uywakunatapis. Tsaymi yaku walkayänanpaq wayrätsimurqan. Tsay wayrawanmi yaku walkayayta qalaykurqan.
2 Tsawraqa patsa rurincho kaq lamarpita pashtamuq yaku chawarqanna. Ciëlupita yaku yarqamunanpaq kicharaykaq punkupis wichqakäkurqanna.
3 Tsaymi yaku walkayayta qalaykurqan. Pachak pitsqa chunka (150) junaqtanami
4 arca takyarqan Araratcho kaykaq jirkaman. Tsay karqan qanchis kaq killa chunka qanchis junaqchömi.
5 Tsaypita yaku waranlanta waranlanta walkayaptinnami chunka kaq killa qalaykunan junaq jirka puntakuna rikakarqanna.
6 Tsaypita chusku chunka (40) junaq cumplirkuptinnami Noé kicharqan arcapa ventänanta.
7 Nirkur juk cuervuta* kacharqan yaku tsakishqanta o mana tsakishqantapis rikapakamunanpaq. Tsayno kaptinpis tsay cuervuqa manami kutirqantsu, sinöqa yaku jananpa wakpa kaypa pärir purirqan yaku tsakishqanyaq.
8 Tsaypitanami kacharqan juk palumata yaku tsakishqanta o mana tsakishqantapis musyamunanpaq.
9 Patsa janancho yaku juntaraptinmi maychöpis ratananpaq mana kaptin arcaman kutirqan. Tsaymi Noéqa makinta makyarqan paluma ratananpaq. Rataykuptinnami arcaman yaykatsirqan.
10 Tsaypita qanchis junaqtanami palumata yapay Noé kacharqan.
11 Patsa tsakaykaptinnami paluma kutirqan olïvu räman amushqa. Tsaynöpami Noé musyarqan yaku tsakiykashqantana.
12 Kutishqanpita qanchis junaqtami yapay palumata kacharqan. Tsawraqa paluma manami kutirqannatsu.
13 Soqta pachak juk (601) watayuq Noé kaykaptinmi yaku tsakirqanna. Tsay karqan mushuq wata qalaykunan junaqmi. Tsay junaqmi arcata kicharkur Noé rikarqan patsa tsakishqatana.
14 Ishkay kaq killacho ishkay chunka qanchis (27) junaq kaykaptinmi kay patsa tsakishqana kaykarqan.
15 Tsaymi Noéta Tayta Dios kayno nirqan:
16 “Kananqa warmikiwan, tsurikikunawan y lumtsuynikikunawan arcapita yarqupäkuyna.
17 Tsaynöpis lapan casta uywakunata qarquyna ashmana kaqkunata, mana ashmana kaqkunata, pachalanpa, lätaypa puriqkunata y lapan casta päriqkunatapis maytsaypa aywar intëru patsacho mirananpaq”.
18 Tsayno niptinmi Noé yarqurqan warminwan, tsurinkunawan y lumtsuyninkunawanpis.
19 Tsaynölami yarqupäkurqan ashmana kaq y mana ashmana kaq uywakuna, pachalanpa, lätaypa puriqkuna y lapan casta päriqkunapis.
20 Yarqurkurnami Noé juk *altarta perqarqan TAYTA DIOSTA adorananpaq. Nirkurmi cada casta *püru kaq uywakunapita y päriqkunapita pishtarkur altarcho sacrificiuta rupatsirqan.*
21 Tsayno rupatsiptinmi ali asyayninta* mayar TAYTA DIOS kushikurqan. Tsaymi kayno nirqan: “Runakunaqa wamra kashqanpita patsami shonqun munashqanno jutsata rurar kawapäkun. Tsayno kawaptinpis kay patsata yapayqa manami maldicionashaqtsu. Kanan ushakätsishqänöqa manami kay patsacho kawaqkunata ushakätsishaqnatsu.
22 “Kay patsa manaraq ushakashqanyaqqa runakuna murukunqami y cosechanqami.Tsaynöpis kanqami qasaypis, shanaypis, usyapis, tamyapis, junaqpis y tsakaypis”.
Ichic wilacuycuna
^ arca Arcaqa jatunkaray atska cuartuyuq büquimi karqan. Pelötawan puklakuna pampapitapis mas jatunmi karqan. Tayta Dios niptinmi arcata Noé rurarqan. Tsay arcamanmi diluviupita salvakärinanpaq Tayta Dios nishqanno Noé, warmin, tsurinkuna, lumtsuyninkuna y tukuy casta uywakunapis yaykurqan (Gén. 6.9–9.17).
^ 8.7 Cuervuqa yukishpita mas jatun yanami kaykan.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 8.20 Lev. 1.1-7.
^ 8.21 Wakin runakunaqa mushkuyninta nipäkun.
