Génesis 39:1-23
39 Ismaelita negociantikuna Egiptuman Joséta chayatsiptinnami Potifar rantirqan. Potifar karqan Faraónpa wardiankunapa capitanninmi.
2 TAYTA DIOS paywan kaptinmi* José rurashqanqa lapanpis ali karqan. Tsaynöpis patronninpa wayinchömi tarqan.
3 TAYTA DIOS yanapaykashqanta tantiyarmi
4 patronnin pasaypa kuyar Joséta churarqan wayincho mandaq kananpaq y lapan imaykankunatapis rikananpaq.
5 Tsaypita patsami Potifarta TAYTA DIOS yanaparqan. Tsaymi imaykankunapis atskayarqan y mikuyninpis shumaq wayurqan.
6 Imaykankunatapis Josépa makinman churaykur Potifarqa manami yarpachakuqnatsu.
Joséqa pasaypa kuyaylapaq mözumi karqan.
7 Tsaymi Potifarpa warminqa kuyakurkushpan kayno nirqan: “¡Noqawan kakushun!”
8 Tsayno niptinmi José kayno nirqan: “Tsaytaqa manami ruraykushwantsu, mamïta. Patronnïqa yärakamashpanmi lapan imaykantapis makïman churamushqa. Tsaymi lapantapis shumaq rikaptï tranquïlu purikun.
9 Patronnïqa manami noqata yärakamashqannöqa pitapis yärakuntsu. Qamtami itsanqa warmin kaptiki makïman mana churamushqatsu. Tsayno yärakaykämaptinqa ¿imanöparaq Tayta Diosta rabyanätsir jutsata rurayküman?”
10 Tsayno niykaptinpis waran waranmi tsay warmi Joséta qatiraq. Tsayno qatiraptinpis Joséqa manami paywan punuyta ni cäsupaytapis munarqantsu.
11 Juk kutichömi rurayninkunata rurananpaq wayiman José yaykurqan. Tsay höra manami pipis wayicho karqantsu.
12 Tsaymi Potifarpa warminqa Joséta röpanpita tsarirkur kayno nirqan: “¡Kanan jukla punushun!”
Tsayno nir tsarikurkuptinmi röpanta loqtiriykur qeshpir aywakurqan.
13 Röpanta loqtiriykur qeshpikuptinmi
14 Potifarpa warmin ashmayninkunata qayaykur kayno nirqan: “¡Runä apamushqan mözu manami respitamantsitsu! Kaykashqä kaqman yaykaykamur tsaripakamayta munaptinmi fiyupa qaparashqä.
15 Tsaymi röpanta kachariykur qeshpir aywakushqa”.
16 Tsayno wilaparkurmi Josépa röpanta churarqan runan kutimunanyaq.
17 Chayaykuptinnami ashmayninkunata wilashqannöla runantapis wilapar kayno nirqan: “Tsay rantimushqayki hebreo mözumi punukunäman yaykaykamur tsaripakamayta munamashqa.
18 Qaparaptïmi röpanta kachariykur qeshpir aywakushqa.
19 Tsaynömi imaykaykitapis rikananpaq churashqayki ali ashmayniki portakushqa”.
Warmin tsayno wilaptinmi Potifarqa fiyupa rabyarqan.
20 Tsaymi Faraónpa ashmayninkuna watarashqan carcilman Joséta watatsirqan.
21 Carcilchöpis TAYTA DIOS yanapaptinmi* prësukunata cuidaq runapis Joséwan yachanakurqan.
22 Tsaymi lapan prësukunata Josépa makinman carcilcho mandaq churarqan. Joséraqmi prësukuna imata rurananpaqpis mandaq.
23 TAYTA DIOS yanapaptinmi José rurashqan imapis ali karqan. Tsaymi cárcel cuidaq runaqa mana yarpachakuqnatsu Josépa munaynincho kaqkunapaq.
