Génesis 32:1-32
32 (2) Tsaypita aywakuptinmi Jacobta Tayta Diospa *angilninkuna tariparqan.
2 (3) Angilkunata rikaykur Jacob kayno nirqan: “Kaychöqa Tayta Diospa soldädunkunapa campamentunchaq kaykan”.
Tsayno nirmi tsay partipa jutinta churaparqan Mahanaim* jutin kananpaq.
3 (4) Tsaypitanami Jacobqa ashmayninkunata kacharqan kutiykashqanta wawqin Esaúta wilananpaq. Esaúqa taykarqan Seircho kaykaq Edomchömi.
4 (5) Manaraq kacharmi tsay ashmayninkunata yätsirqan kayno ninanpaq: “Tayta Esaú, wawqiki Jacob kaynömi nin: ‘Aywakushqäpita patsami Labánpa makincho tashqä.
5 (6) Kananqa kaykanmi wäkäkuna, bürrükuna, uyshäkuna y cabräkunapis. Tsaynöpis kaykanmi olqupis y warmipis ashmaynïkuna. Tsaymi wilakatsimü kuyapämänaykipaq’ ”.
6 (7) Ashmayninkuna kutiykurmi Jacobta kayno nirqan: “Aywapäkushqänami wawqiki Esaúta wilanäpaq. Kananqa kikinmi chaskikushunaykipaq aywaykämun chusku pachak (400) runakunata pushakurkur”.
7 (8) Tsayno wilaptinmi Jacob fiyupa mantsakushpan yarpachakurqan. Tsaymi ishkay puntaman rakirqan paywan kaykaq runakunata. Tsaynölami ishkay puntaman rakirqan uyshankunata, cabrankunata, wäkankunata y *camëllunkunatapis.
8 (9) Tsayno rurarqan kayno yarpachakurmi: “Esaú jukaq puntata atacaptin imaptinqa jukaq puntalapis qeshpinqami”.
9 (10) Nirkurnami Tayta Diosta kayno nir manakurqan: “Awkilü Abraham y papänï Isaac yärakushqan TAYTA DIOS, kikikimi nimarqayki aylükuna tashqan partiman kutikamunäpaq. Tsaynöpis nimarqayki yanapamänaykipaq kashqantami.
10 (11) Mana cäsukuq kaptïpis kuyapämashpaykimi yanapamashqanki. Kaypita aywakur Jordán mayuta pasarqä tukruläwanmi. Kananqa uywäkuna y noqawan aywaqkuna ishkay puntaman rakinäpaqpis aypannami.
11 (12) Wawqï Esaúpita tsapaykalämay, Tayta. Fiyupami mantsakü noqatapis warmïkunatapis y tsurïkunatapis wanutsimänanpaq kashqanta yarpar.
12 (13) Qam nimarqayki yanapamänaykipaq kashqantami, Tayta. Tsaynöpis nimarqayki lamar kuchuncho aquyshanöraq yupaytapis mana atipaypaq kashqanno noqapita miraqkunapis kananpaqmi”.*
13 (14) Tsay tsakayqa tsaylachömi Jacob punurqan. Patsa wararkuptinnami uywankunapita rakirqan wawqin Esaúta qarananpaq*.
14 (15) Wawqinpaq rakishqan uywakunami karqan ishkay pachak (200) cabrakuna, ishkay chunka (20) chïvukuna, ishkay pachak (200) uyshakuna, ishkay chunka (20) carnikuna,
15 (16) kimsa chunka (30) camëllukuna wawantin, chusku chunka (40) wäkakuna, chunka turitukuna, ishkay chunka (20) china bürrukuna y chunka orqu bürrukunapis.
16 (17) Tsayno rakirkurmi uywakunata qatinanpaq ashmayninkunata kayno nirqan: “Rakishqä uywakunata karu karu qatikurkur qamkuna nawpakuy”.
17 (18) Nirkurmi puntata qatiq kaqta kayno yätsirqan: “Capazchari Esaú kayno nir tapushunkimanpis: ‘¿Pitaq patronniki? ¿Maypataq aywaykanki? ¿Pipa uywantataq qatiykanki?’
18 (19) Tsayno tapushuptiki kayno ninki: ‘Wawqiki Jacobmi kay uywakunata qampaq qatiykätsiman, tayta. Qepatami kikinqa aywaykämun’ ”.
19 (20) Punta kaq ashmayninta yätsishqannölami wakin kaq ashmayninkunatapis Jacob yätsirqan.
20 (21) Jacobqa yarparqan apatsishqan uywakunata rikaykur wawqin Esaúpa rabyaynin pasananpaq kashqanta, nirkur kushishqawanna tinkunanpaq kashqantami. Tsaynöpis ashmayninkunata Jacob yätsirqan Esaúwan tinkurqa kayno ninanpaq: “Qepatami Jacob aywaykämun”.
21 (22) Tsaynömi Esaúta qarananpaq rakishqan uywakunata puntanta qatitsirqan. Nirkurnami Jacobqa patsakushqalancho quëdakurqan.
Angilwan Jacob pelyashqan
22 (23) Tsay tsakaymi Jacobqa ishkan warminkunata, ishkay ashmaynin warminkunata y chunka juk tsurinkunata Jaboc mayu vädupa pasatsirqan.
23 (24) Tsaynölami lapan imankunatapis pasatsirqan.
24 (25) Nirkur kikilanna quëdakurqan. Tsay tsakaymi Jacobwan juk runa warayta pelyarqan.
25 (26) Jacobta imanöpapis vinciyta mana puëdirmi tseqlaman tinkuq mama chanka moqunta moqaratsirqan.
26 (27) Tsaymi tsay runa Jacobta kayno nirqan: “Patsa waraykannami. ¡Kachamayna!”
Tsayno niptinmi Jacob kayno nirqan: “Bendicionta manaraq qomaptikiqa manami kachashaykitsu”.
27 (28) Tsawraqa Jacobta tapurqan kayno nir: “¿Imataq jutiki?”
Tsaymi nirqan: “Noqapa jutïqa Jacobmi”.
28 (29) Tsawraqa kayno nirqan: “Kananpita manami Jacobnatsu jutiki kanqa, sinöqa Israelnami.* Tsayno jutiki kanqa Dioswanpis runakunawanpis pelyar vincishqaykipitami”.*
29 (30) Tsaypita Jacobpis tapurqan: “Qampa jutikiqa ¿imataq kaykan, tayta?”
Tsayno tapuptinmi tsay runa nirqan: “¿Imapaqtaq jutïta tapumanki?”
Nirkurnami Jacobta bendicionninta qorqan.
30 (31) Aywakuptinmi Jacob kayno nirqan: “Tayta Dioswanmi senqa senqa tinkushqä. Tsayno tinkuykarpis manami wanushqätsu”.
Tsaypitami tsay partipa jutinta churaparqan Peniel jutin kananpaq.*
31 (32) Peniel partipita Jacob aywaykaptinmi inti jeqarkamurqan. Mama chankan moqashqa kaptinmi weqruylapa aywaykarqan.
32 (33) Jacobpa mama chankan moqashqa kaptinmi Israel runakunaqa uywata pishtar kananyaqpis mana mikuntsu tseqlanman tinkuq anku ankunta.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 32.2 Mahanaim ninanqa ishkay campamentu ninanmi.
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ 32.12 Gén. 22.17.
^ 32.13 Wakin runakunaqa regalananpaq nipäkun.
^ 32.28 Israel ninanqa Tayta Dioswan pelyaq ninanmi.
^ 32.28 Gén. 35.10.
^ 32.30 Peniel ninanqa Diospa cäran ninanmi.
