Génesis 19:1-38
19 Patsa tsakaykaptinnami Sodomaman chayarqan nawpaq ishkay *angilkuna. Lotnami jamaraykarqan markaman yaykuna sawan punkucho. Rikaykurmi paykunapa nawpanman Lotqa qonqurpakuykurqan urkunpis pampaman töpashqanyaq.
2 Tsaymi paykunata kayno nirqan: “Taytakuna, wayïman aywaykuläshun patsakärinaykipaq. Tsaychömi chakikita maylakärinkipaq. Nirkur wara tutanami pasakärinkipaq”.
Tsayno niptin paykuna kayno nirqan: “Yusulpäki, tayta. Noqakunaqa pläzalachömi waräkärishaq”.
3 Tsayno mana munaykaptinpis yaparir yaparir Lot ruwaptinmi wayinman patsakuq aywapäkurqan. Tsaychömi Lotqa levadüraynaq tantata rurarkatsir y ali mikuyta yanukarkatsir mikupäkurqan.
4 Lotpa wayincho mayqanpis manaraq punuptinmi Sodoma markacho taq lapan runakuna juntapaykurqan mözupita qalaykur hasta awkis runakunayaq.
5 Nirkurmi qayapar Lotta kayno nipäkurqan: “¿Maytaq wayikiman patsakamuq runakuna? ¡Paykunata jukla qarqamuy tsaripakunäpaq!”
6 Tsayno nipäkuptinmi wayipita Lot yarqurir punkuta shumaq wichqarkur
7 tsay runakunata kayno nirqan: “Qorpäkunataqa imatapis ama ruraykulaytsu, taytakuna.
8 Paykunata imatapis ruranaykipa trukanqa ishkay warmi tsurïkunata qarqapämushayki munashqaykita rurapäkunaykipaq. Tsurïkunaqa manaraqmi runata reqinraqtsu. Wayïman patsakamuq runakunataqa ama imatapis ruraykulaytsu”.
9 Tsayno niptinpis runakuna nipäkurqan: “¡Qamqa washata ayway! ¿Jäpa runa kaykarku noqakunata mandayta munapäkamanki? ¡Kananmi itsanqa paykunata ruranäpaq kashqanpitapis mas peorraq rurashayki!”
Tsayno nirmi Lotta wakpita kaypita maqarkur aywapäkurqan wayi punkuta amipäkunanpaq.
10 Tsaymi qorpankunaqa Lotta tsutaypa wayi ruriman yaykarkatsir punkuta trancakarkamurqan.
11 Nirkurnami waqtacho karkaykaq runakunata qaprayätsirqan mözukunapita qalaykur awkin runakunayaq. Tsaymi wayi punkuta ashiykashqalancho utikarqan.
12 Tsaypitanami qorpankuna Lotta kayno nirqan: “¿Mas ayluykikuna kay markacho kanku? Ayluykikuna kaptinqa warmitapis, olqutapis, mashayki kananpaq kaq mözukunatapis lapanta pushakurkur kay markapita qeshpikäriy.
13 Atskaqmi Tayta Diosman quejakushqa kay markacho runakuna jutsa ruraq kashqanta. Tsayno jutsasapa kapäkuptinmi noqakunata kachamashqa kay markata chipyaq ushakätsinäpaq”.
14 Tsayno niptinmi Lot aywarqan mashan kananpaq kaq mözukunaman kayno ninanpaq: “¡Kay markapita lapantsi aywakushun! ¡Tayta Dios kay markata ushakätsinanpaqnami kaykan!”
Tsayno niptinpis Lot brömapashqanta yarparmi mana criyipäkurqantsu.
15 Patsa waraykaptinna Lotta angilkuna kayno nirqan: “Kay markata ushakätsiptï mana wanunaykipaq jukla aywakuy warmikita y ishkan tsurikita pushakurkur”.
16 Jukla mana yarquptinmi angilkuna Lotta, warminta y tsurinkunatapis makipita jancharkur markapita jorqurqan. Tayta Dios kuyapashpanmi mana ushakänanpaq tsayno jorqurqan.*
17 Markapita karucho kaykaptinnami juknin kaq ángel kayno nirqan: “Mana wanunaykipaq qepapa mana tikraypa warakayla qeshpikäriy. Pampacho mana ichiypa jukla jirkayaq aywakäriy”.
18 Tsayno niptinmi Lotqa kayno nirqan: “¡Ichiklata shuyaykamayraq, taytakuna!
19 Qamkunaqa ali runa karmi kuyapämar mana wanunäpaq jorqamashqanki. Itsanqa jirkayaqqa qeshpiyta manami kamäpakushaqtsu. Markata jukla ushakätsiptikiqa lätaykachaykaqtachari taripamanqa.
20 Taqay taksha markalaman qeshpirkunäyaq shuyaykuy, taytakuna. Tsay takshala markataqa ama ushakaykatsilaytsu”.
21 Tsawraqa ángel kayno nirqan: “Manakamashqaykino katsun. Taqay taksha markata manami ushakätsishaqtsu.
22 Tsawraqa jukla tsay markaman qeshpikäriy. Tsayman manaraq chayaptikiqa ushakätsinäpaq kaq markata manami ushakätsishaqraqtsu”.
Tsaypita patsanami tsay markapa jutinta churaparqan Zoar* jutin kananpaq.
23 Inti mashtaykaptinnami Zoarman Lot chayarqan.
24 Chayaykuptinnami Sodoma y Gomorra markakunaman TAYTA DIOS tamyatsimurqan azufriwan talushqa ninata.
25 Tsay markakuna kashqan pampakunachömi runakunata, uywakunata y lapan imaykatapis chipyaq nina usharqan.*
26 Lotpa warminmi* itsanqa qeshpiykashqancho qepapa tikraykur kachi rumiman tikrarqan.
27 Tsaypita jukaqnin tutanami Abraham aywarqan TAYTA DIOSWAN parlashqan kaqman.
28 Tsaypitami rikärirqan Sodoma y Gomorra markakunapita hornupitanöraq qoshtay sharkuykaqta.
29 Tsaynömi Tayta Dios ushakätsirqan Lot tashqan pampacho kaq markakunata. Tsayno ushakätsirpis Abraham manakushqa kaptinmi Lotta tsay markakunapita qeshpitsirqan.
Lotpa warmi tsurinkuna imanöpa wawayuq rikakushqanpis
30 Tsaypitami Lot pasaypa mantsakurqan Zoarlacho tayta. Tsaymi ishkan warmi tsurinkunata jalqaman pushaykur machaylacho tarqan.
31 Tsaychömi qechpa kaq jipash nananta kayno nirqan: “Papänintsiqa awkinnami kaykan. Kaychöqa manami olqu runakuna kantsu noqantsiwan tänanpaq.
32 Tsayno kaykaptinqa papänintsita shinkarkatsir paywan punushun noqantsicho tsurin yurishpan ayluntsikuna mana ushakänanpaq”.
33 Tsawraqa wilanakushqan tsakaylami papäninta vïnuwan shinkatsirqan. Nirkurnami qechpa kaq jipash papäninwan punurqan. Papäninqa shinkashqa kar manami mayarqantsu imay höra tsurin yaykapashqantapis ni yarqushqantapis.
34 Waraynin* junaqnami qechpa kaq jipash shulka nananta kayno nirqan: “Qanyan tsakaymi papänintsiwan punushqä. Kanan tsakay qampis paywan pununaykipaq yapay shinkatsishun. Tsaynöpami papänintsi aylu mana ushakanqatsu”.
35 Tsayno nirmi tsay tsakay papäninta yapay upyatsirqan. Nirkurmi shulka kaq tsurinna papäninwan punurqan. Pasaypa shinkashqa karmi papäninqa mana mayarqantsu imay höra tsurin yaykapashqantapis ni yarqushqantapis.
36 Tsaynöpami Lotpa ishkan tsurinkuna qeshyaq rikakurqan taytanpata.
37 Mayor kaq wacharqan olquta. Tsay wamrapa jutinmi karqan Moab. Paypita miraqkunami moabita runakuna karkaykan.
38 Shulka kaq jipashpis wacharqan olqulatami. Tsay wamrapa jutinnami karqan Ben-ammi. Ben-ammipitanami amonita runakuna karkaykan.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 19.22 Zoar ninanqa takshala ninanmi.
^ 19.24-25 Mat. 10.15; 11.23-24; Luc. 10.12; 17.29; 2Ped. 2.6; Jud. 7.
^ 19.26 Luc. 17.32.
^ 19.34 Wakin runakunaqa warantin nipäkun.
