Eclesiastés 2:1-26
2 Tsaynöpis yarpaynilächo kayno nirqä: “Kanan mä kushikunäpaq shonqü munashqanta imatapis rurashaq”.
Tsayno kawashqäpis manakaqlapaqmi kaykan.
2 Tsaymi kushikushqäpis y gustüta rurashqäpis manakaqlapaq kashqanta tantiyakushqä.
3 Tsaynölami ali ruraykuna y lutan ruraykuna imano kashqantapis musyanäpaq mana tantiyakuq runano vïnuta upyarqä. Tsayno upyarqä ali o mana ali kashqantapis tantiyanäpaqmi.
4 Tsaynöpis obratami ruratsishqä. Palaciukunatapis arutsishqä.* Üvatapis atskatami plantatsishqä.
5 Huertata ruraykurmi imayka niraq waytakunatapis plantatsishqä. Tsaynölami tukuy casta frütakunatapis plantatsishqä.
6 Plantatsishqäkunata parqutsinäpaqmi jatusaq pözukunata ruratsishqä.
7 Ashmaytapis atskatami olqutapis warmitapis rantishqä. Makïcho yuriq ashmaynïkunapis kashqami. Jerusaléncho unay taq runakunapa wäkankunapita y uyshankunapitapis mas atskami wäkäkuna y uyshäkunapis kashqa.
8 Wakin reykunapata y wakin provinciakunapatami qorintapis y qellaynintapis muntuy muntuytami impuestuta cobrar shuntashqä. Cantapämaqkunapis atskaqmi olqupis warmipis kashqa. Gustükunata rurarmi warmikunatapis atskaqta tsararashqä.*
9 Jerusaléncho taq unay runakunapitapis mas reqishqa y mas rïcumi kashqä.* Imaypis tantiyakuqmi kashqä.
10 Imatapis shonqü munashqantaqa lapantami kushishqa rurashqä. Tsay kushikushqämi pägü kashqa lapan rurashqäkunapita.
11 Tsayno kaptinpis yarpachakurmi tantiyakurqä kay patsacho fiyupa nakar rurashqantsikuna manakaqlapaq kashqanta. Tsaymi rurashqantsikunaman atiënikurqa wayrata tsariyta munaqno kaykantsi.
Tantiyakuq y mana tantiyakuq runapis ushakaqla kashqan
12 Noqa musyashqäpita mastaqa trukä yaykuq rey manami imatapis musyanqatsu. Tsaymi tantiyakuq kashqan y mana tantiyakuq kashqan imano kashqantapis tantiyatsinäpaq yarpachakushqä.
13 Yarpachakurmi tantiyakushqä tsakaypita atski mas ali kashqanno tantiyakuq kay mas ali kashqanta.
14 Tantiyakuq runaqa imatapis tantiyakunmi. Mana tantiyakuq runami itsanqa tsakäpakushqano kar imatapis mana tantiyantsu.
Tsayno kaptinpis tantiyakushqämi tantiyakuq y mana tantiyakuq runapis iwal ushakashqanta.
15 Tsaymi yarpachakur kayno nirqä: Mana tantiyakuq runano noqapis wanunäpaq kaykaptinqa tantiyakuq kashqäpis ¿imapaqtaq välin? Tsaymi tantiyakurqä tantiyakuq kaypis manakaqlapaq kashqanta.
16 Wanuptinqa tantiyakuqtapis y mana tantiyakuqtapis qonqaykärinqami. Tantiyakuq runa y mana tantiyakuq runapis iwal ushakaqlami kaykan.
17 Tsayta tantiyakurirmi pasaypa lakikur ima ruraytapis mana munarqänatsu. Tsaykunata tantiyayta munar wayrata tsariyta munaqnömi kaykantsi.
Arushqantsipis ushakaqla kashqan
18 Tsaynöpis tantiyakushqä wanukuptï qepa yuriq runa lapan rurashqäkunata probichananpaq kashqantami. Tsayta tantiyakurmi fiyupa lakikushqä.
19 Kay patsacho tsayjina nakar y shumaq tantiyakuykur rurashqäkunata tsararänanpaqqa ¿tantiyakuq runatsuraq o upa runatsuraq kanqa? Shumaq tantiyakuptintsiqa kay vïdacho lapan rurashqantsikunapis manakaqlapaqmi kaykan.
20 Kay patsacho pasaypa nakar rurashqäkuna ushakaqla kashqanta tantiyakurmi shonqüpis nanaptinraq lakikurqä.
21 Shumaq yarpachakuykur arushqantsitapis wanukurqa mana yanapamaqnintsikunatami kachapaykuntsi. Tsaypis manakaqlapaq y mana alimi kaykan
22 Runaqa waran waran pasaypa yarpachakularmi kawan. Aruytapis nakarmi arun. Aybësis punuytapis manami tarintsu. Tsayno kaptinpis kay patsacho fiyupa nakar arushqanpita ¿imatataq jorqun? Tsayno kaptinqa arushqantsikunapis manakaqlapaqmi kaykan.*
23 -
24 Tsayno kaykaptinqa kawashqantsiyaq kushishqa mikushun, upushun y arushun. Kushishqa kawanantsipaqmi Tayta Dios kamamashqantsi.
25 Tayta Dios mana yanapamaptintsiqa manami pipis kushishqa kawanmantsu.
26 Kuyashqan kaqtami Tayta Dios yanapan tantiyakuq, yachaq y kushishqa kawananpaq.* Jutsa ruraq runatami itsanqa mana yanapantsu. Tsaymi tsay runa arun Tayta Dios munashqanno kawaq runa probichanalanpaq.* Mayjina arurpis wayrata tsariyta munaqnömi kaykan.
Ichic wilacuycuna
^ 2.4 1Rey. 7.1-12.
^ 2.7-8 1Rey. 9.28; 10.10-27; 2Crón. 9.22-27.
^ 2.9 1Crón. 29.25.
^ 2.26b Job 27.16-17; Prov. 13.22.
