Eclesiastés 1:1-18
1 Kaycho qelqaraykan yachatsikuq runa wilakushqanmi. Payqa Davidpa tsurin karmi Jerusaléncho rey karqan.
2 Paymi yachatsikuq kar kayno nirqan:“¡Imaykapis manakaqlapaqmi kaykan!¡Kay patsacho pasashqankuna imanir y imapaq kashqantapis manami tantiyayta kamäpakuntsitsu!
3 ¡Imatataq runa jorqun kay patsacho mayjina arurpis!
4 “Maytsaychöpis itikuna yuriykanmi y runakunapis wanuykanmi.Tsayno kaptinpis kay patsaqa kashqalanmi kaykan.
5 Intipis mana utikaypami yarqamunpis y jeqarpunpis.Yapay yarqamunalanpaqmi kashqanman kutin.
6 Tsaynölami wayrapis sur kaq lädupa aywarkur norti kaq läduman kutin.Mana chawaypami imaypis tumaykan.
7 Lapan mayukunapis lamarlamanmi aywan.Tsayno kaptinpis lamarqa manami imaypis juntantsu.Pukyukunapami yaku yapay yarqamun.Nirkurmi imaypis aywashqanno yapay raqrapa aywan.
8 Lapanpis tsaynöla kaptinmi pasaypa lakikü.Pasaypa lakikushqätapis manami shumaq tantiyatsiyta kamäpakütsu.Imaykata runa rikaptinpis rikananpaq kaqkuna masraqmi kaykan.Atskata mayaptinpis mayananpaq kaqkuna masraqmi kaykan.
9 “Unay pasashqankunaqa yapaymi pasaykan.Nawpata rurakashqankunaqa yapaymi rurakaykan.Kay patsachöqa lapanpis unay kashqannölami kaykan.
10 Tsayno kaptinpis wakinqa kaynömi ninqa:‘¡Kaymi itsanqa imaypis mana pasashqatsu!’Tsayno niptinpis noqaqa kaynömi nï:‘Noqantsi manaraq yuriptintsi tsaypis maynami pasashqa.
11 Unay runakuna rurapäkushqanpis qonqakashqanami.Tsaynölami kanan rurashqantsipis qonqakanqapaq.Qepa yuriq runakuna rurashqankunapis qonqakashqami kanqapaq’ ”.
Lapan rurashqantsikuna manakaqlapaq kashqan
12 Noqa yachatsikuqqa Jerusalénchömi Israel runakunapa mandaqnin rey karqä.
13 Tsaymi imaykatapis kachaykur yarpachakushqä kay patsacho imanir lapan pasashqankunatapis tantiyanäpaq. Tsayta tantiyakunantsipaq Tayta Dios churamaptintsipis aläpa sasami kaykan.
14 Kay patsacho imanir lapan pasashqankunatapis tantiyayta munarqa wayrata tsariyta munaqnömi kaykantsi.
15 Imatapis wiksushqataqa manami derechayta kamäpakuntsitsu.Mana kaptinqa imatapis manami yupantsitsu.
16 Shonqulächo yarpachakurmi tantiyashqä pïmaypitapis mas tantiyakuq kashqäta. Jerusaléncho noqapita mas punta kaq reykunapitapis mas yachaqmi kä.*
17 Tsaymi yarpachakushqä ali ruraykuna y lutan ruraykuna imano kashqantapis musyanäpaq. Itsanqa tsayta tantiyakuyta munar wayrata tsariyta munaqnömi kaykantsi.
18 Mas yachaq karqa masmi uma nanayta tarinqa.Mas tantiyakuq karqa masmi lakikunqa.
Ichic wilacuycuna
^ 1.16-17 1Rey. 4.29-31.
