2 Timoteo 3:1-17
3 Timoteo, shumaq tantiyakuy ultimu tiempucho runakuna aläpa nakananpaq kashqanta.
2 Tsaymi runakuna kanqa kikilanpaq imatapis munaq, qellaylapaq wanuq, runa tukuq, Tayta Diospa contran parlaq, mamanta y taytanta mana cäsukuq, mana agradëcikuq y Tayta Diospa palabranta manakaqman churaq.
3 Manami kuyakuynin ni kuyapäkuyninpis kanqatsu. Tsaynöpis kanqa tumpakuq, mana tantiyakuypa imatapis lutala ruraq, runa mayinta chikiq y ali ruraqkunapa contran sharkuq.
4 Tsaynöpis kanqa traicionëru, mana yarpachakuypa imatapis ruraq y pasaypa yachaq tukuq. Tayta Dios munashqanta rurananpa trukanqa shonqun munashqalantami rurapäkunqa.
5 Runakuna rikanalanpaqmi Tayta Diosman yärakuq tukärinqa. Tsayno karpis jutsata rurarmi kawapäkunqa. Tsayno kawaq runakunawanqa ama juntakaytsu.
6 Tsay runakunaqa imayka jutsa ruraq warmikunapa wayinmanmi yaykapäkun engañananpaq.
7 Tsay warmikunaqa cadala yachakurpis Jesucristupa wilakuynintaqa manami imaypis tantiyakärintsu.
8 Janes y Jambres Moiséspa contran sharkushqannömi* lutan yachatsikuqkunapis Jesucristupa wilakuyninta wilakuq runakunapa contran sharkurkaykan. Lutan yarpaykuna umancho kaptinmi Jesucristupa wilakuyninta imaypis mana tantiyapäkuntsu.
9 Imano yachatsiptinpis lutan yachatsikuq kashqanta wawqi panikuna tantiyapäkunqami. Tsaymi Janesta y Jambresta mana cäsupashqanno tsay lutan yachatsikuqkunata pipis cäsupanqanatsu.
Pablo kawashqanno Timoteupis kawashqan
10 Qamqa yachatsishqäkunata shumaqmi chaskikushqanki. Kawashqänömi kawaykanki, yarpashqänömi yarpaykanki, criyishqänömi criyiykanki, nakarpis awantakushqänömi awantaykanki, kuyakuq kashqänömi kuyakuq kaykanki y nakatsimaptinpis pacienciakushqänömi pacienciakuykanki.
11 Musyankimi Antioquíacho,* Iconiucho* y Listracho* runakuna chikimar qatikachämashqanta. Tsayno chikimaptinpis Señor Jesucristumi salvamashqa.
12 Tsaynölami Jesucristo munashqanno kawaq kaqtaqa pitapis chikir nakatsipäkunqa.
13 Fiyu runakuna y engañakuqkunaqa waran waranmi pantakanqa. Wakin runakunata engañashqannömi kikinkunatapis engañapäkunqa.
Tayta Diospa palabranta yachakunanpaq tantiyatsishqan
14 Qam itsanqa Tayta Diospa wilakuynin ali kashqanta tantiyakur yachakushqaykinöla shumaq kaway. Pï yachatsishuqnikikuna kashqantapis musyankimi.
15 Tsaynöpis musyankimi wamra kashqaykipita patsa Tayta Diospa palabranta yachatsishushqaykita. Diospa palabranmi tantiyatsishushqanki Jesucristuman yärakur salvakunaykipaq kashqanta.
16 Tayta Diospa palabrancho lapan qelqaraykaqkunaqa Tayta Diospa yarpayninkunami kaykan. Tsaymi ali kaykan yachatsinantsipaq, tantiyatsinantsipaq, corriginantsipaq y Tayta Dios munashqanno kawanantsipaq.
17 Tayta Diospa palabranta yachakurmi Tayta Diosman yärakuqkuna imaypis kamarikushqa kaykanqa ali kaqkunata rurapäkunanpaq.
