2 Samuel 24:1-25
24 TAYTA DIOS yapay rabyashpanmi Israel runakunata castigayta munarqan. Tsaymi Davidpa yarpayninman churarqan Israel runakunata y Judá runakunata censananpaq.
2 Tsawraqa soldädunkunapa capitannin Joabta qayaykur rey David kayno nirqan: “Lapan trïbu Israel runakuna tashqanpa aywar Danpita hasta Beersebayaq censamunki ayka runakuna kashqantapis musyanäpaq”.
3 Tsawraqa Joab kayno nirqan: “¿Imanirtaq runakunata censayta munaykanki, tayta? TAYTA DIOSTA manakuptintsiqa pachak (100) kuti mastapis kawashqaykiyaqqa runakunata rikakätsimunmanmi”.*
4 Joab y capitankuna tsayno niptinpis rey Davidqa nishqanta manami chaskiparqantsu. Tsaymi capitankunawan Joab aywarqan Israel runakunata censapäkamunanpaq.
5 Jordán mayuta tsimparkur censayta qalaykurqan Aroer markacho taq runakunata y mayu kuchun markacho taq runakunatapis. Tsaypitanami Gad trïbu runakuna tashqan partipa censaraykar pasarqan hasta Jazer markaman chayananyaq.
6 Tsaypitana Galaad partipa y heteo runakuna tashqan Cades markapa censaraykar aywashpan Dan trïbu runakuna tashqanman chayapäkurqan. Tsaypita pasarnami censaraykar tumarqan Sidón markapa.
7 Tsaypitana shumaq murallashqa Tiro markapa pasar heveo runakuna y cananeo runakuna tashqan markakunapa censaraykar pasapäkurqan. Nirkurmi Judá trïbu runakuna tashqan sur kaq lädupa censaraykar pasarqan hasta Beerseba markayaq.
8 Isqun killa ishkay chunka (20) junaqta intërupa censayta usharkurmi Jerusalénman kutipäkurqan.
9 Rey Davidman kutiykurmi ayka runakunata censamushqantapis Joab wilarqan. Israelcho taq runakunata* censar tarirqan pusaq pachak waranqa (800,000) runakunata. Judácho taq runakunata censarnami tarirqan pitsqa pachak waranqa (500,000) runakunata. Lapan tsay censashqan runakunaqa guërraman aywapäkunanpaq kalpanchönami karqan.
Censashqanpita Tayta Dios castigashqan
10 Runakunata censatsiyta usharkurmi jutsata rurashqanta tantiyakur David pasaypa lakikurqan. Tsaymi TAYTA DIOSTA manakur kayno nirqan: “Runakunata censatsir pasaypami jutsata rurashqä. Kananqa perdonaykalämay, TAYTA DIOS. Tsaytaqa upa ruraytami rurashqä”.
11 Tayta Dios imata nishqantapis musyananpaqmi profëta Gadta David imaypis tapukuq. Tsaymi waraynin* tuta profëta Gadta TAYTA DIOS kayno nirqan:
12 “Davidman aywaykur wilanki kimsa castïgupita mayqantapis jukta akrananpaq. Akrashqan castïguwanmi castigashaq”.
13 Tsayno niptinmi David kaqman aywaykur Gad kayno nirqan: “Kimsa casta castïgupitashi mayqanta karpis jukta akranki. Jukshi kaykan qanchis wata kay nacioncho muchuy. Juknashi kaykan contraykikuna kimsa killa qatikachäshunaykipaq. Y juknashi kaykan intëru Israel nacioncho kimsa junaq fiyu qeshyawan qeshyapäkunanpaq. Kachamaqnï Tayta Diosta wilanäpaq shumaq yarpachakurir mayqantapis akrarkur wilamay”.
14 Tsawraqa Gadta David kayno nirqan: “¡Kananchi kananlaqa! Kananqa manami mayqantapis akrayta kamäpakütsu. Imano kaptinpis pasaypa kuyapäkuq kar TAYTA DIOS kikin castigamätsun. Conträ runakunapa munayninman itsanqa ama kachaykalämätsuntsu”.
15 Tsaymi tsay junaq tutapita qalaykur nishqan junaqyaq Danpita hasta Beersebayaq Israel runakunata pesti qeshyawan TAYTA DIOS castigarqan. Tsayno castigaptinmi qanchis chunka waranqa (70,000) runakuna wanurqan.
16 Kachamushqan *ángel Jerusaléncho taq runakunatapis wanutsinanpaqna kaykaptinmi TAYTA DIOS lakikurqan runakunata tsayno wanutsishqanpita. Tsaymi angilta kayno nirqan: “Amana wanutsiynatsu”.
Tsay höra TAYTA DIOSPA angilnin kaykarqan jebuseo runa Araunapa ëran kaqchömi.
17 Wanutsikuq angilta rikaykurmi TAYTA DIOSTA David kayno nirqan: “Tayta, manami Jerusalén runakunatsu jutsayuq kaykan, sinöqa noqalami. Runakunata censatsir jutsata rurashqäpitaqa noqata y aylükunata castigaykalämay”.
Tayta Diosta adorananpaq altarta David rurashqan
1 Crónicas 21.18-27
18 Tsay junaqmi David kaqman aywaykur Gad kayno nirqan: “Jebuseo runa Araunapa ëranman aywaykur TAYTA DIOSTA adorapäkunaykipaq *altarta ruray”.
19 Tsayno niptin David aywarqan TAYTA DIOS nishqannöla.
20 Rey David yanapaqninkunawan aywaykashqanta rikarmi Arauna taripaykur nawpanman qonqurpakuykurqan urkunpis pampaman töpashqanyaq.
21 Nirkur kayno nirqan: “¿Imalaraq kaykan watukamänaykipaq, tayta?”
Tsawraqa David kayno nirqan: “Ëraykita rantikamay TAYTA DIOSPAQ altarta tsaycho ruranäpaq. Tsay altarchömi sacrificiukunata rupatsishaq pesti qeshyawan runakuna manana wanunanpaq”.
22 Tsawraqa Arauna kayno nirqan: “Tayta, kaycho ëra kaykan. Sacrificiuta rupatsinaykipaq törükunapis kaykanmi. Yantata nistaptikipis jurquëtakuna y yügukuna kaykanmi. Tsaykunataqa lapantami kamaripäshayki, tayta”.
Mastapis kayno nirqan: “Rupatsishqayki sacrificiuta TAYTA DIOS chaskiykuläshunki”.
23 -
24 Tsayno niptinmi rey David kayno nirqan: “Yusulpalä, tayta. Alichari kanman. Imano kaptinpis qaramänaykipa* trukanqa rantikaykalämay. Qaraytukuylawanqa manami TAYTA DIOSNÏPAQ sacrificiuta apämantsu”.
Tsayno nirmi tsay ërata y törukunatapis David rantirqan pitsqa chunka (50) siclo qellaywan.*
25 Nirkurnami tsay ëracho altarta David rurarkatsir rupatsina sacrificiukunata y jawka kawakuy sacrificiukunata rupatsirqan. Tsaymi runakuna manakärishqanta mayar TAYTA DIOS manana pitapis pesti qeshyawan wanutsirqannatsu.
Ichic wilacuycuna
^ 24.3 Éxo. 30.12.
^ 24.9 Israelcho taq runakunapaq parlarqa norti läducho y Jordán mayu wak tsimpancho taq chunka trïbukunapaqmi parlarqan. Judácho taq runakunapaq parlarqa Judá y Simeón trïbu runakunapaqmi parlarqan.
^ 24.11 Wakin runakunaqa warantin nipäkun.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 24.24a Wakin runakunaqa regalamänaykipa nipäkun.
^ 24.24b Juk siclo qellayqa juk killa arur gänashqannömi karqan.
