2 Samuel 15:1-37
15 Tsaypitanami carrëtata y cawallukunata kamarikurkur pitsqa chunka (50) soldädukunata puntanta cörrinanpaq Absalón akrarqan.
2 Waran waranmi tsaka tsakala marka yaykuna punkuman Absalón aywaq. Tsaychömi David kaqman quejakuq aywaqkunata qayaykur mayqan trïbupita kashqantapis tapupaq. Wilaptinmi
3 Absalón kayno niq: “Rasun kaqtami qamqa quejakuq aywaykanki. Tsayno kaptinpis reypa yanapaqninkuna manami pipis kantsu quejakushqaykita arreglashunaykipaq”.
4 Tsaynöpis kayno niq: “¡Imanöparaq Israel nacionpa jueznin kayküman lapan quejakuqkunata shumaq arreglanäpaq!”
5 Tsaynölami nawpanman pipis qonqurpakuptin makipita jukla sharkarkatsir makalarkur mutsarkuq.
6 Davidman quejakuq aywaq runakunata tsayno rurarmi lapan Israel runakunapita Absalón kuyatsikurqan.
7 Chusku wata pasarkuptinnami rey Davidta Absalón kayno nirqan: “TAYTA DIOSTA promitishqäta cumplir sacrificiuta rupatsinäpaqmi Hebrón markapa aywayta munaykä, papä.
8 Siriacho kaykaq Gesur markacho kaykarmi TAYTA DIOSTA promitirqä kayno nir: ‘Tayta Dios, Jerusalénman kutitsimaptikiqa sacrificiuta rupatsirmi qamta adorashaykipaq’ ”.
9 Tsayno niptinmi rey David kayno nirqan: “Tsayno promitiykarqa ayway, hïju”.
Tsawraqa Absalón aywarqan Hebrón markaman.
10 Chayaykurmi wilakuqninkunata Absalón kacharqan Israel nación markakunaman kayno nir wilakunanpaq: “*Cornëtata tukamushqanta mayapäkushpayki lapayki kayno nipäkunki: ‘¡Absalónmi Hebróncho mandamaqnintsi rey!’ ”
11 Jerusalénpita Hebrónman aywarmi ishkay pachak (200) runakunata Absalón pusharqan. Tsay runakuna Absalónwan aywashpan manami musyarqantsu rey kayta munashqanta.
12 Tayta Diosta adorar sacrificiukunata rupaykätsishqan hörami Absalón qayatsirqan Gilo markacho taq Ahitofelta. Ahitofelqa karqan Davidpa yätsiqninmi. Ahitofelpis Absalónpa favornin sharkushqanta rikarmi mas atska runakuna Absalónpa favornin sharkurqan.
Jerusalénpita David qeshpishqan
13 Tsaymi David kaqman aywaykur wilakuq runa kayno nirqan: “Absalón rey kananpaq lapan Israel runakunami favornin sharkuykan”.
14 Tsawraqa Jerusaléncho kaykaq yanapaqninkunata qayaykatsir David kayno nirqan: “¡Jerusalénpita jukla aywakushun! Kaycho tarimashpantsiqa noqantsita y Jerusaléncho taq lapan runakunatami espädawan wanutsimäshun. Absalón chayamuptinqa manami mayqantsipis qeshpiyta kamäpakushunpaqtsu”.
15 Tsayno niptinmi yanapaqninkuna kayno nipäkurqan: “Noqakunaqa listumi kaykä nimashqaykita rurapäkunäpaq, tayta”.
16 Tsaymi rey Davidqa lapan aylunkunata y palaciuncho wakin taqkunatapis pushakurkur qeshpirqan. Chunka *concubïna warmilankunatami kachaykurqan palaciunta täpananpaq.
17 Lapan yanapaqninkunawan aywarmi rey David ichikuykurqan marka yarqunacho.
18 Capitanninkunawan tsaycho ichiraykaptinmi cereteo soldädukuna y peleteo soldädukuna nawpanpa pasapäkurqan. Tsaynöpis pasarqan soqta pachak (600) Gat runakuna. Tsay runakunaqa Gat markapita aywapäkurqan Davidta yanapananpaqmi.
19 Nirkurmi Gat markapita capitán Itaita rey David kayno nirqan: “Mana Israel runa kaykarqa noqawan ama aywaytsu. Mas alimi kanqa Jerusalénman kutiykur rey Absalón kaqcho quëdakuptiki.
20 Qanyankunaraq chayamushqa kaykarqa noqakunawan ama aywaytsu. Kikïpis manami musyätsu mayman aywanäpaq kashqantapis. Tsayno kaptinqa mas alimi kanman marka mayikikunata pushakurkur Jerusalénman kutikuptiki. TAYTA DIOS imaypis yanapaykuläshunki”.
21 Tsawraqa Itai kayno nirqan: “Mandamaqnï rey kaykaptikiqa maypa aywaptikipis wanuy kawaymi yanapashayki, tayta. Imaypis qamta yanapanäpaqmi Tayta Diospa jutincho qamta promitï”.
22 Tsayno niptin David kayno nirqan: “Tsayno nimaptikiqa aywashun”.
Tsaynöpami Gat markapita kaq Itai, paywan aywaq runakuna y paykunapa aylunkunapis Davidwan aywapäkurqan.
23 Nänipa aywaykaqta rikarmi runakuna pasaypa lakikur waqapäkurqan. Cedrón raqrata pasarmi rey David y paywan aywaq runakuna chunyaq jirkaman aywaq nänilapa aywapäkurqan.
24 Sadoc cürapis y Tayta Diospa *Pactu Babulninta apaq *levitakunapis Davidwanmi aywapäkurqan. Markapita yarqurirmi tsay babulta Abiatar cürapa nawpanman churapäkurqan lapan runakuna yarqushqanyaq.
25 Sadoc cüratami David kayno nirqan: “Tayta Diospa babulninta markaman kutitsiy. TAYTA DIOS yanapamaptinqa kutimur babulta y tolduntapis rikashaqraqmi.
26 Rey kanäta mana munaptinqa alfin imanäshaqtaq. Pay munashqannöchari lapanpis kanqa”.
27 Mastapis Sadoc cürata rey David kayno nirqan: “Qamqa tantiyakuq runami kaykanki. Tsayno kaykarqa cüra Abiatarwan, tsuriki Ahimaaswan y Abiatarpa tsurin Jonatánwan Jerusalénman kutipäkuy.*
28 Paykunawan wilakatsimushqaykiyaqmi Jordán mayu väducho shuyaräshayki”.
29 Tsayno niptinmi Tayta Diospa babulninta apakurkur Sadoc y Abiatar Jerusalénman kutipäkurqan.
30 Davidnami fiyupa lakikushpan uman shukutashqa y qara chakila Olivos jirkanpa waqaraykar witsarqan. Tsaynölami paywan aywaqkunapis uman shukutashqa waqaraykar witsäpäkurqan.
31 Tsayno aywaykaptinmi Davidta wilapäkurqan yätsiqnin Ahitofelpis Absalónta yanapaykashqanta. Tsawraqa TAYTA DIOSTA manakur David kayno nirqan: “TAYTA DIOS, Ahitofelpa yarpayninta pantaykatsilay Absalónta yätsirpis lutanta yätsinanpaq”.
32 Olivos jirkanman jeqarkurmi David chayarqan Tayta Diosta adorakunan kaqman. Tsaychömi tinkurqan Aracpita kaq Husaiwan. Paypis lakikushpan röpan rachishqa y umanman alpa winakushqami kaykarqan.
33 Paywan tinkurmi David kayno nirqan: “Noqawan aywarqa afannïpaqmi aywanki.
34 Tsaypa trukanqa Jerusalénman kutiykur Absalónta kayno ninki: ‘Papänikita yanapashqänölami kananqa qamtapis yanapashayki, tayta’. Tsayno niptikiqa capazchari chaskishunki yätsiqnin kanaykipaq. Churashuptiki Ahitofel yätsishqanta mana chaskipänanpaq shimita jatipanki.
35 Tsaychömi kaykanqa Sadoc y Abiatar cürakunapis. Palaciucho Absalón yanapaqninkunawan imata wilanakushqantapis paykunata jukla wilanki.
36 Sadocpa tsurin Ahimaas y Abiatarpa tsurin Jonatánpis tsaychömi kaykanqa. Paykunawan wilakatsimanki tsaycho ima pasashqantapis”.
37 Tsayno niptinmi Davidpa amïgun Husai Jerusalénman kutikurqan. Chayaykashqan hörami Absalónpis Jerusalénman chayarqan.
Ichic wilacuycuna
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ concubïna Concubïnaqa manami runapa legïtimu warmintsu karqan. Concubïnanwanqa manami pakaylapatsu purikurqan, sinöqa warminwannömi tarqan (Jue. 8.31; 19.1-4; 2Sam. 5.13; 15.16; 16.21-22; 20.3; Est. 2.9).
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 15.27 Imapaq kutinanpaq nishqantapis musyanaykipaq liyinki 2Sam. 17.15, 17.
