2 Crónicas 9:1-31
9 Salomón shumaq yachaq kashqanta mayarmi Sabá nacionpa mandaqnin warmi aywarqan pasaypa sasa tapukuykunata tapunanpaq. Atska ashmaynin runakunawanmi Jerusalénman chayarqan ali asyaq* jachakunata, atska qorita y kuyaylapaq chanin rumikunata *camëllukunawan cargashqa. Salomónman chayaykurmi lapan yarpashqankunata tapurqan.
2 Tapuylantami Salomónqa lapanta contestarqan. Ima tapushqanpis paypaqqa manami sasatsu karqan.
3 Salomón yachaq kashqanta y palaciunta ruratsishqanta rikarmi Sabá nacionpa mandaqnin warmi
4 pasaypa mantsakashqa rikakurqan. Tsaynöpis mantsakashqa rikakurqan ali mikuykunata rikar, mandäshiqninkunapa cuartunkunata rikar, ashmayninkunata y jatirashqan röpanta rikar, cöpa sirviqninkunata rikar y TAYTA DIOSPAQ sacrificiukunata templucho rupatsishqanta rikar.
5 Tsaymi rey Salomónta kayno nirqan: “Lapan rurashqaykita y yachaq kashqaykita nacionnïcho wilapäkamashqanqa rasunpami kashqa.
6 Tsayno wilamaptinpis kikï rikanäyaq manami criyirqätsu. Kananmi itsanqa tantiyakü wilapämashqanpitapis mas yachaq y mas rïcu kashqaykita.
7 Lapan rurashqaykita y shumaq tantiyakuykur parlashqaykita mayar ¡ima kushishqaraq mandäshishuqnikikuna y sirvishuqnikikuna karkaykan!
8 ¡TAYTA DIOSNIKI alabashqa kaykulätsun kuyashushpayki Israel nacionpa mandaqnin rey kanaykipaq churashushqaykipita! Israel runakunata imaypis kuyashpanmi rïcutapis waktsatapis ali rikanaykipaq churashushqanki. Pay munashqanno mandaptikimi Israel nación imayyaqpis kanqapaq”.
9 Nirkurnami Salomónta qaraykurqan* kimsa waranqa isqun pachak soqta chunka (3,960) kïlu qorita, atska perfümikunata y kuyaylapaq chanin cuestaq atska rumikunatapis. Salomónta qarashqan perfümikunatanöqa manami imaypis tsaytsika perfümita Israel nacionman apapäkamurqantsu.
10 (Tsaynölami rey Hirampa y rey Salomónpa negociunta apaq *büquikunawan Ofir partipita apapäkamurqan atska qorita, sándalo jutiyuq ali qerukunata y kuyaylapaq chanin cuestaq rumikunatapis.
11 Tsay sándalo qerupitami rey Salomón ruratsirqan TAYTA DIOSPA templunpa grädankunata y palaciunpa grädankunatapis. Tsaynöpis tukaqkuna tukananpaq ruratsirqan arpakunata y *salteriukunata. Manami imaypis Judáman chayatsipäkurqantsu sándalo qeruta tsayno atskataqa.)
12 Sabá nacionpa mandaqnin warmi apamushqanta qaraptinmi rey Salomónpis atska qaraykunata qararqan. Tsay jananmanmi tsay warmi imata manakushqantapis qararqan. Tsaypitanami mandaq warmiqa nacionninman ashmayninkunawan kutikurqan.
Salomón rïcuyashqan
1 Reyes 10.14-29; 2 Crónicas 1.14-17
13 Cada watami qorita Salomón chaskiq ishkay chunka ishkay waranqa (22,000) kïluta.
14 Tsay jananmanmi negociantikuna y Israel nacionman chayaq runakuna pägapäkushqan impuestutapis chaskiq. Tsaynölami Arabia nacionpa mandaqnin reykuna y Israel nacionpa gobernadorninkuna qorita y qellayta Salomónpaq apapäkuq.
15 Ishkay pachak (200) escüdukunatami rey Salomón qoripita ruratsirqan martilluwan takaylapa. Tsay escüdukuna cada ünun soqta kïlumi lasarqan.
16 Tsaynölami mas kimsa pachak (300) escüdukunata qoripita ruratsirqan martilluwan takaylapa. Tsay escüdukunaqa cada ünun kimsa kïlu maslanmi lasarqan. Tsaykunataqa Líbano Munti jutiyuq palaciunmanmi churatsirqan.
17 Tsaynölami trönuntapis *marfilpita ruraykatsir qori püruwan enchapatsirqan.
18 Trönu kashqan patakpis qoripitami karqan. Tsaynöpis ishkan lädunpami rikra tuknaräkunan karqan. Trönupa cada lädunchömi ruratsishqan juk león ichiraykarqan. Tsaynöpis trönuman soqta grädami witsararqan.
19 Grädakunapa nawpankunachöpis karqan chunka ishkay ruratsishqan leonkunami. Grädakunapa jukaq kuchuncho karqan soqta leonkuna y jukaq kuchunchönami karqan soqta leonkuna. Manami mayqan nacionpa mandaqnin reypis tsay trönutanöqa kuyaylapaqta ruratsirqantsu.
20 Rey Salomónpa cöpankunapis y Líbano Munti jutiyuq palaciucho kaykaq lapan manëjukunapis karqan qorilapitami. Qellaypita kaqtaqa Salomón rey kashqan witsan manami pipis cäsupaqtsu.
21 Rey Salomónpa *büquinkuna cada kimsa watacho rey Hirampa büquinkunawan juntu Tarsisman kutimur apamuq qorita, yoraq qellayta, marfilta, mönukunata y pävu realkunatapis.
22 Rey Salomónqa maytsay nación reykunapitapis mas rïcu y mas yachaqmi karqan.
23 Yachaq kananpaq Tayta Dios yanapaptinmi lapan nacionpitapis reykuna payman aywapäkurqan yachatsishqanta mayananpaq.
24 Aywarmi yoraq qellaypita y qoripita ruratsishqankunata Salomónpaq apapäkuq. Tsaynöpis apapäkuq röpakunata, armakunata, ali asyaq jachakunata, cawallukunata y mulakunatapis. Cada watami imaykatapis atskata Salomón chaskiq.
Cawallukunata y carrëtakunata Salomón rantishqan
1 Reyes 10.26-29; 2 Crónicas 1.14-17
25 Salomónpa karqan chusku waranqa (4,000) corralninkuna cawallukunata wichqananpaq y guërra carrëtankunata churananpaq. Tsaynöpis karqan chunka ishkay waranqa (12,000) cawallu muntakuqkuna.* Tsay cawallu muntakuqkunata wakinta churarqan guërra carrëtakuna kaykashqan cuartilkunacho kananpaq y wakintana churarqan Jerusalén palaciu cercacho kananpaq.
26 Salomónpa munayninchömi reykuna karqan Éufrates mayupita hasta Filistea nacionpa lindërunyaq y Egipto nacionpa lindërunyaq.*
27 Rey Salomón shuntatsishqan yoraq qellaypis shalanöraqmi Jerusaléncho tsaytsika karqan.* Tsaynölami cedru yöratapis *Sefelacho plantatsirqan hïgus yöranöraq tsaytsika kananpaq.
28 Egiptupita y wakin nacionkunapitami cawallukunata Salomónpaq rantimuq.*
Salomón wanushqan
1 Reyes 11.41-43
29 Rey Salomón rurashqankuna qalaykunanpita ushananyaq qelqaraykan profëta Natán qelqashqancho y Silupita kaq profëta Ahías qelqashqancho. Tsaynölami qelqaraykan Nabatpa tsurin Jeroboam imano kashqanpita profëta Iddo qelqashqancho.
30 Chusku chunka (40) watami Israel runakunata Jerusalénpita Salomón mandarqan.
31 Wanuykuptinmi pampapäkurqan taytan *Davidpa Markanman. Salomónpa trukannami tsurin Roboamna rey karqan.
Ichic wilacuycuna
^ 9.1 Wakin runakunaqa mushkuq nipäkun.
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ 9.9 Wakin runakunaqa regalaykurqan nipäkun.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ salteriu Salteriuqa taksha arpa niraqmi kaykan (1Sam. 10.5; 2Sam. 6.5; 1Rey. 10.12; 1Crón. 13.8; 15.28; 2Crón. 5.12; Sal. 33.2; 57.8; 81.2; Isa. 5.12).
^ marfil Marfilqa elefantipa waqshunmi kaykan (\xt 1Rey. 10.18; 22.39; Sal. 45.8; Cant. 5.14; 7.4; Amós 3.15; 6.4; Apoc. 18.12).
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 9.25 1Rey. 4.26.
^ 9.26 Gén. 15.18; 1Rey. 4.21.
^ 9.27 Deut. 17.17.
^ Sefela Sefelaqa Israel nacioncho jirkan jirkan partimi kaykan. Sefelapita inti jeqanan lädupami Mediterraneo lamar kaykan. Sefelapita inti jeqamunan lädupanami jirkakuna kaykan. Norti lädupita sur kaq läduyaqmi Sefela kaykan chusku chunka pitsqa kilömetruno. Inti jeqamunan lädupita inti jeqanan läduyaqmi chunka soqta kilömetruno kaykan. Sefelacho chakrakuna ali kaptinmi mikuykuna ali wayun. Filisteo runakunawan pelyarmi Israel runakuna Sefelacho kaykaq markakunata y chakrakunata qechunakärirqan (Jos. 10.40; 12.8; 1Rey. 10.27; 2Crón. 28.18).
^ 9.28 Deut. 17.16.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
