2 Crónicas 30:1-27
30 Tsaypitanami TAYTA DIOSPA templunman juntakaykur *Pascua fiestata rurapäkunanpaq* rey Ezequías intëru Israel nacionman y Judá nacionman kachakunata kacharqan. Tsaynölami Efraín trïbu runakunaman y Manasés trïbu runakunamanpis cartata apatsirqan tsay fiestaman shapäkamunanpaq. Tsay fiestata rurapäkurqan Israel runakunata kuyaq TAYTA DIOSTA adorapäkunanpaqmi.
2 Autoridäninkunawan y Jerusaléncho taq runakunawanmi rey wilanakurqan ishkay kaq killacho Pascua fiestata rurapäkunanpaq.
3 Wakin cürakuna manaraq purificakushqa kaptin y wakin runakuna Jerusalénman manaraq juntakashqa kaptinmi diyanchöqa Pascua fiestata mana rurapäkurqantsu.*
4 Qepakashqalapis Pascua fiestata rurananpaq wilanakurmi reypis y lapan runakunapis kushikärirqan.
5 Tsaymi Israel runakunata kuyaq TAYTA DIOSTA adorar Pascua fiestata rurapäkunanpaq wilakatsirqan Beersebapita qalaykur hasta Danyaq. Pascua fiestata lapan runakuna rurananpaq Tayta Dios nishqa kaptinpis atska watanami fiestata pay nishqanno rurapäkushqatsu karqan.
6 Tsawraqa rey y autoridäkuna qelqashqan cartata apakurkur kachakuna aywarqan Israel runakuna y Judá runakuna tashqan markakunaman. Cartakunata chayatsirmi liyiparqan kayno nishqanta:
“Israel runakuna, Asiria nacionpa mandaqnin reykunapa makinpita qeshpiykarqa TAYTA DIOSTA cäsukäriyna. Payqa Abraham, Isaac y Israel yärakushqan Diosmi kaykan. Cäsukäriptikiqa pay yanapashunkipaqmi.
7 “Unay ayluntsikunano y marka mayintsikunanöqa TAYTA DIOSPA contran ama sharkapäkuytsu. Contran sharkushqanpitami marka mayintsikunataqa rikashqantsinöpis wakinta ushakätsinanpaq y wakinta prësu apakärinanpaq TAYTA DIOS kachaparirqan.
8 “Unay ayluykikunanöqa chukru shonqu ama kapäkuytsu. Tsaypa trukanqa TAYTA DIOSTA cäsukur templunman shapäkamuy. Tsay templutami TAYTA DIOS akrarqan tsaycho imaypis tänanpaq. Payta cäsukur sirvipäkuptikiqa rabyaynin pasanqami.
9 “Tayta Diosta cäsukuptikiqa wawqikikunata y tsurikikunata prësu apaq juk lädu nación runakunapis kuyapashpan kacharimunqami nacionnintsiman kutimunanpaq. TAYTA DIOSNINTSIQA kuyapäkuq y yanapakuqmi kaykan. Jutsa rurayta kachariptintsiqa imaypis yanapamäshunmi”.
10 Kachakuna tsayno wilakurmi Efraín trïbu runakuna y Manasés trïbu runakuna tashqankunapa markan markan puripäkurqan hasta Zabulón trïbu runakuna tashqanyaq. Wilakushqanta mayarmi runakuna asipar manakaqman churapäkurqan.
11 Tsayno asipaptinpis wakin runakunaqa TAYTA DIOSTA cäsukurmi Jerusalénman aywapäkurqan. Jerusalénman aywaq runakunaqa karqan Aser trïbu runakunapita, Manasés trïbu runakunapita y Zabulón trïbu runakunapita.
12 Tsay runakunata Tayta Dios shakyätsishqannömi Judá runakunatapis Tayta Dios shakyätsirqan mandashqanno Pascua fiestata rurapäkunanpaq. Tsaymi rey y autoridäkuna wilakatsishqanno
13 ishkay kaq killacho tsaytsika runakuna Jerusalénman juntakaykur Levadüraynaq Tantata Mikupäkunan fiestata* rurapäkurqan.
14 Pascua fiestata rurayta qalaykunanpaqmi Jerusaléncho ïdulukunapaq perqashqan *altarkunata inciensuwan qoshtatsikuna altarkunata Cedrón raqraman lapanta jitapäkurqan.
15 Wakin kaq *levitakuna y cürakuna mana purificakushqa karmi penqaytukushqa jukla purificakärirqan. Nirkurmi rupatsina sacrificiukunata rupatsipäkunanpaq uywakunata TAYTA DIOSPA templunman apapäkurqan. Tsaymi ishkay kaq killa chunka chusku junaqcho Pascua fiesta sacrificiupaq apamushqan uyshakunata pishtapäkurqan.
16 Uyshapa yawarninta altarman tsaqtsupänanpaqmi levitakuna y cürakuna Tayta Diosta sirviq *Moisés qelqashqan leykunacho nishqanno churanakärirqan. Tsaymi uywakunata pishtaylanta yawarninta cürakunata levitakuna makyapäkurqan. Cürakunanami tsay yawarwan altarpa lädunkunata tsaqtsuparqan.
17 Uywakunata apamuq runakuna wakinqa manaraqmi purificakushqaraqtsu karqan. Tsaymi Pascua sacrificiupaq paykuna apamushqan uywakunata levitakunana pishtaparqan. Tsaynöpami uywata apamuq runakuna TAYTA DIOSPAQ consagrädu rikakurqan.
18 Manaraq purificakuq runakunaqa karqan Efraín trïbupita, Manasés trïbupita, Isacar trïbupita y Zabulón trïbupitami.
Mana purificakushqa karpis Pascua mikuyta mikuptinmi rey Ezequías TAYTA DIOSTA manakurqan kayno nir: “Tayta Dios, qamqa alilata ruraqmi kanki. Kay runakuna lapan shonqunwanmi nishqaykita cäsukur Pascua fiestata rurarkaykan. Tsawraqa mana purificakuypa Pascua mikuyta mikushqanpita paykunata perdonaykulay.
19 Qamqa kanki unay aylükuna yärakushqan TAYTA DIOSMI. Tsaynöpis nirqayki purificakushqa karraq Pascua mikuyta mikupäkunäpaqmi. Tsayno nishqa karpis perdonaykulay, Tayta”.
20 Rey Ezequías tsayno ruwakuptinmi runakunata TAYTA DIOS perdonarqan.
21 Jerusalénman juntakaq Israel runakunaqa pasaypa kushikushpanmi Levadüraynaq Tantata Mikupäkunan fiestata qanchis junaq rurapäkurqan. Cürakuna y levitakunami instrumentuta tukashpan TAYTA DIOSTA waran waran cantar alabapäkurqan.
22 Instrumentukunata tukar TAYTA DIOSTA kushishqa alabashqanpitami rey Ezequíasqa levitakunata felicitarqan.
Unay aylunkuna yärakushqan TAYTA DIOSTA adorar y ali kawakuy sacrificiukunata rurarmi qanchis junaq fiestata rurar mikupäkurqan.
23 Tsaypita lapan runakuna wilanakurkur juk semäna mas fiestata kushishqa rurapäkurqan.
24 Judá nacionpa mandaqnin rey Ezequías tsay fiestapaq churarqan waranqa (1,000) turitukunata y qanchis waranqa (7,000) uyshakunata y cabrakunata. Tsaynölami autoridäkunapis churarqan waranqa (1,000) turitukunata y chunka waranqa (10,000) uyshakunata y cabrakunata. Tsay fiestacho atska cürakunami purificakärirqan.
25 Tsay fiestachömi lapan Judá runakuna kushikärirqan. Tsaynölami kushikärirqan cürakuna, levitakuna, Israelpita shamuq runakuna, juk lädupita shamuq jäpa runakuna y Judácho taq jäpa runakunapis.
26 Davidpa tsurin Salomón rey kaykar fiestata rurashqanpita patsami Jerusaléncho fiestata tsayno mana rurapäkurqantsu. Tsaymi tsay fiestata rurar lapan runakuna pasaypa kushikärirqan.
27 Fiesta ushaynami cürakuna y levitakuna ichirkur Tayta Diosta manakärirqan runakunata bendicionta qonanpaq. Tsayno manakäriptinmi tashqan jana patsapita patsa Israel runakunata Tayta Dios bendicionninta qomurqan.
Ichic wilacuycuna
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ 30.3 Manami ishkay kaq killacho Pascua fiestata rurapäkunanpaqtsu Tayta Dios nirqan, sinöqa punta kaq killacho rurapäkunanpaqmi (Éxo. 12.2-3; Núm. 9.9-11; Deut. 16.1).
^ 30.13 Pascua fiestata rurayta usharkurnami jukaqnin junaq Levadüraynaq Tantata Mikupäkunan fiestata qanchis junaq rurapäkuq (Lev. 23.5-6). Tsaymi Ezequías kawashqan witsan Levadüraynaq Tantata Mikupäkunan fiestata y Pascua fiestata juklatsarkur rurapäkurqan.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
