2 Crónicas 25:1-28
25 Mandayta qalaykushqan witsan Amasíasqa ishkay chunka pitsqa (25) watayuqmi kaykarqan. Payqa ishkay chunka isqun (29) watami Jerusalénpita mandarqan. Mamanmi karqan Jerusalénpita Joadán.
2 Amasíasqa TAYTA DIOS munashqanno kawarpis wakin wakinchöqa manami cäsukurqantsu.
3 Rey kaykarnami papäninta wanutsiq capitankunata wanutsirqan.
4 Itsanqa manami tsay capitankunapa tsurinkunataqa wanutsirqantsu. Tsayno mana wanutsinanpaqmi *Moisés qelqashqan leykunacho TAYTA DIOSPA mandamientun kayno nir qelqaraykan: “Tsurinpa jutsanpita ama mamanta ni papäninta wanutsipäkunkitsu. Tsaynöpis mamanpa o papäninpa jutsanpita tsurinta ama wanutsipäkunkitsu. Tsaypa trukanqa jutsa ruraq kaqta wanutsipäkunki”.*
5 Nirkurnami Amasíasqa Judá trïbu y Benjamín trïbu runakunata qayaykatsir cada aylupa mandaqnin kananpaq juk soldäduta churarqan. Tsaypitanami ishkay chunka (20) watayuqpita janaman runakunata censatsirqan. Tsay censatsishqan runakunami karqan kimsa pachak waranqa (300,000). Paykunaqa guërracho espädawan pelyayta y escüduwan tsapakuytapis alimi yachaq.
6 Tsaypitanami kimsa waranqa kimsa pachak (3,300) kïlu qellayta pägaykur pachak waranqa (100,000) Israel nación soldädukunata minkakurqan pelyäshinanpaq.
7 Tsawraqa Tayta Diospa wilakuqnin chayaykur Amasíasta kayno nirqan: “Rey Amasías, TAYTA DIOS manami yanapanqatsu Israel nación soldädukunataqa. Payqa manami Efraín runakunawantsu kaykan.* Tsayno kaykaptinqa guërraman paykunata ama pushaytsu.
8 Mana cäsukuypa tsay soldädukunata pushaptikiqa contraykikunatami Tayta Dios yanapanqa vincishunaykipaq. Tayta Diosqa munayniyuqmi kaykan pitapis munashqan kaqta yanapananpaq y ushakätsinanpaq”.
9 Tsayno niptinmi Tayta Diospa wilakuqninta rey Amasías tapurqan kayno nir: “Tsawraqa ¿imanötaq arreglashaq kimsa waranqa kimsa pachak (3,300) kïlu qellayta paykunata minkakamur pägashqäpitaqa?”
Niptinmi Tayta Diospa wilakuqnin kayno nirqan: “Kachariptikiqa pägashqaykipita mastami TAYTA DIOS taritsishunkipaq”.
10 Tsayno niptinmi rey Amasíasqa Efraínpita shamuq soldädukunata wayinkunapa kutikärinanpaq nirqan. Tsaymi paykunaqa Judá nación runakunapa contran fiyupa rabyashqa wayinpa kutikärirqan.
11 Amasíasnami Tayta Diosman yärakur Kachi Pampacho chunka waranqa (10,000) Seir runakunata soldädunkunawan wanutsipäkurqan.*
12 Tsaynöpis prësu tsaripäkurqan chunka waranqa runakunata. Nirkur tsay runakunata qaqa jananman apaykur jitarpuptinmi ushakaqpaq chayarqan.
13 Paykuna guërracho kashqanyaqmi Amasías kutitsishqan runakuna Samariapita patsa Bet-horónyaq Judá nacioncho kaykaq markakunata atacar kimsa waranqa (3,000) runakunata wanutsipäkurqan. Nirkur tsay wanushqa runakunapa imaykantapis apakärirqan.
14 Edomita runakunata ushakarkatsir kutimushpanmi Amasíasqa Seircho taq runakunapa ïdulunkunata apakurqan. Nirkurnami tsay ïdulukunaman yärakushpan inciensuwan qoshtatsir adorarqan.
15 Tsayno ruraptinmi TAYTA DIOS fiyupa rabyakurqan. Tsaymi profëtata kacharqan kayno ninanpaq: “¡Imanirtaq juk nacionpa diosninkunaman yärakuykanki! Tsay dioskunaqa manami pitapis salvayta kamäpakuntsu. Salvakuq karqa atacaptiki salvanmanmi karqan”.
16 Profëta tsayno niptinmi reyqa olqushpan kayno nirqan: “Manami qamta churashqätsu yätsimaqnï kanaykipaq. Wanutsinäta mana munarqa upälala aywakuy”.
Tsawraqa profëta kayno nirqan: “Noqa yätsishqäta mana cäsukur tsaykunata rurashqaykipitami Tayta Dios ushakätsishunkipaq”.
17 Tsaypitana yätsiqninkunawan wilanakushpan Judá nacionpa mandaqnin rey Amasíasqa kachakunata kacharqan Israel nacionpa mandaqnin rey Joás kaqman. Joás karqan Joacazpa tsurin y Jehúpa wilkanmi. Kachakuna chayaykurmi kayno nirqan: “Ali chölu karqa soldäduykikunata shuntarkurshi aywanki Amasíaspa soldädunkunawan pelyapäkunaykipaq”.
18 Tsayno niptinmi kacha aywaqkunata Joás kayno nirqan: “Kutiykur mandaqniki reyta kayno ninki: ‘Cardón kashashi kacharqan Líbanucho kaykaq cedru qeruta kayno ninanpaq: “Tsurïwan warmi tsurikita tätsishun”.
“ ‘Tsayno parlaykaptinshi munti uywa pasar cardón kashata jarurirqan pakiqpaq.
19 Tsay kashanölami qampis kaykanki. Edomita runakunata ushakätsishqalaykipitaqa ama runa tukuytsu. Runa tukur pelyaq shamunaykipa trukanqa wayilaykicho täkuy. Tsaynöla achäquita ashipämaptikiqa ushakätsishaykimi y Judá runakunatapis ushakätsishaqmi’ ”.
20 Rey Joás tsayno niptinpis Amasíasqa manami cäsurqantsu. Tsayno mana cäsurqantsu edomita runakunapa ïdulunkunata adorashqanpita ushakätsinanpaq Tayta Dios destinashqa kaptinmi.
21 Mana cäsuptinmi Joásqa Israel soldädunkunawan Judácho kaykaq Bet-semesman aywarqan Amasíaspa soldädunkunawan pelyananpaq.
22 Israel soldädukuna vinciptinmi Judá soldädukunaqa qeshpir wayinpa kutikärirqan.
23 Israel nacionpa mandaqnin rey Joásnami Judá nacionpa mandaqnin rey Amasíasta Bet-semescho prësu tsariykur Jerusalénman aparqan. Tsaychömi marka murällata juchutsipäkurqan Efraín punkupita qalaykur hasta Esquïna nishqan punkuyaq. Tsay juchutsishqan murällaqa karqan pachak pusaq chunka (180) metru largumi.
24 Tsaypitanami Obed-edom templucho täpaykashqan qellayta, qorita y lapan manëjukunata apakärirqan. Tsaynölami palaciucho kaq tesörukunatapis apakärirqan. Nirkurmi runakunata prësu aparkur Samariaman kutikurqan. Aparmi kayno nirqan: “Ayluykikuna pägamaptinraqmi kachashayki”.
25 Judá nacionpa mandaqnin rey Amasíasqa Israel nacionpa mandaqnin rey Joás wanushqanpita chunka pitsqa wata masraqmi kawarqan. Rey Amasíasqa karqan Joáspa tsurinmi.* Rey Joásnami karqan Joacazpa tsurin.
26 Rey Amasías rurashqankunaqa qalaykunanpita ushananyaq qelqaraykan Judá nacionpa y Israel nacionpa mandaqnin reykunapa acta librunchömi.
27 Rey Amasías Tayta Diosta manana cäsukur juk dioskunaman yärakushqanpita patsami runakuna Amasíaspa contran Jerusaléncho sharkapäkurqan. Tsaymi Laquis markaman qeshpiptinpis qatipaykur wanutsipäkurqan.
28 Ayantanami cawalluman cargakurkur Jerusalénman apapäkurqan. Tsaychömi *Davidpa Markanman unay aylunkuna pamparaykashqan kaqman pampapäkurqan.
Ichic wilacuycuna
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 25.4 Deut. 24.16.
^ 25.7 Efraín runakunapaq parlarqa Israel nación runakunapaqmi parlarqan.
^ 25.11 Seir runakunaqa edomita runakunami karqan.
^ 25.25 Amasíaspa taytan Joásqa manami Israel nacionpa mandaqnin rey Joástsu karqan, sinöqa Judá nacionpa mandaqnin rey Ocozíaspa tsurinmi.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
