2 Crónicas 22:1-12
22 Rey Joram wanuykuptinnami Jerusalén runakunaqa Jorampa nunush tsurin Ocozíasta churarqan mandaqnin rey kananpaq. Nunush kaptinpis payta churarqan mayor wawqinkunata Arabia runakunawan asaltantikuna wanutsishqa kaptinmi. Tsaynöpami Judá nacioncho Jorampa tsurin Ocozías rey kayta qalaykurqan.
2 Mandayta qalaykushqan witsan Ocozíasqa kaykarqan ishkay chunka ishkay (22) watayuqmi.* Payqa juk watami Jerusalénpita mandarqan. Mamanmi karqan Atalía. Atalíaqa karqan Israel nacionpa mandaqnin rey Omripa wilkanmi.
3 Jutsata rurananpaq shimita maman jatipaptinmi Ocozíasqa Acabno y Acabpa aylunkunano jutsata rurar kawarqan.*
4 Tsaynöpis taytanpa yätsiqninkuna Ocozíastanami yätsirqan. Tsay yätsiqninkuna karqan Acab aylu runakunami. Tsaymi Acab y Acabpa aylunkuna rabyanätsishqanno Ocozíaspis jutsata rurar TAYTA DIOSTA rabyanätsirqan. Tsaynöpami mözularaq kaykar wanurqan.
5 Acab aylu runakuna yätsishqanta chaskiparmi Ocozíasqa Israel nacionpa mandaqnin rey Joramwan wilanakurqan Siria nacionpa mandaqnin rey Hazaelta atacananpaq. Rey Joramqa Acabpa tsurinmi karqan. Atacananpaq awniptinmi Galaadcho kaykaq Ramot markaman soldädunkunawan aywapäkurqan. Tsaycho pelyar Siria soldädukuna rey Joramta flëchaykuptinmi
6 Jezreel markaman jampikunanpaq kutirqan. Tsaycho qeshyar jitaraptinmi rey Ocozíasqa watukuq aywarqan.
Rey Ocozíasta Jehú wanutsishqan
2 Reyes 9.27-29
7 Joramta watukuq aywar Ocozías wanunanpaq Tayta Dios destinashqa kaptinmi höralan atipashqa Jezreelman aywarqan. Chayaykularmi Joramwan yarqupäkurqan Nimsipa tsurin Jehúwan parlananpaq. Jehútaqa Tayta Dios akrarqan Acab aylu kaqta lapanta ushakätsinanpaqmi.
8 Jehúqa Acab aylu runakunata wanurkatsir aywaykashqanchömi tinkurqan Judá autoridäkunawan y Ocozías aylu runakunawan. Paykunatapis lapantami wanutsirqan.*
9 Samariacho pakaraykaptinmi rey Ocozíastapis ashitsirqan wanutsinanpaq. Nirkurmi prësu apapaykuptin Jehú wanutsirqan. Ocozíaspa awkilun Josafat TAYTA DIOS munashqanno kawashqa kaptinmi Ocozíasta shumaq pampapäkurqan. Tsaypitaqa Ocozías aylu runakuna manami karqantsu rey kayman yaykunanpaq.
Judá nacioncho Atalía reina kashqan
2 Reyes 11.1-21
10 Atalíaqa wawan Ocozíasta Jehú wanutsishqanta musyaykurmi reina kayta munar Ocozíaspa wawqinkunata y tsurinkunata Judácho wanutsiyta qalaykurqan.*
11 Wanuykätsishqanta mayaykurmi Ocozíaspa panin Josabet juk sobrinunta y ashmaqninta juk cuartuman pakaykurqan.* Tsay wamrapa jutinmi karqan Joás. Tsaynöpami Joásta mana wanutsirqantsu. Josabet karqan rey Jorampa tsurin y cüra Joiadapa warminmi.
12 Soqta watami Tayta Diospa templun cuartucho Joásta pakarätsirqan. Tsayyaqmi Atalíaqa Judá nacionpa mandaqnin reina karqan.
Ichic wilacuycuna
^ 22.2 Wakin copiakuna griëgucho y siriaco versioncho niykan ishkay chunka ishkay watayuq kashqanta. Tsaynölami qelqaraykan 2Rey. 8.26 versïculuchöpis. Hebreuchönami niykan chusku chunka ishkay (42) watayuq kashqanta.
^ 22.3 Ocozíaspa mamanqa Acabpa tsurinmi karqan.
^ 22.8 2Rey. 10.12-17.
^ 22.10 2Rey. 8.26; 9.27.
^ 22.11 Tsay cuartuqa Tayta Diospa templunchömi karqan.
