1 Reyes 19:1-21
19 Acabmi wayinman kutiykur warmin Jezabelta wilarqan Elías lapan rurashqankunata y Baalpa profëtankunatapis lapanta wanutsishqanta.
2 Tsaymi Jezabelqa Elíasman kachata kachakurqan kayno ninanpaq: “Tsay profëtakunata wanutsishqaykipita kanan kikikitapis supaynikitami apatsishayki. Wara kay hörano mana wanutsiptïqa lapan diosnïkunapis mana kuyapaypa castigamätsun”.
3 Tsayno niptinmi pasaypa mantsakushpan Elíasqa Judá nacioncho kaykaq Beersebaman qeshpir aywakurqan. Tsaychömi ashmayninta kachaykurqan.
4 Tsaypita juk junaq qoyayta chunyaq jirkapa aywarmi utikashqa jamaykurqan retäma yöra sikinman. Tsaychömi wanuyta munar kayno nirqan: “TAYTA DIOS, juklana shuntakalämay. Wanukuq aylükunapa ayan mana välishqannömi noqapis mana välïnatsu”.
5 Tsayno manakurirmi tsay retäma sikincho wequykur punukäkurqan. Tsaycho punukashqa kaykaptinmi *ángel rikcharkatsir kayno nirqan: “Mikunaykipaq sharkuy”.
6 Tsayno niptin rikachakushqanchömi Elías rikarqan jawnan nawpancho shanshacho kuwashqa tantata y puyñucho yaku kaykaqta. Tsaymi sharkurkur mikurqan y yakutapis upurqan. Mikurkurnami yapay punukuykurqan.
7 Tsaypita yapay kutiykurmi ángel rikcharkatsir kayno nirqan: “Karuraqmi aywanaykipaq kaykan. Sharkur mikukurkuy”.
8 Tsayno niptinmi yapay mikurqan y yakutapis upurqan. Tsay mikuyta mikushqalanwanmi chusku chunka (40) junaq y chusku chunka paqas aywarqan Tayta Dioswan tinkuna Horeb jirkaman chayashqanyaq.
9 Tsaychömi machayman yaykuykur tsay tsakay punurqan.
Tsaycho punuykaptinmi TAYTA DIOS kayno nirqan: “Elías, ¿imatataq kaycho ruraykanki?”
10 Tsawraqa Elías kayno nirqan: “Munayniyuq TAYTA DIOS kaptikimi lapan shonqüwan qamta sirviykä. Israel runakunaqa *pactu rurashqaykita manami cumplintsu. Tsaynöpis *altarnikikunata juchutsirmi ushashqa y profëtaykikunatapis wanutsirmi ushashqa. Noqalanami makinpita qeshpimushqä. Kananqa noqatapis wanutsimänanpaqmi ashirkaykäman”.*
11 Tsayno niptinmi TAYTA DIOS kayno nirqan: “Machaypita yarqurir nawpäman ichiy”.
Tsayno nirkushpanmi TAYTA DIOS tsaypa pasarqan. Tsay hörami jirkakunata shilikätsir y rumikunatapis pakirraq löcu wayra pasarqan. Tsayno kaptinpis TAYTA DIOS manami tsay wayracho karqantsu. Löcu wayra pasariptinnami patsa fiyupa siksikyar mantsariypaq temblor karqan. Tsay temblorchöpis TAYTA DIOS manami karqantsu.
12 Tsay temblor pasariptinnami bunyaypa bunyar nina rataykaq pasarqan. Tsay ninachöpis manami TAYTA DIOS karqantsu. Nina pasariptinnami walwalyaylapa wayra pasaykaqno mayakarqan.
13 Tsayta mayaykurmi Elíasqa cäpanwan qaqlanta tsapakurkur machay punkuman yarqurir ichikuykurqan.
Tsaycho ichiraykaptinmi TAYTA DIOS kayno nirqan: “Elías, ¿imatataq kaycho ruraykanki?”
14 Tsawraqa Elías yapay kayno nirqan: “Munayniyuq TAYTA DIOS kaptikimi lapan shonqüwan qamta sirviykä. Israel runakunaqa pactu rurashqaykita manami cumplintsu. Tsaynöpis altarnikikunata juchutsirmi ushashqa y profëtaykikunatapis wanutsirmi ushashqa. Noqalanami makinpita qeshpimushqä. Kananqa noqatapis wanutsimänanpaqmi ashirkaykäman”.
15 Tsayno niptinmi TAYTA DIOS kayno nirqan: “Shamushqalaykipa kutir Damasco tsaki jirkayaq aywanki. Tsayman chayaykur Hazaelpa umanman aceitita winapanki Siria nacionpa mandaqnin rey kananpaq.*
16 Tsaypita aywakur Israel nacionpa mandaqnin rey kananpaq Nimsipa tsurin Jehúpa umanmanpis aceitita winapanki.* Tsaynöpis Abel-mehola markapita Safatpa tsurin Eliseupa umanmanpis aceitita winapanki qampa trukayki profëta kananpaq.
17 “Hazaelpa makinpita qeshpiq kaqtaqa Jehúmi wanutsinqa. Jehúpa makinpita qeshpiq kaqtanami Eliseo wanutsinqa.
18 Tsayno kaptinpis kikïmi tsapäshaq noqaman yärakamaq qanchis waranqa (7,000) runakunataqa. Paykunaqa manami *Baalman qonqurpakushqatsu ni mutsashqatsu”.
Discïpulun kananpaq Eliseuta Elías pushashqan
19 Tsaypita Elías kutirmi Safatpa tsurin Eliseuta tarirqan chunka ishkay yuntakunawan milgapänakuypa aruykaqta. Ushanan kaq milgacho Eliseo aruykaptinmi Elíasqa nawpanpa aywaykur cäpanta ayluparkur pasakurqan.
20 Tsaymi Eliseuqa törunta kachariykur Elíasta taripaykur kayno nir ruwakurqan: “Qamwan aywanantsipaq puntataqa mamäta y taytätaraq mutsaykamushaq”.
Tsayno niptinmi Elías nirqan: “Ayway ari. Itsanqa ama qonqankitsu aywanantsipaq kashqanta”.
21 Elías tsayno niptinmi Eliseuqa kutiykur ishkay töruta pishtatsirqan. Nirkurmi yüguta y armädanta* tseqtarishpan tsay yantawan aytsata kankarir markacho runakunata qararqan. Tsaypitanami Elíasta yanapananpaq aywakurqan.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 19.15 2Rey. 8.7-13.
^ 19.16 2Rey. 9.1-6.
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ 19.21 Wakin runakunaqa takllanta nipäkun.
